أحمد العوضى لـ ع المسرح: ياسمين عبدالعزيز الحب الحقيقى والوحيد فى حياتى وما قصرناش مع بعض والطلاق قضاء وقدر.. ويؤكد: ما فيش حد نمبر1.. وحب الناس سر نجاحى.. وما عنديش روح الانتقام وأتمنى ينادونى بـ حبيب الغلابة

أكد الفنان أحمد العوضى أن ياسمين عبدالعزيز هى الحب الحقيقى والوحيد فى حياته، مضيفًا: "عشت معاها أيام بفترات بمواقف بمراحل، وعشت معاها أحلام حياتى، عشت معاها أيام فيها حب ونجاح وأزمات وحروب ومرض".

وأضاف أحمد العوضى، خلال حواره ببرنامج "ع المسرح"، مع الإعلامية منى عبد الوهاب، على قناة الحياة، أنا وقفت جنب ياسمين وهى وقفت جنبى، ولما تعبت بعد الطلاق جات، ومفيش حد يعمل اللى عملته".

وتابع "ياسمين أهم نجمة فى الوطن العربى، وعندى فى حياتى حاجة كبيرة جدا، وأنا تأثرت نفسيا بسبب الانفصال وماتكسفش أقول كدة، وعشت معاها قصة حب كبيرة وعلشان كدة وصلت للناس بالعمق ده، والناس حست ده، ومحدش يقدر يضحك على الناس، وهى ستظل الأهم فى حياتى".

و أكد أحمد العوضى، أنه لم يقصر فى حق ياسمين عبد العزيز ولا هى لم تقصر فى حقه، قائلا: "محدش فينا قصر فى حق التانى، أو كان وحش مع التانى، واللى حصل قضاء وقدر، وحبى لها حسيته من جوايا، وبقول الحقيقة، وده ميقللش من حد دخل فى حياتى".

وأضاف العوضى، أن ياسمين عبدالعزيز جدعة وستظل بالنسبة لى حاجة كبيرة فى حياتى، وحبى لها لم ينته، وانتهاء الزواج فراق وده أقدار".

وتابع، العوضى، "انفصلنا على قد احترام الناس لينا واحترامنا للناس، علشان لما الناس تشوف منك الحاجة الحلوة والسعادة بتبقى قدوة وانك بتصدر طاقة حلوة".

وقال العوضى، "عمرى ما دخلت صراع "نمبر وان" ومافيش حد رقم 1 فى المطلق، الواحد هو الله، وغير كدة كله فى الأونطة، مافيش حد رقم واحد طول الوقت مافيش حاجة اسمها كده، لأن دى مش عدالة الدنيا، فى أساطير اتنسوا".

وأكد، أن ربنا كان ليه عليا فضل أن مسلسل "حق عرب" يكون رقم 1 وبفضل دعوات الناس ليا، أنا راجل ناجح ومسلسلى ناجح، لو دامت لغيرك مكنتش تجيلك".

تابع، :"انا بحافظ على حب الناس ليا، أبرك من نجاحى، فلا تكن مغرورا فتندم ولا تكن واثقا فتُصدم، فالغرور بداية النهاية، وانا اللى شاغلنى أن يكون المسلسل بتاعى السنة الجاية أنجح مسلسل، وانا بنافس نفسى بس، وحب الناس أهم من النجاح وده جزء كبير من نجاح مسلسل "حق عرب" وحبهم بيخلينى مبسوط".
و أجاب العوضى، عن سؤال أن الفنان بيومي فؤاد قال: أنا البطل الحقيقي لرواية الإسكندراني، والأب هو البطل الحقيقى فيها.. فرد: "دا من وجهة نظر مين الأم؟ هو أسامة أنور عكاشة كلمه يعنى؟ مافيش حاجة كدة، وانا معنديش صراع مع حد".

وأكد أنه لم يسئ أحد من زملائه إليه، وعنديش روح الانتقام، الانتقام بيخسر، ونفسى أغير العصبية فيا، وأتمنى ينادونى بـ"حبيب الغلابة" ودى أكتر حاجة بحبها".

تابع أحمد العوضى، "بيطاردنى هاجس حب الناس ليا يهمنا حب الناس يستمر، واحنا بنكبر وبنعجز ومش هنبقى طول الوقت نجوم ولا شباب ولا هيبقى جسمنا حلو وشكلنا حلو، لكن هيبقى السيرة الطيبة والناس تذكرك بالخير، وربنا مش بيدى كل حاجة فى الدنيا لأنه مخلى كل حاجة للجنة".