تسلم لزعازيعك يا كبير
يا محوّل الكُرّات جرجير
يا مسيّط الشعر وناسه
ومفلسف الفول فى التحرير
شلّوت جنابك دفّايه
يا أبو كفّ ونسان بقفايه
بكره نلاقيك نازل آيه
بتحضّ ع البيض فى التنوير
تسلم لأتباعك مرسَى
وارث عن الخلق الوارثه
وتملّى تختمها بكارثه
وعشان "نُقَط" تترقى وزير
وتعيش لناسك علامه
تنويرى زى حاجات يامه
بطيخه صبحت شمّامه
ورايات بتتحوّل بشاكير
تسلم يا زعزوع يا مزعزع
يا مقسّم الخوف وموزّع
خبّط على ضهورنا ورَزّع
وافرح بسلْطنة الطراطير
يحيا المبهلل والبهاليل
والبهلله وبَلّ المباليل
منديل وبيسلّم منديل
وعويل وِزير بيكب ف زير
علّمتنا ندوس على المضامين
وعملت م الصلصال "طواسين"
وفردت جهلك ع البطاطين
وفشختنا بمعنى "التبئير"
تسلم لناسك عيش ودقيق
..... فاهم وتعليقه بتعاليق
وخازوق مخوزق فى الخوازيق
إذا خوزقوا الناس بالمسامير
الافتكاس له أجناسه
والانتكاس له أنجاسه
والكلب له نابه وراسه
ونياب جنابك "بشرة خير"
تسلم لزعازيعك يا كبير
يا محوّل الكُرّات جرجير
يا مسيّط الشعر وناسه
ومفلسف الفول فى التحرير
الشاعر سعيد شحاتة
لا توجد تعليقات على الخبر
تم أضافة تعليقك سوف يظهر بعد المراجعة