نادية الجندي لـ اليوم السابع: لا ألتفت للصغائر.. ويا جبل ما يهزك ريح

عبرت نجمة الجماهير نادية الجندي عن سعادتها بتكريمها فى حفل افتتاح مهرجان القاهرة للسينما الفرنكوفونية، وقالت فى تصريحات خاصة لـ"اليوم السابع"، "بعد كل نجاح طبعاً بواجه بتحديات.. أنا مش عايزة أقول تحديات، طبعاً أنا لا أبالي خالص بالانتقادات الملفقة، أنا ماشية في طريقي ومحمية من ربنا ومن جمهوري ومن حب الناس ليا".

وأضافت نادية الجندي ، "أنا لا أتلفت أبداً للصغائر دي ولا بتهمني ولا بحاول حتى إني أشوفها! لأن زي ما بيقولوا إيه في المثل.. "يا جبل ما يهزك ريح"، يعني في ناس بيقولوا لي، ليه بيعملوا كده؟ قلت لهم الفشل وحش، ربنا يكفينا شر الفشل. والناجح دايماً زي الشجرة المثمرة هي اللي تلقى بالحجارة، ومفيش حد بيحارب حد فاشل".

نادية الجندي

النجمة نادية الجندي

الفنانة نادية الجندي

نادية الجندي

وأكملت نادية الجندي، "الحروب اللي في الخفاء اللي على السوشيال ميديا دي بقت مملة وكترت أوي، وبقت ظاهرة فجة بشكل.. صفحات بتتباع دلوقتي، ومخططات بتحاك في الضلمة، وحاجات كده.. فالمهم أنا فرحانة بنجاحي جداً وبالتقدير وبالجوايز وبالتكريم، وأتمنى من ربنا إنه يديم عليا ده إن شاء الله بإذن الله وأبقى دايماً عند حسن ظن جمهوري، والنقاد الشرفاء، والصحافة اللي اهتمت بيا بصراحة كانت ملحمة حب وشوفت حب أسعدني بطريقة من كل الناس؛ المقيمين على المهرجان، السفراء، النقاد، الإعلاميين، الصحفيين".