بالفيديو.. حكاية ساندرا.. مهندسة معمارية صباحا وبائعة ورد على "عجلة" ليلا

"خلى السعادة عادة".. شعار تؤمن به ساندرا مجدى التى تخرجت فى كلية الهندسة جامعة عين شمس قسم عمارة منذ 8 سنوات وتعمل فى مجالها وكانت تدرس للطلبة بالجامعة وتقوم الآن بتحضير الماجستير.

ساندرا تعشق الزهور بكل أنواعها وتؤمن أنها تستطيع تحقيق السعادة لدى الجميع لذلك افتتحت محلا صغيرا لبيع الورد بجانب عملها فى مجال الهندسة المعمارية لكن لاحظت أن الناس تشترى الورد فى المناسبات فقط، ففكرت فى أن تتجول فى الشوارع بـ"عجلة" لتبيع الورد وتعرف الناس إن شراء الورد ليس فى المناسبات فقط ولكن لنشر السعادة بين الناس.

تتحدث ساندرا عن بداية فكرة عملها فى بيع الزهور فتقول: "الورد بالنسبة لى يقدر يعبر عن الكلام إللى الشخص ممكن ما يقدرش يعبر عنه ومن هنا فكرت افتح محل ورد عشان أعرف الناس إزاى يقدروا يوصلوا رسالتهم للناس ويأثروا فيهم من خلال لوحة جميلة ربنا خلقها لنا وهى الورد".

وأضافت: "بدأت ألاحظ إن الناس بتشترى الورد فى المناسبات بس ففكرت أوصلهم فى كل مكان عشان أعرفهم قيمة الورد وإنه مش للمناسبات بس ده كمان لنشر السعادة بينهم فبدأت ألف بعجلة عادية وبعد كده جربت ألف بتروسيكل لحد ما فكرت أصمم عجلة مناسبة للحفاظ على الورد ألف بيها فى الشوارع عشان أوصل لعدد أكبر من الناس".

ساندرا تعشق أن ينادى عليها بلقب "بائعة الورد" ولا تخجل من ذلك بل تتشرف به لأنها تؤمن بأن لقب بائعة الورد مثل المهندسة، معتقدة أن الاثنين يقومان بالعمل نفسه.

وعن هذا تقول: "بياعة الورد بالنسبة لى زى لقب باشمهندسة الاتنين بيصمموا حياة الناس واحد بيصمم المكان إللى الناس هتعيش فيه والتانى بيصمم الحالة النفسية والمزاجية للناس كلمة بياعة الورد مش بتضايقنى خالص وزى ما بتشرف وبنبسط إن حد بيقولى يا باشمهندسة بتشرف برضه لما حد يقولى يا بياعة الورد".