لبلبة: عادل إمام كان زى التلميذ وهو بيذاكر الدور وكنت بحس بيه من مشيته

استرجعت النجمة الكبيرة لبلبة ذكرياتها أثناء تصوير عدد من الأعمال الفنية مع الزعيم عادل إمام، وذلك بالتزامن مع الاحتفال بعيد ميلاده، حيث تحدثت عن أهم الكواليس التي جمعتهما، وقالت لبلبة خلال مداخلة هاتفية لتليفزيون اليوم السابع: "الكواليس والشغل معاه كله مدروس لكن من كتر ما أنا بحس بيه.. هو كان بيحب دايما يشتغل في أستوديو نحاس، والأوضة بتاعته هي نفس الأوضة، وأنا نفس الأوضة اللى جنبيه على طول.. ولما كنت بعمل ماكياج أسيب الباب بتاع غرفتى مفتوح.. ولما كان يطلع من غرفته في الأستوديو ويخطو خطوته أحس بيه، أقول هو النهاردة مبسوط.. النهاردة هو فيه شيء شاغله.. النهاردة هو بيفكر في حاجة".

وأضافت لبلبة خلال مداخلتها لتليفزيون اليوم السابع قائلة: "ولحد ما يعدى على أوضتى ويصبح عليا.. ويجيبوله القهوة بتاعته يشربها.. وكان زى التلميذ فى مذاكرته للدور.. دايما في إيده الورق اللى هيقول منه"، وكنت بحس بيه لإن هو عشرة طويلة ولما كنت بمثل قدامه كنت بحس من عينيه إن الكلام مش هيخلص هنا، ولسة عنده كلام هيقوله.. هيرتجل.. وأنا من عينيه بحس وعينى تكون على عينيه وبوقه".

أعمال جمعت لبلبة بالزعيم عادل إمام

ومن المعروف أن النجمة الكبيرة لبلبة قدمت دويتو مهم ومميز مع الزعيم عادل إمام سواء في السينما أو الدراما التليفزيونية منها أفلام "خلى بالك من جيرانك"، و"البعض يذهب للمأذون مرتين"، و"احترس من الخط"و"عصابة حمادة وتوتو"، و"عريس من جهة أمنية"، وغيرها وفى الدراما التليفزيونية قدمت معه مسلسلى "صاحب السعادة"و"مأمون وشركاه".