عمرو أديب: "احترموا الطواقم الطبية وقدروهم لأن قصة كورونا مطولة معانا"

تحدث الإعلامي عمرو أديب، عن مرور 100 يوم من جائحة فيروس كورونا على العالم، وقال: "بعد مرور 100 يوم من الجائحة تنظر حولك وتقول إيه، لازم تبوس إيدك وش وضهر إن عندك نظام صحي ماسك نفسه وواقف على رجله، الطواقم الطبية دي فخر مصر، البلد دي دفعت من جيبها علشان تربي الشباب اللي زي الورد اللي شايلين البلد على كتافهم دلوقتي، انهاردة تيجي تتكلم على علاجك، هتلاقي أحسن بروتوكول علاج، مصر باصة على العالم كله وبتعرف إيه اللي بيحصل فيه".

وأضاف عمرو أديب، خلال برنامج "الحكاية" الذي يذاع على قناة mbc مصر: "أنا شوفت إمبارح مودل أو نموذج تجريبي لمصر، يتحدثون عن أن آخر مايو وبداية يونيو سيشهد الفيروس تحولاً مرعبًا في مصر، ومعنديش أي تفسير لعدم ارتفاع حالات إصابات كورونا إلا أن ربنا ساترها معانا عشان الناس اللى بتتعب دي، أرجوكم تعظيم سلام واحترام واهتمام وابتسام وتقديم كل خير للطواقيم الطبية المحترمة دي".

وقال عمرو أديب: "الناس دي تدلع الدلع الكبير، لأن والله لسة المشوار طويل، الموضوع ده مش يوم والتاني ورمضان والكلام ده، لا الموضوع مطول يا جماعة، من جد وجد ومن زرع حصد، قدم السبت للناس دي، وأرجوكم التزموا بوسائل الوقاية".