ريهام سعيد ترد على منتقديها: "بتعدمونى ليه.. دى طريقة صيد الحيوانات من 50 سنة"

عبرت الإعلامية ريهام سعيد، عن حزنها من حالة الهجوم التى تتعرض لها واتهامها بتعذيب الحيوانات من أجل جذب ملايين المشاهدات على وسائل التواصل الاجتماعي، وذلك بعد انتهاء عرض الحلقة الثانية من برنامج "صبايا الخير"، على قناة النهار، والتى قامت خلالها برحلة برية مع مجموعة من الصيادين لاصطياد الذئاب والثعالب.

وقال ريهام سعيد، فى مقطع فيديو على صفحتها الشخصية على موقع "فيس بوك": "انا تربيت فى منزل طول عمره فيه حيوانات، وكان عندى سنجاب وقنفذ ونسر، وطلعت الصور بتاعة ابنى امبارح اللى ماسك فيها الحيوانات"، مؤكدة أن فكرة تجارتها بالحيوانات وأنها انسانة بلا رحمة غير حقيقية خاصة من الأشخاص المقربين منها والذين يعرفون مدى علاقتها وحبها للحيوانات.

ريهام سعيد على فيس بوك

واعتذرت ريهام سعيد، خلال رسالتها عن مشهد صور اصطياد الحيوانات التى تسببت فى أذى مشاعر جمهورها المتابعين، لافتة إلى أنها فى النهاية ليست المسئولة عن هذا المشهد، قائلة: "احنا قلنا عايزين نركز على مهنة صيد الحيوانات وانا مخلتش الراجل يصطاد الحيوانات بالطريقة الصعبة دى عشان اصور، وأنا رايحة اصور رحلة صيد ذئاب وثعالب فقط".

ابن ريهام سعيد يمسك ثعبان

ابن ريهام سعيد

وتابعت: "أنا معرفش احنا هنصطاد ايه، وأنا طالعة رحلة صيد زى أى حد ودى طريقتهم اللى بيصطادوا بيها، وأنا مليش دخل بيها، ومهنة الصيد موجودة لأغراض كثيرة منها علمية ومنها تجارية، وأنا وظيفتى تغطية رحلة الصيد وواضح من الحلقة وكلامى فى الاخر أنى مش مبسوطة من الطريقة اللى بيصطادوا بيها، وده ظهر فى تعبيرات وجهى خلال التصوير".

اسرة ريهام سعيد

ابن ريهام سعيد مع الحيوانات

وأوضحت ريهام سعيد، أن هذه الطريقة المرفوضة للصيد بالنسبة للجمهور ولها هى أيضا، إلا أنها لا تعرف الطريقة الصحيحة للصيد، متابعة: "أنا معرفش طريقة الصيد الصح، وطبعا حق الناس تزعل، لكن متبقاش ريهام عملت حلقة لتعذيب الحيوانات عشان تكسب مشاهدة".

وأكدت ريهام سعيد، أن البرنامج سلط الضوء على ظاهرة سيئة لصيد الحيوانات البريئة وأنها سعيدة بكشف طريقة الصيادين الذين يصطادون الحيوانات بطريقة سيئة، مشيرة إلى أن البرنامج سلط الضوء على ملف الاعلام لم يتطرق له من قبل، وأن برنامجها قائم على الحقيقة وتسليط الضوء على الحقيقة بحلوها ومرها.

وأبدت ريهام سعيد، تعجبها من عدم تسليط الضوء نهائيا على طريق الصياد فى صيد الثعالب والذئاب، قائلة: "محدش خالص جاب سيرة الصياد ولا طريقة الصيد وكله عليا أنا وانا مالي، والصيادين بيصطادوا الثعالب والذئاب بهذه الطريقة من 50 سنة أبا عن جد، وأنا مليش علاقة بالصيد".

ووجهت ريهام سعيد رسالة إلى الجمهور: "أنتم شفتوا طريقة الصيد غير مرضية بتعدمونى أنا ليه وانا مخترعتيش الطريق دى، ولا قلت للصيادين يصطادوا، وانا غطيت حاجة بتحصل بمنتهى الصدق وليه الصدق بيضايق؟ وارجوا من الجمهور عدم تكرار الغلطة وبلاش كل مرة اتظلم واتاخد مع التيار".

واستكملت: "فى ناس ضدى وناس مضيقة انى طلعت البرنامج ده وناس مستأجرة عشان تتدخل جوه الحملة دى وتعمل هاشتاجات ضدي، والبرنامج بتاعى هادف وبيعالج ناس وبرنامج وطنى وشريف وبيقدم كل ما هو مفيد، والحلقة دى مفيدة جدا لو هتخلى كل الصيادين يغيروا طريقة الصيد يبقى انا عملت خير كتير للحيوانات".

واستطردت: "أنا اعتذر عن المشاهد السيئة لصيد الحيوانات ولكن فى شغل ممنهج ضدي، وأنا موقفة بقالى سنة ونص ولسه راجعة البرنامج وعايزة اقدم حاجة كويسة وحاجة هادفة وبنقدم فرح وبحاول ارضى الذوق العام للمشاهد".