أحمد شاكر: الفن لازم يكون ليه رسالة مجتمعية والعلمين تحولت إلى حياة بعدما كانت خراب

أكد الفنان أحمد شاكر أن سبب تقديمه فيلم قصير عن مدينة العلمين جاء بسبب رؤيته لمدى التطور الحاصل هناك، موضحا أنه يذهب للعلمين مع والده منذ سن الطفولة، وكان يرى جمال شواطئها لكنه كان لا يستطيع الوقوف على الشاطئ بسبب الألغام التي كانت أحيانا تتسبب في فصل أجزاء من جسد المارة.

وعن تقديمه فيلما عن مدينة العلمين، قال الفنان أحمد شاكر لتليفزيون اليوم السابع: "أولا الفن لازم يكون ليه رسالة مجتمعية.. أنا بروح العلمين من سن صغير جدا.. كان والدى بياخدنا هناك وقت ماكانش فيه لسة أى حاجة هناك من التمنينات وإحنا أطفال، نروح نشوف الشواطئ الجميلة هناك في سيدى عبد الرحمن وفى العلمين، فيلفت نظرى أد إيه المكان ده ساحر ولا يقل جمالا عن أجمل الشواطئ اللى فى العالم، لكن كان فيه مشكلة هناك لما بنروح كان فيه حقول كاملة كلها ألغام من مخلفات معركة العلمين الشهيرة اللى حصلت عام 1942 على أرض مصر بين الألمان والإنجليز، وكانت معركة فاصلة غيرت مجرى التاريخ بجد".

وأضاف شاكر لتليفزيون اليوم السابع قائلا: "القائد العسكرى روميل اللى أنا عملت دوره فى الفيلم، الراجل ده مصنف من أهم الجنرالات العسكرية في التاريخ.. المعركة اللى حصلت دى تركت كم من مخلفات الحرب والدمار والألغام في هذه المنطقة وعربيات خردة، وكانت فيه ناس ممكن تمشى هناك، الألغام تضرب فيها يتقطع أجزاء من جسمها.. فأنا فكرت مع هذه الطفرة العظيمة اللى حصلت هناك، وأنا واقف في متحف العلمين قولت لازم أعمل حاجة عن هذه العظمة، والتغير الشديد اللى حصل والطفرة اللى حصلت فى العلمين".