فيسبوك
واتساب
أثارت واقعة منع 3 رجال صعايدة من دخول عرض فيلم أسد بإحدى دور العرض حالة واسعة من الجدل والغضب، بعد انتشار مقطع فيديو لهم وهم يرتدون الجلابية الصعيدي، ويعبرون عن استيائهم من منعهم من دخول الفيلم بسبب ارتداء الجلباب الصعيدي.
تعليق المخرج محمد دياب على الواقعة
وأعرب المخرج محمد دياب عن غضبه واستيائه الشديد من هذا الأمر، حيث نشر فيديو عبر حسابه الخاص على "فيس بوك"، قال خلاله: "الواحد متضايق بجد إنه إزاي مواطنين مصريين لابسين جلابية يتمنعوا من دخول قاعة سينما في فندق تحت أي مسمى، إحنا كنا محظوظين إن فيه ناس مصريين عاديين شبه الشارع فيلم أسد جذبهم وإنهم يدخلوا الفيلم، ودي ظاهرة إن الفيلم يوصل لناس مش بس بتوع المولات، فدي حاجة إحنا كصناع فيلم المفروض نكون فخورين بيها".
وأشار إلى أن أصحاب السينما أو المديرين يمنعوهم من الدخول بناء على نوع الجلابية، خليجي ولا مصري، دي حاجة مؤسفة، تخيل إن إنسان يتعنصر عليه داخل بلده، وفيلم أسد أصلًا كله ضد العنصرية، والمفارقة إن ناس تتعنصر عليها جوه بلدها وهي داخلة تتفرج على فيلم ضد العنصرية، ولو الغلطة دي غلطة صناع فيلم أسد أنا كنت أعتذرت".
وأضاف محمد دياب: "اللي أقدر أقوله إن أنا شخصيًا هلبس جلابية وهعزم المواطنين المحترمين اللي بشكرهم إنهم راحوا بنفسهم، وبعتذر ليهم كمواطن مصري، لأن اللي حصل جريمة، وبيتكرر طول الوقت لما بنشوف مصريين بيتعرضوا للعنصرية داخل بلدهم، وأظن إننا محتاجين وزير السياحة يراجع موضوع زي ده، ووزير الثقافة كمان".
محمد رمضان للصعايدة: لو مشالتكومش الأرض أشيلكم فوق راسي
علق الفنان محمد رمضان على الواقعة، ووجه لهم اعتذار رسمي عما حدث في حقهم، مشيرا إلى أنه من حق أي شخص دخول السينما وأي مكان، وطالب وزيرة الثقافة بضرورة الاعتذار لهم ولكل الصعايدة.
وقال محمد رمضان، في منشور على حسابه الرسمي بموقع تبادل الصور والفيديوهات إنستجرام: "شرف ليا وللصناع دخولكم فيلم أسد ولو مشالتكمش الأرض أشيلكم فوق راسي، وواثق في معالي وزير الثقافة باعتذار رسمي لكل الصعايدة ده أبسط حقوق الشعب، السينما للجميع".
كما نشر محمد رمضان فيديو قال خلاله: "3 صعايدة داخلين فيلم أسد إمبارح فيمنعوهم عشان لابسين جلابية صعيدي، فيهم واحد في سن والدي، طيب ياللي منعتهم، قلبك وعقلك فين، أصلك إيه؟ أمك روسية مثلًا ولا جدك تركي، عايز أفهم أنت منين، إزاي يهون عليك تروحهم مكسورين الخاطر كده، قانون إيه اللي حطاه السينما ده".
رواد مواقع التواصل الاجتماعي باحثين عن التريند ودعايا للفيلم
تعاطف عدد من رواد مواقع التواصل الاجتماعي مع الثلاثة أشخاص اللذين تم منعهم، مؤكدين أنه من حق أي مواطن دخول السينما حتى لو بالجلباب الصعيدي، والبعض رأى أن هؤلاء الأشخاص يبحثون عن التريند وربما يعلمون بأن دخول السينمات لا يصلح بالجلباب، ولكنهم فعلوا ذلك من أجل التريند، والبعض رأى أن الأمر متعلق بالدعاية أكتر من جانب صناع الفيلم للترويج له أو أنهم استغلوا الموقف للترويج للعمل.
