شهيرة: بمجرد جلوسى مع الشعراوى والاستماع إليه كنت بشعر براحة نفسية

استرجعت الفنانة الكبيرة شهيرة ذكريات اللقاءات التي جمعتها بالإمام محمد متولى الشعراوى، حيث تحدثت عن كواليس هذه اللقاءات خلال مداخلة هاتفية لتليفزيون اليوم السابع مع الكاتب الصحفى عمرو صحصاح رئيس قطاع الفن، وقالت:كنت بتمنى اللقاء به، ولما الحاجة ياسمين الخيام قالتله إن أنا عايزة ألتقى بيه، والحمد لله رحب جدا.. وبقى الحمد لله يسمعنى ويشجعنى.. الشيخ الشعراوى مش بس عالم.. ده كان بيوصل الدين لقلبك قبل عقلك.

وأضافت الفنانة الكبيرة شهيرة قائلة:"لما زورته كنت اعتزلت الفن، وكان عندى بعض التساؤلات.. وغير كدة إن أنا ألتقى بالشيخ الشعراوى بالنسبة لى دى فرصة جميلة جدا إن أنا ألتقى بهذا العالم الكبير.

وتابعا شهيرة حديثها قائلة:"كان مجرد إن أنا أقعد معاه وأتكلم ده بيدينى راحة نفسية وطاقة إيجابية، وبعرف إن خطوة الاعتزال اللى خدتها خطوة جميلة وأنا كنت سعيدة بيها.. وهو الحقيقة أنا استمتعت جدا جدا باللقاء ده.. الشيخ الشعراوي لما بتتكلم معاه بيشرحلك المعانى بأسلوب راقى مريح.. لما بتكلم معاه في آيات معينة تلاقيه بيربط الآيات بواقع إحنا بنعيشه، دايما بيفسر الآيات بالواقع عشان يوصلك المعلومة بسهولة.

شهيرة فى ذكرى ميلاد الشعراوى: الإمام كان متواضعا وأتغدينا معاه على الأرض

حكت الفنانة الكبيرة شهيرة عن ذكريات لقاءاتها بفضيلة الشيخ محمد متولى الشعراوى، حيث تحل اليوم الأربعاء 15 أبريل ذكرى ميلاده، وقالت في تصريحاتها لتليفزيون اليوم السابع مع الكاتب الصحفى عمرو صحصاح، إنها سعدت للغاية وكان لها عظيم الشرف بلقاء الإمام الشعراوى.

وعلقت الفنانة شهيرة للتليفزيون عبر مداخلتها الهاتفية قائلة: "رحمة الله عليه ويرزقه الفردوس الأعلى.. الشيخ الشعراوى كان ليا عظيم الشرف أن ألتقى بيه من خلال السيدة ياسمين الخيام، وروحت هناك في البيت بتاعه البسيط المتواضع.. الشيخ الشعراوى ماكانش بيحب الترفه والمظاهر الفارهة، وكان عازمنا على الغداء.. ساعة الغداء وهما بيحضروه.. لكن فوجئت الشيخ الشعراوى بيدعونا بتناول الغداء على الأرض.. الأول اندهشت جدا.. لكن لقيت رجل بسيط للغاية ومتواضع وبيحب يسمع.. بقى يسمع لنا كتير ويحاول إن هو يساعدنا لو فيه حاجة عايزة استفسر عنها إزاى يفسرهالى بعمق وببساطة في نفس الوقت.