فيسبوك
واتساب
في الوقت اللي ناس كتير كانت متخوفة من مصير الجنيه المصري بعد التحديات اللي مر بيها الاقتصاد الفترة اللي فاتت، خرج بنك الاستثمار العالمي "غولدمان ساكس" بتقرير جديد فيه نظرة مختلفة تمامًا. التقرير بيقول إن الجنيه المصري حاليًا مقوم بأقل من قيمته الحقيقية بحوالي 30%، يعني ببساطة سعره المفروض يكون أعلى من كده في السوق، ولو استمرت المعطيات دي على حالها، ممكن نشوف تحسن تدريجي للجنيه قدام الدولار خلال الفترة الجاية.
ايه اللي خلى البنك العالمي يقول كده؟
فيه اكتر من سبب خلاهم ياخدوا النظرة دي زى :
•اولا، التدفقات الاستثمارية الاجنبية اللي رجعت تدخل السوق المصري من تاني بشكل ملحوظ
•ثانيا، تحسن المؤشرات النقدية اللي بقت اكثر استقرارًا من بداية 2024، خاصة بعد التعويم اللي حصل في مارس
•ثالثا، الفرق بين السعر الرسمي للدولار وسعر السوق الموازية اختفى تقريبًا، وده معناه إن السياسات النقدية اللي البنك المركزي اشتغل عليها بدأت تؤتي ثمارها، على الاقل من ناحية ثقة المستثمرين
طيب وضع الجنيه النهاردة ايه ؟
النهاردة الجنيه بيتحرك في نطاق ضيق قدام الدولار، وفي البنوك سعره حوالين 49.35 – 49.50 جنيه، ودي اشارة لاستقرار نسبي مقارنة بالشهور اللي فاتت. الاهم إن القطاع المصرفي سجل طفرة كبيرة صافي الاصول الاجنبية اللي كانت في عجز حوالي 17.6 مليار دولار بداية 2023، اتحولت لفائض 4.8 مليار دولار في مايو اللي فات. وده بيدي راحة للاسواق إن فيه دعم نقدي قوي
طيب المواطن العادي يهمه ايه فى الكلام ده؟
لو التوقعات دي اتحققت، ده ممكن ينعكس على
- استقرار الاسعار تدريجيا لو استمر تدفق العملة الصعبة وقل الضغط على الدولار.
- زيادة الثقة في السوق المصري من المستثمرين الاجانب والمحليين، وده معناه فرص اكبر لنمو اقتصادي
- هدوء نسبي في التضخم لو السياسة النقدية فضلت تمشي على نفس النهج الحالي
بس لازم نفهم إن كل ده مرتبط إننا نحافظ على نفس المؤشرات الايجابية، وإن الدولة تكمل اصلاحاتها المالية والنقدية بنفس الجدية اللي شفناها الفترة اللي فاتت
طيب غولدمان ساكس نصح بايه فى التقرير؟
البنك شايف إن المستثمرين اللي معاهم دولارات ممكن يبيعوها قدام الجنيه بهدف تحقيق عائد 5%، وحاطين حد للخسارة عند 2.5%. وده بيعكس إن عندهم ثقة إن الجنيه لسه قدامه مجال للصعود لو الظروف فضلت ايجابية
