نيبو وأرض الفراعنة.. عمود الانتصار

وقفت نيبو أمام عمود ضخم يرتفع كأنه يخترق سقف القاعة

كرم رافع راسه:
إيه ده؟!
ده عمود ولا جبل؟!
منصور بفخر:
ده مش أى عمود
ده عمود الملك مرنبتاح.
كرم:
مرنبتاح؟
أيوه ده اللى قولت عليه المرة اللى فاتت؟
منصور:
بالظبط
رابع ملوك الأسرة التاسعة عشرة
وابن الملك العظيم رمسيس الثانى.
نيبو اقتربت من النقوش
وكأنها تقرأ ما كتب قبل ثلاثة آلاف عام.
منصور:
العمود ده اتلاقى سنة 1970
فى مدينة أون القديمة
اللى اسمها دلوقتى عرب الحصن بالمطرية.
كرم:
هو ضخم أوى كده ليه؟
منصور:
لأنه معمول علشان يخلد نصر كبير
ارتفاع العمود حوالى 5 متر ونص
ووزنه يقرب من 17 طن
كرم مندهش:
17 طن؟!
إزاى كانوا بيرفعوه؟
منصور مبتسم:
ده سر عبقرية المصريين القدماء.
اقترب منصور وكرم ونيبو أكثر من النقوش
منصور بصوت جاد:
النقوش دى بتحكى عن حرب حصلت فى السنة الخامسة من حكم مرنبتاح
حوالى سنة 1208 قبل الميلاد.
كرم:
كان بيحارب مين؟
منصور:
معتدين حاولوا يهاجموا حدود مصر
نيبو ثبتت نظرها على مشهد محفور
منصور:
بص هنا
الملك بيتسلم صولجان الحرب من المعبودة عنات
وسيف النصر من الآلهة:
آمون، رع حور آختى، ست، مونتو، سخمت.
كرم لاحظ مشهد صغير أسفل العمود
كرم:
الناس دى مربوطين ليه؟
منصور:
دول أسرى الحرب
وفى سجل صغير جنبهم فيه ملخص المعركة
وقائمة بالغنائم
كرم:
يعنى العمود ده مش بس حجر
ده قصة كاملة!
منصور:
بالظبط.
نيبو جلست بهدوء أمام العمود
منصور:
مرنبتاح حكم حوالى عشر سنين
وكان خير خلف لخير سلف
ابن رمسيس الثانى
وحفيد سيتى الأول
وسليل رمسيس الأول
سلالة لا تهتم إلا بمجد مصر
ساد صمت لحظة
ثم فجأة.. نيبو تحركت
وقفت أمام الباب الرئيسى للمتحف
ونظرت إلى الخارج
كرم:
رايحة فين يا نيبو؟
منصور ابتسم ابتسامة مختلفة.
كرم:
إيه؟
منصور:
واضح إن رحلتنا الجاية
مش هنا.
كرم:
أومال فين؟
منصور بصوت خافت:
فى متحف تانى
فى قلب القاهرة
كرم:
متحف إيه؟
منصور:
المتحف المصرى بالتحرير.
كرم:
وهنشوف إيه هناك؟
منصور اقترب قليلا وخفض صوته.
منصور:
تمثال وقطع أثرية مذهلة
كرم:
بجد؟
منصور:
طبعا ده متحف مليان كنوز وكل كنز بيحكى سر خطير
كرم مندهش:
سر خطير؟!
منصور:
آه
نيبو نظرت إليهما
وعيناها تلمعان
كرم:
قولى طيب سر واحد لحد ما نروح
منصور:
المرة اللى جاية هتعرف.