قُدمت أعمال الشاعر الكبير سيد حجاب لعدد من المسلسلات ذائعة الصيت مثل أربيسك وليالى الحلمية وبوابة الحلوانى والمال والبنون والوسية وغيرها من الأعمال الفنية التى غناها كبار المغنين كـ على الحجار ومحمد الحلو وحنان ماضى ومدحت صالح وأنغام.
ليالى الحلمية
ومنين بيجي الشجن .. من اختلاف الزمن
ومنين بيجي الهوى .. من ائتلاف الهوى
ومنين بيجي السواد .. من الطمع والعناد
ومنين بيجي الرضا .. من الايمان بالقضا
بوابة الحلوانى
اللى بنى بنى مصر كان فى الأصل حلوانى
وعشان كده مصر يا ولاد مصر ياولاد حلوة الحلوات
وادى وبوادى و بحور و قصور و موانى توحيد وفكر وصلاة
تراتيل غنا وابتهالات
وكل ده فى مصر يا ولاد مصر ياولاد حلوة الحلوات
العائلة:
حِلَي ضفايرك ضُليلة
ولملمينا يا أصيلة
عُشاق تُرابك أحبابِك
وكلنا أهل وعيلة
احنا اللي يوم الفِدا رُحنا
نفديكي ونضحي برُوحنا
وضحكنا حتى على جُروحنا
ضِحكتنا هوْنِت الشيلة
الوسية
جينا الحياة زى النبات.. أبرياء
لا رضعنا كدب.. ولا اتفطمنا برياء
طب ليه رمانا السيف على الزيف؟!.. وكيف..
نواجهه غير بالصدق والكبرياء؟!
عيش يا ابن آدم بكر زى الشجر
موت وانت واقف –زيه- فى مطرحك
ولا تنحنى لمخلوق.. بشر.. أو حجر
وشِبّ فوق.. مهما الزمان طوَّحَك
مسلسل الحقيقة والسراب :
دنيا.. وناس.. فى التوهة متبعترة
أحلى ما فى الدنيا دى إيه يا ترى؟!!
حاجات كتيرة.. كبيرة.. وصغيّرة:
شمس.. وقمر.. ونجوم.. وميه.. وهوا
وقلوب تدوب ما تتوب فى ليل الهوى
وعيون تضم الكون.. وتحلم سوا
حاجات لا هى بتنباع ولا بتنشرا
****
اللى تقول ان الحياه جاه ومال
حاسب لا تبنى قصور رمال.. ع الرمال
ايه يفيد المال.. إذا الدهر مال
اللى خسر روحه.. وطغى وافترى
أميـــــــرة فى عابدين :
مين اللى قال مكتوب علينا الهوان...لا الدنيا سيرك ولا الزمان بهلوان
شي الله يا طاهرة يا رئيسة الديوان...آن الأوان نبقى احنا آن الأوان
وآديكوا يا ولاد الأصول شاهدين...وآدى" أميرة" أميرة فى عابدين
ياللى الزمن خدكم لفوق فى صعود...ورجع وخان أحلام كبيرة ووعود
عودوا لأصولكم ياللا للأصل عود...ده اللى يمد جدوره يشتد عوده
حكمة وقالوها جدودكم الخالدين...وآدى "أميرة" أميرة فى عابدين
يا هل ترى يا نور يا بعيد...انت بصحيح ولا انت سراب
وهاعيش معاك فى الضى سعيد...ولا غريب ما بين أغراب
تم أضافة تعليقك سوف يظهر بعد المراجعة