مصر تحتفل بتعداد 2017.. السيسى يوجه بتشكيل لجنة عليا للوقوف على بيانات التعداد.. الرئيس: 10 ملايين وحدة سكنية غير مشغولة.. وفيه ناس عايشين فى أوضة وحمام مشترك.. وعن زواج القاصرات: إحنا قاسيين أوى على بناتنا

دعا الرئيس عبدالفتاح السيسي، إلى الاستفادة من بيانات التعداد السكانى مصر 2017، قائلا: فى كلمته خلال احتفالية إعلان نتائج التعداد، " إذا كنا عاوزين كمجتمع مش بس كحكومة عاوزين نستفيد من البيانات اللى بقت متاحة دلوقتى، ودى مبادرة محتاجة مننا جهد".

يؤلمنى وضع الأبناء والبنات فى المجتمع

وعن زواج القاصرات، أضاف الرئيس السيسي، "بنت عندها 12 سنة، نحملها مسئولية زواج وبيت وشئ من هذا القبيل، أنا بقولها كده بظروفها لمجتمعنا، انتبهوا!!!.، لأولادكم وبناتكم، لأن أنا يؤلمنى ذلك، وأعتقد إنه يؤلم أى إنسان عنده ضمير حقيقى واهتمام حقيقى بأبنائه وبناته".

ومضى الرئيس السيسي قائلا:"فوجئت إن فيه منهم أرامل ومطلقات، لبنات عندها 12 سنة، ياااه، قد إيه إحنا قاسيين على أهلنا وأولادنا، وعلشان كده أنا ماكنش ممكن أمشى من غير لما أقول إن إحنا عندنا ثروة كبيرة جدا".

وشدد السيسي على ضرورة استفادة المجتمع من بيانات المركزى للإحصاء، مشيرًا إلى الجهد الذى بذل فى هذا التعداد، مضيفًا:"التعداد اتكلف مبلغ كبير قوى، وجهد كبير قوى على مدى 4 سنوات أو أكثر، وأنا عارف اللواء أبو بكر الجندى قد إيه رجل دؤوب ونشط، وعلشان نوصل للبيانات دى اتعمل جهد ضخم جدا وتكلفة مالية ضخمة جدا، اتصرفت علشان نستفيد منها كمجتمع لإصلاح ذاته، و الوقوف على سوءاته ونجابهها، وأتصور أن الإعلام له دور كبير جدا مع منظمات المجتمع المدنى والحكومة، وكلنا محتاجين نقف مش بس على المثال اللى أنا قلته، وكمان فيه 10 مليون وحدة سكنية مش مشغولة، تفرج على كام شاب وشابة عاوزين يتجوزا، وتحل مسألة أد إيه لناس مش متوفر لهم سكن مناسب".

فيه ناس عايشين فى مطبخ وحمام مشترك

وتابع الرئيس فى كلمته، "عاوز أقول إن البيانات اللى طلعت قدامنا يمكن يتعمل منها أفكار ومبادرات تحل كتير من مشاكلنا، لما نعرف إن عندنا ما يقرب من 70 إلى 80 ألف وحدة لابد من إزالتها، ده معناه إيه؟،.. لما نعرف إن فيه ناس عايشين فى حمام ومطبخ مشترك، أنا متأكد إن إحنا بنخلص 180 ألف وحدة سكنية، أتصور إن ده مش هايبقى موجود فى السنوات القادمة، أن نسمح لأهلنا استخدام أوضه واحدة ومطبخ وحمام مشترك، وأتصور إن الـ 180 ألف وحدة سكنية اللى الدولة بتعلمهم، واللى المفروض تخلص 30 يونيو 2018، هايحلوا هذه المسألة بشكل أو بآخر، لكن فيه كلام كتير اتقالنا وكلام أكتر منه ماتقلش، واللواء أبو بكر الجندى عمل إطلالة على التعداد ومؤشراته المختلفة، لكن فيه بيانات كتيرة جدا يجب أن نقف أمامها بالدراسة والأفكار والمبادرات لإيجاد حلول لها أو الاستفادة منها"، موجها الشكر للعاملين بالجهاز المركزى للتعبئة العامة والإحصاء، على الجهد الذى قاموا به خلال التعداد السكانى.

أفكار ومبادرات للوقوف على البيانات المتاحة

ورحب الرئيس فى كلمته خلال احتفالية إعلان نتائج تعداد مصر 2017،  بضيوف مصر من المنظمات الدولية المعنية بالتعداد والسكان، وقال: "فيه بيانات كتير اتقالت لكن إحنا محتاجين كحكومة ومجتمع فى إلقاء للضوء أكثر على الذى تم طرحه، وهذا يحتاج أفكار ومبادرات، من خلال تشكيل لجنة عليا من الحكومة والجامعات المصرية، للوقوف على البيانات التى تحصلنا عليها".

وفى ختام كلمته وجه الرئيس السيسي الشكر للشباب والشابات الذين شاركوا فى التعداد، مبينًا أن 40 ألف شاب وفتاة قاموا بجهد على مدى شهور علشان يحطوا قدام مننا صورة كبيرة جدا أو قريبة من الواقع اللى احنا عايشين فيه".

أول تعداد إلكترونى

يذكر أن التعداد السكانى لمصر لعام 2017، هو التعداد الـ14 فى سلسلة التعدادات السكانية منذ أن بدأ تأريخ التعدادات السكانية عام 1982، وهو أول تعداد إلكترونى، تم تنفيذه فى الفترة من يناير- يوليو 2017، وفقا لأحدث وسائل التكنولوجيا مصحوبا بقاعدة بيانات ضخمة، من أجل مساعدة صناع القرار فى رسم السياسات والخطط المستقبلية للدولة.