بلياتشو كأب لذيذ وحنون
راح ياخد أولاده ف رحلة
هيشاهدوا فيها جمال الكون
وبلمتهم هتكون أحلى
جهزوا تراميسهم وشاياتهم
لبسوا ترنجاتهم وكاباتهم
وبسرعة اتكلوا على المولى
نزلوا من بيتهم بيغنوا
وعيونهم فيها فرحة جميلة
وقفوا ف الشارع و استنوا
وكعادته زحمة يادى النيلة
دوشة كلاكسات
ضحك معاكسات
أخلاق الناس حاجة ثقيلة
بلياتشو قال "راح نتمشى"
واهو حتى نوفرلنا قرشين
وبتمن الأتوبيس نتعشى
دة المشى مفيد قوى للرجلين
وقالوا الحركة
صحة وبركة
وتعيش العمر بصحة متين
بس الشارع غرقان يا لطيف
مواسيره ضربت والريحة جنان
دول حتى مش لاقينله رصيف
لجل ما يتمشوا عليه بأمان
كله محفَّر
رصفه مكسر
وزبالة حوالينا ف كل مكان
طيب راح نعمل إيه يا ولاد
دة اليوم عدى والليل ليل
انا رأيى نحدد غير ده معاد
ولعل الأحوال تتبدل
سنة أو سنتين
يمكن عشرين
ولا بلاش أصلا نتنيل
تم أضافة تعليقك سوف يظهر بعد المراجعة