إحنا كمصريين عندنا شوية تعبيرات كده ترد الروح.. مصطلحات وكلمات ماركة صنع فى مصر، الكبير والصغير بيستخدمها فى كلامه كل يوم، ويظن فى نفسه أنه مجرد تعبير شعبى عادى.. بس المفاجأة بقى أنه ما فيش كلمة بتتقال فى مصر بتكون صدفة.
مع شوية بحث وشوية تفكير هتكتشف إن التعبيرات دى ليها أصل فى الدين الإسلامى أو الدين المسيحى، أو من أيام الفراعنة ومع شوية تركيز هتكتشف أنها دايما بتعبر عن حقيقة وواقع بنعيشه يوميا فى شوارع البلد دى.
إحنا بنقول إيه؟!
فجأة كده وأنت بتتكلم مع حد فى موضوع معين أو عن شخص معين.. تلاقى صوتك حن.. وبقيت رقيق ولا رقة عمر الشريف وتقول.. ده ملاك ماشى على الأرض يا أخى؟!
فى مصر فيه ملايكة كتير بتمشى على الأرض، مش مصدقنى؟! .. طيب قبل ما تقول دروشة وجنون.. اسرح بخيالك كده وحط قدامك صورة الدكتور مجدى يعقوب، وفكر فى مشواره، فكر فى صعوده، فكر فى إزاى رغم نجوميته وعالميته وسنه الكبير وصحته ساب كل ده على جنب وعايش يزرع خير ويساعد الغير دون كلل أو ملل.. فكر فى كل ده ولو ملقتش نفسك بتقول.. ده ملاك ماشى على الأرض يا أخى! تعالى حاسبنى!
أيوة الدكتور مجدى يعقوب، ملاك ماشى على الأرض وبالعند فى أى حد، بالعند فى كل اللى اخترعوا فتنة، وبالعند فى كل متطرف متخيل إنه يملك فى جيبه الشمال ورقة الجنة وورقة النار.
وعلى فكرة ملاك ماشى على الأرض مش تعبير شعبى عفوى خالص، ده الكلام اللى بيقوله القرآن وده الكلام اللى قاله الإنجيل..
فى الدين الإسلامى القرآن والسنة أثبتا أن الملايكة ممكن تتشكل على صورة بشر.. وفى الإنجيل نفس الكلام وإن الملايكة بيقدموا الخدمات والخير للبشر.
الدكتور مجدى يعقوب ملاك بيمشى على الأرض، ملاك قصته عجيبة وغريبة.. بدأت بصدمة وموت ومرض وتحد ووصلت دلوقت لخير مالوش حدود.. خير مبيفرقش ما بين الناس على أساس دينى أو عرقى أو جنسى.. خير لكل القلوب الموجوعة بغض النظر عن اسم صاحبها.
تخيل إن الموت يكون هو سبب اختيارك لشىء واختيارك ده يتحول فيما بعد لقصة ومعجزة ميختلفش عليها اتنين.. أيوة الموت.. ماهو لما الدكتور مجدى يعقوب كان عمره 7 سنين والده كان طبيب وجراح شهير وعمة الدكتور مجدى اللى هى أخت أبوه قلبها كان مريض، وماتت وهى صغيرة والأب حزين وجاله انهيار عصبى والابن عاجز مش عارف يعمل حاجة.
الدكتور مجدى يعقوب سأل أبوه ليه معلجتهاش؟! الأب رد بحسرة: يمكن لو كانت فى لندن كانت اتعالجت عشان كانوا متقدمين فى علاج صمام القلب، الدكتور مجدى يعقوب غضب وقال لأبوه أنا لازم أطلع جراح قلب وأعالج كل الناس ومش لازم حد تانى يتوجع.. الأهل خدوا كلام الدكتور مجدى يعقوب على أنه حماس طفل صغير.. لكن مجدى يعقوب قرر إنه يحقق الحلم ويبقى السير مجدى يعقوب ملك القلوب فى العالم كله..
فى كل حتة فى العالم فى قلب مدين للدكتور مجدى يعقوب بنبضه، فى مليون قصة عن ملاك ماشى على الأرض اسمه مجدى يعقوب لا يتأخر أبدا إنه يعالج مريض مهما كان فين، عن طبيب وصل إلى القمة وكان ممكن يختار المجد والراحة ولكنه نزل إلى أسوان وقاد حملة تبرعات، وقرر أنها تكون قبلة لعلاج المحتاجين، ألف قصة قلب كانت منتهية لكن نفس القلوب دبت فيها الحياة على إيد الدكتور مجدى يعقوب تانى.. وعشان كده بنقول إن الخير أنواع.. الخير ممكن يكون جاى من قلب الموت، الخير ممكن يكون فى شخص مخلص.. الخير ممكن يكون ملاك بس عايش بينا على هيئة بشر.
عدد الردود 0
بواسطة:
Afaf
انت. إنسان. عظيم. والله.
اتابع. مقلاتك. كم هي. تدل. علي. وعي. وفهم. ارفع. القبعة. للام. التي. ولدتك. والأب الذي. ربي. مجدي. يعقوب. شخص. فعلا. ملاااااك. ربي. يعطيه. الصحه. والعافية وصالح. دعواتي. له. ولك. يا كاتب. المقال. 🌷