فيسبوك
واتساب
أوضح الدكتور محمد المهدي، أستاذ الطب النفسي بجامعة الأزهر، أنه من أهم أسباب القلق وضعف التركيز عند الطلاب في فترة الامتحانات هو قلة النوم والسهر المفرط، واستخدام وسائل التواصل الاجتماعي بشكل مفرط، مؤكداً أن هذه العوامل تؤدي إلى إنهاك الجهاز العصبي وتدهور أداء الذاكرة.
وقال الدكتور المهدي، خلال حلقة برنامج "راحة نفسية"، المذاع على قناة الناس، اليوم الأربعاء: "الطالب اللي بيطبق ليلة الامتحان ظناً منه إنه بيذاكر كويس بيضر نفسه جداً، لأن المعلومات لا تتحول إلى الذاكرة طويلة المدى إلا أثناء النوم، فلو مانمتش، كل اللي قريته بيضيع".
وأضاف: "كثيراً من الطلبة يخلطون بين الراحة الحقيقية وبين استخدام الهاتف، الراحة مش إنك تقعد على الموبايل، دي مش راحة، دي إرهاق للجهاز العصبي، الراحة الحقيقية هي إنك تسترخي وتدخل في نوم بسيط أو تهدأ، مش تتصفح السوشيال ميديا".
وأوضح: "بعض الشخصيات بطبيعتها تكون أكثر عرضة للقلق، في شخصيات تجنبية وموسوسة، عندهم قلق مزمن حتى من غير سبب، مخهم حساس، والجهاز العصبي عندهم دايماً في حالة استنفار، وده بيخليهم يتوتروا من أي حاجة جديدة".
وتابع: "نظم وقتك، نام كويس، ابعد عن السوشيال ميديا، وادخل الامتحان وانت هادي.. القلق لو زاد عن حده هيعطلك، ومفيش حاجه تستاهل إنك تضيع مجهود سنة بسبب توتر مش مبرر".
