سيد منير عطية يكتب: أنا الجندى

لا يوم إرهابكو خوّفني
ولا رصاصكم ودينامتكم
ولا حتى قنابلكم
دنا طول التاريخ حافر
بقدمى هناك مقابركم
وانا لحظة ما ابُصلكم
هتبقوا لا شئ
دنا الجندى بقلب جرئ
أنام ف الطل ما يهمش
ورمل الصحرا ليّا صديق
بمصمص عضم مليون ديب
وع التعابين ببل الريق
حذارى تمُرّوا قُدّامي
حذارى.. لو جمعنا طريق
حذارى تبصّوا لبلادي
ولزهورها
هتلقوا م السما طيورها
بقت أبابيل
وتلقوا حجاره من سجّيل
بتخسفكم لسابع أرض
دنا واحد ف خير الجُند
وزيى راح تلاقوا ألوف
نصحّى الشمس من نومها
ونغزلها ف شال ملفوف
علم مصري
وانا بصرى..
يجيب النمله بالأميال
ولو هصرخ ف قلب الليل
حهد جبال
أصحى الموتى من نومهم
ولاد ورجال
أنا فوق الكتاف شايل
سلاح أبطال
أكون وقت الحروب زلزال
لكن وقت السلام أصبح
غناوى وترنيمات موال
ولسّه مازال
بمد إيديّا للعايز
وجايز.. لحظه أقبلكم
لكن لو دمّى سال منكم
سلامى يبقى ليكوا مُحال
هقول أسف ونفذ الصبر
ف أرضى رح تلاقوا القبر
ولو رح اموت ما تفرقشي
أموت لكن تعيشى يامصر
دنا الجندى