آيات أباظة بعد تعافيها من السرطان: اليقين بالله والرضا وراء شفائى

كشفت الإعلامية آيات أباظة مقدمة برنامج مساء الفن عن عودتها لشاشة التليفزيون المصرى من جديد لتعود إلى الهواء مرة أخرى بدءًا غد الأربعاء، بعد توقف عامين، لمعاناتها الشديدة مع مرض السرطان، معربة عن سعادتها الشديدة بتمثالها للشفاء التام بفضل اليقين بالله ودعوات المحبين لها.

وقالت أباظة في مداخلة هاتفية لتليفزيون اليوم السابع: "نفسى أدى أمل لناس كتير أوى اليقين بربنا وحب الناس والدعاء بتاع الناس.. دى أكتر حاجة كانت مخليانى ممكن أخف وكمان فيه حاجة عايزة أقولها.. لما كانوا يقولوا النفسية النفسية.. أقول نفسية إيه واحد عنده مرض صعب زى ده.. هيفكر فى النفسية.. وفعلا طلعت حاجة مهمة جدا جدا.. اليوم اللى كنت أصحى فيه نفسيتى حلوة ببقى مش حاسة بحاجة.. واليوم اللى بكون مكتئبة فيه ببقى حاسة بآلام وبكون تعبانة.. فبجد عايزة أقول لكل الناس حاول تنسى إنك عيان حاول تنسى المرض ماتفكرش فيه.. أنا عارفة إن ده بيبقى صعب، بس فيه أوقات كتير أوى لو ده حصل بتفرق مع الواحد جدا جدا".

وأضافت أباظة لتيلفزيون اليوم السابع قائلة: "عايزك أقولك كمان الرضا ده مهم جدا أوى.. وإنك تتعامل بمبدأ الرضا وإن أى حاجة ربنا يجيبها تحمده وتشكره عليها.. وبعدين الواحد فى الحالات دى بيعرف قيمة النعم بتاعت ربنا.. النفس ده لوحده نعمة".

يذكر أن الإعلامية آيات أباظة هي زوجة الكاتب والسيناريست عمرو محمود ياسين، نجل الفنان الكبير الراحل محمود ياسين والفنانة الكبيرة شهيرة، ووالدة الممثل الشاب محمود ياسين جونيور.