لم تفكر للحظة واحدة أن مساعدتها للغير مقتصره على ديانة معينة، فكل ما تفكر فيه هو الإنسان ومساعدة الجميع سواء كان مسلم أو مسيحى، ولمدة 10 سنوات، شاركت منال نبيه في موائد الرحمن في شهر رمضان، رغم إنها قبطية ولكن تؤمن بمقولة واحدة، "كلنا إنسان ولا فرق بين مسلم ومسيحى".
منال هي الوحيدة القبطية في جروب كبير من الشباب المتطوعين لإعداد وجبات رمضان، واعتادت على مساعدة المحتاجين طوال شهر رمضان سواء كان تحضير شنط غذائية للمحتاجين أو توزيع وجبات للصائمين ، وعن حكاية منال وتطوعها مع شباب الخير، قالت" أنا من شبرا ومولودة ومتربية فيها عشان كدا اتعلمت يعنى إيه مفيش فرق بين مسلم ومسيحى.. احنا بنحتفل بكل الأعياد مع بعض سواء "رمضان، عيد الأضحى، عيد الفطر، عيد القيامة".
وأضافت" انا مع جروب الخير بقالى 10 سنين بنعمل حاجات خيرية كتير، وكل رمضان بنعمل المائدة انا الوحيدة المسيحية اللى فيهم لكن ده بيفرحهم جدا وبيفرحنى أنا كمان انى بساعد في إفطار الصائمين، أصحابى دايما يطلبوا منى أدوق الأكل لأنى مبكونش صايمة زيهم".
وتابعت" اللى مسئول عن تحضير الوجبات للمحتاجين والترتيبات هو أدهم ماهر، و كل واحد هنا في المائدة ليه دور فينا اللى مسئول عن تعبئة الأرز، واللى مسئول عن العصائر والحلويات وتعبئة الشنط، كلنا بنعمل الحاجة بمحبة ورضا وعمرنا ما كنا متضايقين أو تعبانين من أي حاجة بنعملها".
وأنهت حديثها "أنا بخدم في الكنيسة على طول وبطلع منها على اصدقائى المسلمين لتحضير الوجبات للصائمين، وبالنسبة للتطوع انا مش بفرق بين مسيحى أو مسلم كلنا إنسان الكتاب المقدس الإنجيل علمنى المحبة، وإن كلنا نساعد أى حد محتاج ويكون فيه بينا تعاون ومحبة، في رمضان كمان فيه مسيحيين بياخدوا وجبات ".
تم أضافة تعليقك سوف يظهر بعد المراجعة