فيسبوك
واتساب
يا جماعة، اللي بيحصل دلوقتي في مصر في مجال التكنولوجيا مش طبيعي، إحنا قدام مبادرة قوية جدا من وزارة الاتصالات، اسمها "الرواد الرقميون"، واللي ممكن تغير مستقبل أي شاب أو بنت بيحلم يكون ليه مكان في عالم التكنولوجيا من غير ما يكون خريج هندسة ولا علوم حاسب!
أول حاجة لازم تبقى عارفها إن قطاع الاتصالات بقى أسرع قطاع نمو في البلد. وده طبيعي، لأن كل حاجة حوالينا بقت بتعتمد على التكنولوجيا، من أول الحكومة لحد أصغر مشروع.
المبادرة المرة ديه لكل الناس مش محصورة على حد معين ولا المندسين بس، بالعكس، كل التخصصات ينفع تقدم، حتى لو انت خريج أداب أو تجارة أو حتى لو شغال شغل مش تقني خالص… المهم إنك تكون عايز تبدأ.
المبادرة اسمها "الرواد الرقميون" ومفتوحة لأي شاب أو بنت مصرية عنده حلم يشتغل في مجال زي الذكاء الاصطناعي، أو الأمن السيبراني، أو تحليل البيانات، أو البرمجة… أي تخصص تكنولوجي تتخيله.
قبل ما تبدأ، هتدخل اختبار بسيط مش عشان يقبلك او يرفضك، لا بالعكس، ده عشان يحدد مستواك ويبدأ معاك من أول نقطة مناسبة ليك، حتى لو عمرك ما اشتغلت على كمبيوتر قبل كده!
البرنامج مش بس تقني، لأ كمان بيعلمك إنجليزي، مهارات شخصية، قيادة، شغل جماعي، وكمان إزاي تشتغل عن بُعد… يعني إعداد كامل لسوق العمل.
وبعد ما تخلص التدريب، تقدر تشتغل من بيتك أو أي مكان، وتقدم خدماتك على الإنترنت للسوق المصري والعالمي من غير ما تسافر ولا تأجر حتى مكتب.
طيب لو نفسك تعمل شركة؟ برضه ليك مكان
لو عندك فكر ريادي، هيعلموك ريادة الأعمال، إزاي تبدأ مشروعك، إزاي تدير شركة، وهيوفروا ليك دعم كمان علشان تبدأ شركتك الناشئة.
طيب ايه المسارات المتاحة فى المبادرة؟
المبادرة فيها 4 طرق تقدر تختار اللي يناسب وقتك وقدرتك:
• دبلومة مكثفة: 4 شهور
• دبلومة متخصصة: 9 شهور
• ماجستير مهني: سنة
• ماجستير علوم: سنتين
طيب لو انت من محافظة تانية غير القاهره ؟
ما تشيلش هم، لو انت من محافظة تانية، المبادرة موفرة ليك إقامة كاملة ببلاش طول مدة التدريب، علشان تقدر تركز وتتفرغ تماما.
طيب بالنسبة للتكلفة ؟
المبادرة مجانية بالكامل!
الدولة ممثلة فى وزارة الاتصالات وصندوق تحيا مصر هما اللي بيمولوا، بـ 3 مليار جنيه لإنشاء مراكز التدريب ولاول سنة، ومليار جنيه سنويا لتشغيلها… يعني مفيش أي مصاريف عليك.
طيب بالنسبة لطريقة التقديم؟
التقديم بيكون من خلال الموقع الرسمي لمبادرة "الرواد الرقميون" التابع لوزارة الاتصالات وتكنولوجيا المعلومات.
وحاليا، المرحلة التالتة خلصت، وهيتم فتح باب التقديم للمرحلة الرابعة
علشان كده، تابع الموقع ده أول بأول، وخليك جاهز
لأن أول ما التقديم يفتح، هتحتاج تسجل بياناتك، تختار التخصص اللي عايز تدرسه، وتدخل اختبار تحديد مستوى خفيف كده عشان يحددوا تبدأ منين بالظبط.
فاللى عايز اقولهولك ان دي مش مجرد مبادرة، دي فرصة حقيقية لأي حد عايز يغير مستقبله، يبني كارير محترم، ويشتغل في مجال مطلوب محليا وعالميا.
