عمرو أديب: جامعة إنجليزية أعلنت إنتاج علاج نهائى لكورونا فى سبتمبر المقبل

أكد الإعلامي عمرو أديب، أن إحدى الجامعات البريطانية أعلنت أنه سيجرى إنتاج لقاح في سبتمبر المقبل قادر على تدمير فيروس كورونا المستجد، وقال: "الناس دي لو بتتكلم بجد يبقى ربنا نجدنا لأن العالم هيشوف أيام حلوة الفترة الجاية، الناس دي بتتكلم على دواء بيعالج على طول الفيروس مش بروتوكول دواء زي ما كل وزارات الصحة في العالم بتعمل علشان تخفف من حدة أعراض الفيروس على المصابين اللي حالتهم متأخرة".

وأضاف عمرو أديب، خلال برنامج "الحكاية": "ترامب وعمدة نيويورك والولايات المتحدة الأمريكية كلها بتدور على أجهزة تنفس صناعي، الجهاز ده دلوقتي بقى عملة نادرة مش موجودة كتير في العالم، ومفيش دولة تقدر تصدر دلوقتي إلا بالعافية، علشان كده المفروض نحافظ على الأجهزة المتاحة لأنها هتكون جاهزة لإنقاذ ناس من موت محقق".

وقال عمرو أديب: "إنجلترا حاليا حولت عدد كبير جدا من مصانعها اللي كانت بتصنع أجهزة كهربائية إلى مصانع أجهزة تنفس صناعي، لأن الموضوع دلوقتي بقى مهم أوي، دي دلوقتي زي الطائرة والدبابة في الحرب، من غيرها الناس هتموت".