الحلاوة حلاوة الروح..شاهد سخرية الشباب على هاشتاج المصريات أجمل نساء العرب

عدد الردود 0

دى حقيقة !!

بداية , فعلا الجمال مش جمال الشكل , عندنا مثل صعيدى مضحك بالمعنى ده بيقول , قرد يسلينى ولا غزال يغمنى !! بمعنى انه ممكن المرأة تكون فائقة الجمال , انما محدش يقدر يعاشرها ربع ساعة !! خلقها ضيق وطماعة ونكدية وزنانة وسطحية وحقودة وعلاوية , هتعمل ايه بقى بجمالها !! مهياش برواز هتعلقه على حيطة وتتفرج عليه , دى انسانة هتعاشرها !! امرأة تانية جمالها متواضع أو حتى قبيحة , انما طبعها هادىء وعاقلة ومتزنة وقنوعة وصبورة وبشوشة ومهذبة أحسن منها مليون مرة !! كمان فيه نساء مصريات كتير فعلا فائقات الجمال , وجمالهم فيه حيوية وطاقة , مش تحس انهم تماثيل جبس !! جمالهم بدون روح !! غير ان المرأة العربية حتى وان كانت جميلة , فهى متنفعش تعيش فى مجتمعنا المصرى الا لو زوجها مليونير على الأقل , هتقولولى ليه , هقولكم , المرأة العربية مهياش الزوجة اللى تصحى من النجمة تحضر الفطار لزوجها وأولادها وتلبس العيال وتفطر الجميع وبعدين تاخد العيال توديهم المدارس وتروح شغلها ان كانت موظفة , وتخرج من شغلها تعدى على السوق تجيب لوازم البيت وتروح المدرسة تجيب الأولاد وترجع البيت تطبخ الغدا على ما يكون زوجها رجع فيتغدوا وبعدين تذاكر للولاد وتعمل معاهم الواجب , وبعدين تتفرغ لغسل اطباق الغدا وتجهيز العشا , وبعد العشا تنيم الولاد وتشوف طلبات زوجها وانتوا فاهمينى طبعا , وتانى يوم تكرر نفس السيناريو تانى , ويوم الأجازة عندها مخصص لتنضيف البيت وتجهيز خضار الطبخ للأسبوع وغسل ملابس البيت كله ونشرها , والكوافير عندها للأعياد والمناسبات فقط دا ان راحتله أصلا !! ولو كانت مادياتها مساعدها وجابت عاملة نضافة تنضفلها البيت بتقف على دماغها من ساعة ما تدخل لحد ما تخرج لدرجة تحسسك انها لو كانت نضفت بنفسها كانت هترتاح اكتر !! لو جوزها أو الأولاد نفسهم فى المحشى مثلا تفضل بالساعات قاعدة تحشية وترصه فى الحلة وتنسى تعبها كله وهى شايفة زوجها والولاد مبسوطين وهما بياكلوه , ممكن تلاقيها بتلبس نفس الهدوم من اربع خمس سنين فاتوا او اكتر , ولو دفعت فى قزازة برفان خمسين جنيه بتعتبره غالى ميستعملش الا فى المناسبات !! , المرأة العربية بقى , برنسيسة , أميرة متوجة , لازم يكون عندها اللى تنضفلها البيت واللى تطبخلها الأكل واللى تحضرلها الحمام , وتدلكها وتكبسها بعده , لازم سواق يوصل الأطفال للمدارس ويجيب لوازم البيت من السوق , وبيبى سيتر ترعى الأطفال فى البيت , وحمامات وشامبوهات وكريمات وساونا ومساج ومانيكير وباديكير وكوافير وميك اب وعطور اسعارها لوحدها تسبب دوار وهدوم داخلية وخارجية سعر القطعة منها بمرتب موظف عندنا لمدة سنة !! وكل موسم ترمى كل هدومها وتشترى غيرها للموسم اللى بعده , متعرفش تعمل كباية شاى أو تقلى بيضتين لو مفيش حد عمللها ده , لو زوجها مرض أو ظروفه المادية تعثرت أكتر من شهرين تطلب الطلاق !! ببساطة مجرد قطعة فنية جميلة للمتعة وبس !! والزوج يستمتع بيها طالما يقدر يصرف عليها !! حد من الرجالة المصريين يحب يتزوج زوجة زى دى ولو كانت ملكة جمال العالم ؟؟ عرفتوا بقى ان فعلا المرأة المصرية أجمل نساء العالم !!