مع كل مشروع جديد، مصر بتقرب خطوة من تحقيق رؤيتها الاقتصادية 2030، وقرار إنشاء ميناء طابا البحري دليل على ده. الميناء هيكون مش بس منفذ بحري، لكنه جزء من شبكة نقل متكاملة هتربط البحرين الأحمر والمتوسط، وهتخلي سيناء مركز لوجيستي مهم للتجارة الإقليمية.
إيه اللي حصل؟
الجريدة الرسمية نشرت قرار جمهوري رقم 35 لسنة 2025، والقرار ده بيقول إن الدولة قررت تخصص 52.5 فدان في جنوب سيناء لصالح الهيئة العامة لموانئ البحر الأحمر عشان إقامة ميناء طابا البحري.
طب هو كان فيه ميناء في طابا أصلا؟
آه، كان فيه حاجتين:
1- ميناء طابا البحري القديم (مارينا طابا هايتس): وده كان عبارة عن مرسى سياحي (مارينا) بيخدم اليخوت والرحلات البحرية من وإلى العقبة في الأردن.
2- ميناء طابا البري: وده منفذ حدودي بري بين مصر وفلسطين والأردن، بيتم فيه العبور للمسافرين بين الدول دي.
لكن الدولة المصرية دلوقتي وفقا لروئية 2030 عايزة تعمل ميناء جديد بقدرات أكبر وأهداف أوسع، بدل ما الموضوع يفضل مجرد مرسى صغير سياحي، وخصوصا إن فيه مشروع أكبر لربط سيناء بالكامل بشبكة نقل حديثة تشمل الموانئ والسكك الحديد.
طيب ليه الدولة قررت تعمل الميناء ده؟
فيه كذا سبب ورا القرار ده زى:
1- دعم السياحة في جنوب سيناء:
* طابا تعتبر نقطة جذب سياحية قوية، ووجود ميناء كبير هيخليها تستقبل رحلات بحرية مباشرة من دول قريبة زي الأردن، السعودية، والخليج بشكل عام.
* الميناء ده هيشجع السياح ييجوا بسهولة من خلال سفن ركاب بدل ما يعتمدوا بس على الطيران أو الطرق البرية.
* تسهيل حركة التجارة والبضائع
بدل ما البضائع تفضل تتنقل بريًا من القاهرة لغاية نويبع ومنها للعقبة، الميناء ده هيختصر الطريق ويوفر وقت وتكلفة على التجار.
يعني ممكن البضايع تتنقل أسرع بين مصر – الأردن – السعودية عبر البحر الأحمر.
* تنمية سيناء واستغلال مواردها
* الدولة بقالها فترة شغالة على تنمية شبه جزيرة سيناء، ووجود ميناء كبير في طابا هيخليها مركز تجاري اقليمى في البحر الأحمر.
* ده جزء من خطة الحكومة إنها تحول سيناء لمنطقة اقتصادية قوية بدل ما تفضل معتمدة بس على السياحة.
* تقليل الضغط على الموانئ التانية
حاليا الموانئ الكبيرة في البحر الأحمر زي ميناء نويبع وميناء شرم الشيخ بتتحمل ضغط كبير.
* وجود ميناء طابا الجديد هيوزع الحركة بشكل أفضل، ويدخل مصادر دخل جديدة للمنطقة.
طيب القرار ده مر بمراحل ولا طلع فجأة؟
لا، القرار ده مبني على مجموعة قرارات وقوانين سابقة، ومر بعملية طويلة عشان يوصل للشكل ده.
* في 2013 كان فيه قرار رقم 612 بيخصص أراضي في طابا للأنشطة السياحية.
* بعد كده في 2024 صدر قرار رقم 15 اللي رجّع بعض الأراضي من الأنشطة السياحية لأملاك الدولة عشان يتم استخدامها في مشاريع تانية، زي الميناء الجديد.
* الحكومة عملت دراسات وتخطيط عن أفضل طريقة لاستخدام الأرض، وبناء على كده، القرار الأخير طلع في 2025 بتخصيص الأرض بشكل رسمي للهيئة العامة لموانئ البحر الأحمر.
طب القرار ده بقى ساري رسمي امتى؟
بمجرد نشره في الجريدة الرسمية يوم 27 يناير 2025، بيتم العمل بيه من اليوم التالي مباشرة، يعني من 28 يناير 2025 الميناء ده رسميا في خطة التنفيذ.
إزاي الميناء ده مرتبط بخطوط السكك الحديد الجديدة؟
- الميناء مش بس هيكون منفذ بحري، لكنه كمان هيكون جزء من شبكة نقل متكاملة مع خطوط السكك الحديدية اللي بتتوسع في سيناء.
على سبيل المثال:
1- "خط سكة حديد الفردان – بئر العبد"
• المسار والتشغيل:
* الخط بيمتد من الفردان (قريب من الإسماعيلية) لحد بئر العبد في شمال سيناء، بطول حوالي 100 كم.
* بدأ التشغيل التجريبي للقطارات عليه في أكتوبر 2024، وده كان أول تشغيل لقطار في سيناء من 51 سنة.
• الأهداف:
* الخط ده جزء من خطة أكبر لربط مناطق الإنتاج في سيناء بالموانئ البحرية، وتسهيل نقل البضائع والركاب.
2- "مشروع خط سكة حديد العريش – طابا"
• المسار:
* المشروع ده بيهدف لربط ميناء العريش بـميناء طابا عبر خط سكة حديد، وده هيكون امتداد لخط الفردان – بئر العبد.
* المسار هيبدأ من ميناء العريش، وبعدين يكمل لحد طابا، مرورا بمنطقة الصناعات الثقيلة في وسط سيناء.
• الأهداف:
* الربط بين البحر المتوسط (ميناء العريش) وخليج العقبة (ميناء طابا) هيعزز حركة التجارة والصناعة والتعدين في سيناء.
* المشروع ده هيكون ممر لوجيستي مهم، بيسهل نقل البضائع من مناطق الإنتاج للموانئ البحرية.
- العلاقة بين ميناء طابا البحري الجديد وخط السكة الحديد:
• الميناء البحري الجديد في طابا هيكون نقطة النهاية لخط السكة الحديد اللي جاي من العريش.
• ده معناه إن البضائع والركاب هيقدروا يتنقلوا بسهولة بين الميناء وخط السكة الحديد، وده هيعزز التكامل بين وسائل النقل البحرية والبرية.
فى النهاية لازم نعي ان قرار إنشاء ميناء طابا البحري مش مجرد مشروع، لكنه بوابة جديدة بتفتحها مصر نحو اقتصاد أقوى ومستقبل أكثر ازدهار.
سيناء اللي كانت زمان مجرد منطقة حدودية، النهارده بتتحول لمركز لوجيستي يربط الشرق بالغرب، ومع تطوير النقل والموانئ، فرص العمل والاستثمار هتزيد، والتنمية هتكون على أرض الواقع. المستقبل بينبني دلوقتي، والمكاسب جاية ان شاء الله
تم أضافة تعليقك سوف يظهر بعد المراجعة