علق الإعلامي عمرو أديب على إقامة أحد الأفراح بمحافظة الإسكندرية أمس الخميس، وقال: "طبعا لو اتكلمنا هيقولك ده مش عاوزنا تفرح، أنت إزاي تقف قصاد فرحتنا يا عدو الفرحة، أنتو مش واخدين بالكوا من أرقام الإصابة بكورونا، احنا كل يوم بيقنا نقول إنهاردة أكبر نسبة إصابة في مصر منذ ظهور الفيروس، أنا عاوز أقولكوا أن الأرقام هتستمر في الزيادة، وهل في دولة في العالم بتكتفي بأنها تناشد الناس؟".
وأضاف عمرو أديب خلال برنامج "الحكاية" : "تلاقي واحد يقولك يا عم أنت هتقرفنا ليه، بقولك إيه أنت قريب أوي ممكن توصل لـ 7 آلاف حالة، انهاردة أنا شايف صور جاية من طنطا الناس نازلة بالعربيات تحتفل بشم النسيم في الشارع، طب طالما أنت قررت تنزل بالنهار وتتفسح إعمل حسابك على إجراءات الوقاية، أنا مش فاهم أنتو فعلا عاوزين إيه، في أمريكا جريمة أنك تقعد قريب من حد من غير كمامة".
وقال: "أنا مش خايف أني يجيلي كورونا، لكن النظام الصحي المصري هل هيتحمل كم الإصابات؟، ده الناس في مصر من دلوقتي بتتكلم في الأطقم الطبية ومستشفيات العزل، طب يا جميل هتعمل إيه لما الحالات تزيد والمستشفيات أصلا متقدرش تستوعب ده، حتى الآن النظام الصحي متماسك، من أسبوع وزارة الصحة مطلعة أدوية تتصرف للطواقم الطبية، عشان نقوي مناعتهم، ساعدوا البلد يا عالم بتكرهوها ليه".
تم أضافة تعليقك سوف يظهر بعد المراجعة