فيسبوك
واتساب
أعدت وزارة التربية والتعليم والتعليم الفني ، فيلما تسجيليا قصيرا بمناسبة يوم المعلم العالمى والاحتفال بانتصارات أكتوبر المجيدة، احتفاء بكل معلم زرع في وجدان الأجيال المتعاقبة شرف الإنتماء وعهد الوفاء للوطن.
وقال الوزارة فى فيديو بثته عبر صفحتها الرسمية بفيس بوك نحتفى بكل معلم زرع في وجدان الأجيال المتعاقبة شرف الإنتماء وعهد الوفاء للوطن، متابعة: الحكاية بدأت من معلم ومعلمة بيعلموا ولادهم قيمة بلدهم وقيمة قواتهم المسلحة اللي بتحميهم ، وبيحكوا لهم مصر كانت ايه وعدت بإيه وازاي فضلت واقفة كل السنين دى.
وأضافت الوزارة: معلم عرف الطلاب خريطة مصر وخلاهم يفهموا أن كل مكان عليها فيه ناس وبيوت وحياة ، وإن الأرض دي أمانة وفى يوم من الأيام هيكونوا هم المسئولين عنها، كان المعلم بيعلمهم يحبوا بلدهم عن معرفة ، ويعرفوا قيمتها ويفهموا ليه لازم يحافظوا عليها ، وفي كل حصة بيديهم حاجة تكمل معاهم ، علم يفهموا بيه وعقل يفكروا بيه وإيمان بإنهم يقدروا يعملوا حاجة لبلدهم.
وذكرت الوزارة: المدرس اللي كان واقف قدام طفل لم يكن يعرف الطفل ده هيكون مين لكن كان بيعده لليوم اللي مصر تحتاجه فيه ولما اليوم ده جه كان التلميذ كبر ، واللي أتعلم تاريخ مصر في الفصل بقى واقف في لحظة هيكتب فيها صفحة جديدة من تاريخها من مقاتل على الجبهة لمهندس بيحسب وبيجهز لطيار عارف مهمته ، لعالم بيبحث وبيفكر وبيطور ، وخلف كل بداية كان فيه مدرس.
حرب أكتوبر المجيدة لم تكن مجرد معركة عادية كانت معركة اجتمع فيها العلم
وقالت الوزارة : حرب أكتوبر المجيدة لم تكن مجرد معركة عادية كانت معركة اجتمع فيها العلم والتخطيط والشجاعة والانتماء ، والمدرس اللي وقف زمان يشرح الدرس كان له نصيب في صناعة الجيل اللي عمل كل ده ولحد النهاردة لسة المدرس بيقاتل بالعلم وبالوعي وبالهوية المصرية اللي بيزرعها داخل الفصل ، لان الطالب اللي قاعد قدامه النهاردة هو اللي هيكمل حكاية مصر غدا.
تحية وفاء لأرواح اللي علموا أبطالنا أول معنى للوطن ، وتحية إجلال لمدرسين النهاردة اللي بيزرعوا في القلوب حب الأرض وفي الوجدان شرف الانتماء وفي الأجيال عهد الوفاء للوطن.
