فيسبوك
واتساب
كشف بطل كمال الأجسام العالمي بيج رامي عن كواليس مشواره الرياضي، ورؤيته للشباب المصري وصناعته للقمة، وأصعب المواقف المؤثرة في حياته، ومشاريعه القادمة لخدمة الأجيال الجديدة.
ووجه بيج رامي عدد من النصائح في حوار خاص مع تليفزيون اليوم السابع، للشباب للتركيز في حلمه ووضع طاقته فيها بدلًا من التشتت تفكيره في أمور كتير.
وإلى نص الحوار:
في البداية .. ما هي أبرز التحديات والمحطات الصعبة التي واجهتك طوال مسيرتك في البطولات؟
_ دايمًا بقول لكل اللي قريبين مني إن الواحد لما بيوصل لهدفه بيحس إن كل اللي فات كان سهل ، سلم النجاح بيبقى طويل وصعب وأنت واقف في أوله، بس لما بتطلع فوق بتحس إن الموضوع كان بسيط وممكن.
ما الفرق بين التحدي في بدايته وبعد النجاح ؟
أي صعوبة مريت بيها بيقابلها أي شخص في شغله أو في بداية حياته، وبعد ما بتوصل بتعرف إن الصعوبات دي كانت ضرورية عشان تحس بطعم الحاجة اللي بتحبها.
ما هي أكثر المحطات الإنسانية والشخصية التي تركت أثرًا عميقًا في حياتك؟
فراق الأب والأم أصعب حاجة ممكن تمر على الإنسان؛ فوالدي الله يرحمه توفي وأنا لسه في بداية مسيرتي، وكنت أتمنى إنه يشوف أي نجاح ربنا يكتبه لي
الكل يسأل.. من خليفة بيج رامي في بطولات كمال الأجسام؟
في ناس كتير في مصر، وأنا متأكد إن الجيل الموجود والأجيال اللي جاية هتطلع بعضها؛ لأن مصر بعيدًا عن أي حاجة تخص الجينات دايمًا فيها ناس عندها الإرادة للوصول لأحسن مستوى ، ومع تحسن الوعي الرياضي السنين اللي فاتت.
ما تقييم لجيل الشباب الحالي من الممارسين للعبة ؟
المشاكل الأساسية اللي بتواجه الشباب هي الظروف المادية والتحديات بين بناء المستقبل والتفرغ للرياضة، لأن أي رياضة محتاجة طاقة كاملة وتفرغ تام من غير ما الواحد يبص لحاجة تانية.
وما هي نصائح للشباب الطامح للوصول إلى القمة وتحقيق أهداف مشابهة؟
أنا بقول لكل شاب عايز ينجح ما يفكرش في أسماء، ويكون تركيزه الأساسي إنه يثبت نفسه، ويكون فاهم إن كل حاجة مكتوبة وده رزق من ربنا قبل كل شيء و الأهم إنه يجتهد بنسبة كبيرة جدًا ويشتغل على نفسه أضعاف مضاعفة، ويفكر في حلم واحد ويحط طاقته كلها فيه بدل ما يشتت تفكيره في أمور كتير.
كيف تخطط لخدمة الأجيال الجديدة، وما هي تفاصيل مشروعاتك القادمة الموجهة للشباب؟
أنا شغال على أكتر من حاجة دلوقتي وبأتمنى تنجح وتفيد الشباب، مش بس عشان المكسب المادي، لكن عشان نقدم حاجة حقيقية للناس ، أنا عامل سلسلة صالات رياضية في مصر فيها جزء تعليمي وجزء تربوي جنب الرياضة، وعندي كمان مصنع من أهم المصانع اللي في العالم المتخصصة في الفيتنس والتغذية السليمة، وكأني ماشي على نفس خطوات المنافسة القديمة بس في مجال تاني.
