علاقة المصريين بالأكل علاقة وطيدة تخطت ارتباطه بجميع مناسبات المصريين فقط، فمن يرجع على التراث المصرى سيجد أن معظم الأمثال الشعبية تحتوى على ذكر الأكل والجوع والشبع وبعض أصناف الخضروات والفاكهة، والبعض الآخر يحتوى على أغراض المطبخ، فى إشارة إلى أن الأكل بشكل عام بكل محتوياته من أبرز اهتمامات المصريين من قديم الزمن.
أمثال مرتبطة بالخبز:
- الجعان يحلم بسوق العيش
- ادى العيش لخبازه ولو أكل نصه
- شحات وعاوز رغيف فينو
- لقمة هنية تكفى 100
أمثال مرتبطة بأدوات الطهى:
- اكفى القِدرة على فُمها تطلع البنت لأمها
- اللى مايشوفش من الغربال يبقى أعمى
- كل من رص الصوانى بقى حلوانى
أمثال مرتبطة بأصناف الأكل:
- كل فولة ولها كيال
- أبوك البصل وأمك الثوم تجيب منين لك الحلوة يا مشئوم
- يا داخل بين البصلة وقشرتها
- كله بالبخت إلا القلقاس مية وفحت
- ضرب الحبيب زى أكل الزبيب
- أكل الفول وأخرج قفايا عرض وطول، ولا أكل الكباب ووقفة الديانة ورا الباب
- أردب فول ولا أردب شعير
- أقل بصلة تنزل دمعة
- أكل الفلاح تفاح..قال الفجل أحسن
- اللى اتلسع من الشوربة ينفخ فى الزبادى
- اللى كواها البين تطبخ محشى
- اللى معاه عيش يتعفرت على الجبنة
- اللى يسرق البيضة يسرق الفرخة
- اللى يشوف الفول ولا ياكلش يحب ولا يطولش
- إن كان حبيبك عسل متلحسوش كله
- انت زرعتها مانجا طلعت فجل
- ادلعى يا خبيزة
- وقية لحمة ولا فدان فى الكروش
- إن كنت عاوز تمص قصب مص من الوسط، وإن كانت عاوز تخطب خد رفيعة الوسط
تم أضافة تعليقك سوف يظهر بعد المراجعة