هانى رمزى لتليفزيون اليوم السابع: هصور فيلم غبى منه فيه 2 قريبا

تحدث النجم هانى رمزى عن جديده فى عالم السينما، حيث أوضح أن هناك تحضيرات فعلية لعمل سينمائى جديد، سيعود من خلاله بشكل قوى، وقال في تصريحاته لتليفزيون اليوم السابع مع الكاتب الصحفى عمرو صحصاح من نيويورك: "بنحضر حاليا للجزء الثانى من فيلم "غبى منه فيه"، وبنكتب فيه دلوقتى، وإن شاء الله الدنيا هتتحدد بعد الكتابة ما تخلص، تأليف أستاذ شادى وأمجد الشرقاوى، وهذا ليس أول تعاون بيننا، فشادى كتب لى حاجات كتير فى عدة أعمال كبيرة ومهمة".

وعن مدى كيفية استكمال الشخصيات التي قدمها النجمان الراحلان حسن حسنى وطلعت زكريا فى الجزء الأول، وكيف سيتم معالجة هذا الأمر، قال رمزى: "الجزء الثانى من فيلم غبى منه فيه مالهوش علاقة بالجزء الأول نهائيا، الشخصية هتتاخد وهتتحط فى أحداث جديدة خالص، والجمهور مش هيحس  بأى قلق من أى نوع ولا فيه امتداد لأى حاجة، لأن ده الحل الوحيد اللى إحنا استقرينا عليه بعد مشاورات ناس كتير، واستقرينا على ده إن شاء الله يكون ده أنسب حل عشان نطلع بجزء ثان ويبقى عندنا جزء ثالث كمان إن شاء الله".

هانى رمزى: لازم أقول للناس كلها وأنا فى أمريكا الحمد لله على نعمة مصر.. فيديو

وأجرى النجم هانى رمزى مقارنة سريعة مما يعانيه الشارع الأمريكي الآن من تضخم وارتفاع في الأسعار وسياسة خارجية غير منضبطة للرئيس الأمريكي دونالد ترامب، وبين مصر حفظها الله، وقدرتها على حفظ أمنها في وسط إقليم مشتعل ومتوتر ملىء بالحروب والأحداث المتلاحقة، حيث قال رمزى في تصريحاته لتليفزيون من أمريكا:" كلنا عارفين كويس قوى إن ما يجرى الآن في منطقة وبالأخص حرب إيران إن ده مخطط إسرائيلى للهيمنة والسيطرة على الشرق الأوسط بمساعدة أمريكا".

وأضاف رمزى قائلا: "المسألة إحنا كعرب قلقانين وخايفين، الحرب دى كمان عملت انعكاس على كل حاجة حتى في مصر أثرت علينا في مسألة التضخم، وبعدين لمجرد إن حصل وقف لإطلاق النار شوفت الجنيه المصرى قيمته ارتفعت، والبترول سعره نزل في العالم كله بمجرد قرار صغير.. فربنا يستر الفترة الجاية بعد فشل المفاوضات دى مع سياسة الأخ الأمريكانى المجنونة دى".

واستطرد رمزى في حديثه قائلا: "ربنا يسترها.. إحنا والله لازم أقول للناس كلها نحمد ربنا.. أجمل منطقة في العالم كله هى مصر.. ربنا يديمها علينا نعمة، والحقيقة في ظل وجود قيادة سياسية بتدير الملف الخارجى بحكمة شديدة ربنا يرشد القيادة عندنا ويرشد الريس ويحمى المصريين كلهم ويديم علينا نعمة الأمن والأمان، وكتير عدى علينا أزمات كتير وبنطلع منها ببركة ربنا وعظمة الشعب المصرى؟.

هانى رمزى: فيه 9 ملايين متظاهر فى شوارع الولايات الأمريكية بسبب حرب إيران

وقال النجم هانى رمزى إن الأمور في شوارع الولايات المتحدة الأمريكية ليست على ما يرام كما يعتقد البعض، بل أن هناك غضبا عارما من سياسة الحرب الحالية مع إيران، حيث علق في تصريحاته لتليفزيون اليوم السابع قائلا: "أمريكا الأسبوع اللى فات نزل في نيويورك وبعض الولايات الأخرى 9 ملايين متظاهر، بيقولوا إحنا مالناش دعوة بإسرائيل، ومالناش دعوة بحروب إسرائيل".

وأضاف رمزى أن هناك تساؤلات كثيرة من مواطني أمريكا بشأن هذه الحرب، حيث قال: "مواطنو أمريكا يتساءلون.. ليه أمريكا بتتبنى هذه السياسات، إحنا مالنا بالحروب، إحنا عايزين سلام وعايزين نعيش، يعنى الشعب العادى مختلف تماما عن سياسات أمريكا اللى مودية العالم كله في داهية.. الشعب هنا مختلف تماما عن الرغبات الشخصية لترامب والجنان اللى هو فيه.. الناس البسيطة هنا عايزة تعيش.. هو أنت فكرك أى بلد في العالم مش عايزين يعيشوا في رخاء بعيد عن الحروب وبدون قلق وخوف".

هانى رمزى من نيويورك: الشعب الأمريكى بيغلى بسبب الأسعار وسياسة ترامب

وأكد النجم هانى رمزى، أن الشارع الأمريكي الآن مشتعل بسبب سياسة رئيس الولايات المتحدة الأمريكية دونالد ترامب، حيث أوضح أن ارتفاع الأسعار والتضخم وسياسة الحرب أغضبت مواطني أمريكا بالكامل.

وقال رمزى في تصريحاته: "قبل فشل المفاوضات بين أمريكا وإيران، والشعب الأمريكي بيغلى عشان التضخم والأسعار اللى زادت وأسعار البترول والبنزين والطاقة كلها زادت وده أثر على كل السلع، أنا شخصيا حسيت بفرق كبير جدا ما بين زيارتى اللى فاتت وزيارتى الحالية، يعنى هذه الحرب أثرت على الأسعار وسببت الغلاء في العالم كله".

وأضاف رمزى في صتريحاته قائلا: "خلى بالك من ساعة ما جه ترامب، والحقيقة الناس كانت متوسمة خير وأتفاجئوا بوجه آخر لهذا الرجل.. الناس هنا بتشتم وتلعن، والشعب الأمريكي هنا مالهوش أى علاقة بأى حاجة، ويقولك إحنا ليه نحارب عشان خاطر إسرائيل، إحنا أولى بفلوسنا وأولى بدخلنا وأولى بسلاحنا".

في سياق مختلف، أوضح النجم هانى رمزى أنه متواجد الآن في الولايات المتحدة الأمريكية لعدة أسباب، حيث قال: "دايما بسافر فى إجازاتى لأمريكا مع أسرتى، المرة دى عشان فرح ابن أختى كمان كام يوم، فقلنا نقضى العيد مع بعض ونحضر الفرح عشان هما عايشين هنا في أمريكا كأسرة وكعيلة وبعد كدة نرجع مصر".

هانى رمزى: "إحنا مسلمين ومسيحيين بنحتفل بكل الأعياد ومصر ليها طبيعة خاصة"

وأكد النجم هانى رمزى، أن مصر منذ قديم الأزل ولها طبيعة خاصة فى الاحتفال بأعيادها، لا تفرق بين مسلمين ومسيحيين، حيث قال: فيه ناس عملوا محاولات كتير أوى لإحداث فرقة بين المصريين وفشلوا إنهم يفرقوا بين الشعب المصرى وبعضه.. مصر دى لها طبيعة خاصة لا يمكن أى حد هيقدر يغيرها.. مصر دى أرضها أتروت بدماء الشهداء مسلمين ومسيحيين فى كل الحروب ومنذ قديم الأزل".

وأضاف قائلا: "إحنا النهاردة بنحتفل ببلدنا وبنفسنا.. أى عيد عند المسلمين أو عند المسيحيين أو عيد قومى كلنا بنحتفل بكل الأعياد، وإحنا شعب بيحب الفرح وبنحب الأعياد واللمة.. ولسة خارجين من رمضان كان مجمع كل المصريين المسلمين منهم والمسيحيين.. أيام حلوة وأيام جميلة وإن شاء الله مصر بخير.. وما تنسوش إن مصر مذكورة فى الكتب السماوية مذكورة فى القرآن والإنجيل.. فمصر محروسة وشعبها محروس".