باسم سمرة: قابلت محامين أثناء التحضير لعين سحرية وزكي شخصية مهزوزة

تحدث النجم باسم سمرة عن كواليس تحضيره لدور زكي في مسلسل عين سحرية، لافتا إلى أنها كانت تحيره في البداية، لأنها شخصية ليست شريرة أو طيبة في المطلق.

وتابع باسم سمرة لـ "اليوم السابع: "أكتر حاجة كانت محيراني في زكي هو طيب ولا شرير؟ لأنه مش شخصية اعتيادية؛ بتلاقيه "Tough" وعنيف وبيروح يحل مشكلة في جريمة قتل، وبعدين بتلاقيه بيروح يأكل واحد غلبان"، مضيفا: "بناتي سألوني: "يا بابا أنت طيب ولا شرير؟ وإيه اللي هيحصل؟" قلتلهم اتفرجوا".

وقال: "أثناء التحضير فكرت إن زكي ده بني آدم عادي، فيه الخير والشر، لكنه اتعرض لمأساة واتسجن مظلوم، والمثل بيقول "ياما في الحبس مظاليم"، هو خارج من السجن أصبح مهزوز ومش عارف يروح فين، وسكته إنه عايز ياخد حقه ويكشف الفساد المحيط بيه"، متابعا: "في مكتب المحاماة بتاع "أستاذ راغب" (المحامي الكبير)، هو بيشوف فساد فبيروح يبوظ جريمة قتل، أو يعمل حاجات مخالفة للقانون عشان "ياكل عيش" وياخد مليم، والتاني بياخد ملايين.

وعن التحضيرات الخاصة بالشخصية، أوضح: "التحضير كان فيه بروفات مع المخرج ومناقشات مع المؤلف هشام هلال، وقابلت محامين كتير طبعاً وتناقشت معاهم، هما مبسوطين بالدور و"زكي" ظروفه مختلفة.

قصة مسلسل عين سحرية

يأتي مسلسل عين سحرية في إطار اجتماعي تشويقي، حول شاب بسيط يعمل فني تركيب كاميرات مراقبة، يتورط في جريمة قتل، قبل أن يقتحم حياته محام غامض، لتتحول العلاقة بينهما إلى ثنائي يكشف ملفات فساد كبرى.

أبطال عين سحرية

مسلسل عين سحرية بطولة عصام عمر، باسم سمرة، عمرو عبد الجليل، سما إبراهيم، جنا الأشقر، وغيرهم من الفنانين، والعمل من تأليف هشام هلال وإخراج السدير مسعود، وإنتاج المتحدة ستوديوز بالتعاون مع المنتج محمد مشيش.

باسم سمرة

ندوة باسم سمرة

باسم سمرة