خلاص قرّرت يا بن الورد تغسل وشّك الطاهر بطمى الأرض
وخطّيت ع الصراط وحدك فى عزّ البرد؟
سحبت قصايدك المطليّة بالأوجاع
ولملمت اللى فاضل من عنيك الطيبة وعلّمت ع الأنطاع
رفضت تبيع ف لحظة ما الربيع خانك وغيرك خد نصيبه وباع
خلاص قرّرت
خلاص مرّرت روحك للسما ونوّرت
خلاص حذّرتنا ومرّيت وقلت لهم هناك حذّرت
ما نيش عارف أعيّط ليه؟
عنيا محجرّه بالدمع
كأن رموشى صارت شمع
مافيش فى عنيّا أى دموع
وقلبى اللى اشتهى يقعد معاك موجوع
ما تقلقشى على المساكين
أكيد هيموتوا بعد كلامك الطيب هنا م الجوع
عشان راضيين يعيشوا بتوع
أكيد كلّ النجوع هتحنّ للدهاليز
مانش عارف أقول لك إيه
لكن عارف أقول إن أنت كنت عزيز
وعارف أقول لأصحابى الكلام الحلو بالمايونيز
مانيش عارف ونفسى اسأل
فادتنا بإيه قصايدنا
ووصلنا لإيه من الترميز؟
وكل حبايبى ليه اتحوّلوا لبراويز؟
.............
خلاص قرّرت يا بن الورد
ترمى الدنيا وتخطى كما لو كنت قاصد ترمى كلّ الطيّبين خلفك
ما عادش يهم مين ضدك ومين حلفك؟
ما عادش يهمّ فين إلفك وفين وِلفك
خلاص ما عادتش فارقه معاك
ولا مغرم هناك تعرف حبايبك عايشه فيها إزاي
مشيت من غير ما تعزم قلبهم ع الشاى
وتضحك فى الوشوش بهدوء
تركت العالم الموبوء؟
وقلت تفوق؟
خلاص خليك معاهم فوق
وسبنا ندوق هنا جمر الهدوء المرّ والتشويه
وأمر الهانم الفاضيه وسعادة البيه
مانيش عارف أعيّط ليه؟
...........
قصايدك لسّه ع الترابيزه قدّامى
كأنها أمر إلزامى
كلامك لسّه فى ودانى
وواخدانى الحياه منّك وفايتانى..
وسارقانى القصايد منّى للتانيين
وجودك فى الطريق يشبه وجود الحلم للحالمين
وضحكك للعيال هيغيب
وهيسيب نفسه للتايهين
كلامك كان لناس ساكتين.
وهيواصلوا السكك ساكتين
منين ولمين ورايحين فين،
وعهد الله ماهم عارفين
ما نيش عارف أعيّط ليه؟
أنا نسيت العياط بالشعر يا صاحبي
بقيت مع كل كلمة باموت
قدر وبنكتبه ف سكوت
ولما نقوله بنوطّى ف قوالته الصوت
عشان نقدر نقف على رجلنا ونرمح عشان القوت
جريمة الشعر يا صاحبى جريمه بتخنق الملكوت
جريمة الشعر تخرب بيت ولا يتقامش بيها بيوت
أنا آسف عشان عارف ماهوش لادد عليك القول
تعال نقيسها بالمعقول... بكام دلوقت كيس الفول؟
وكام شاعر واقف يهتف.. وكام واحد عمل دلدول؟
ومين بقى عارف الساعة الأساس والأصل م البندول؟
أنا آسف عشان عارف ماهوش لادد عليك القول
وعارف إن روحك فى السما هيمانه بالمجهول
وعارف إن انا المسئول
ف لحظة ما انت بتحارب.. أنا عشت الحياه بالطول
ف لحظة ما انت بتحاول.. انا شخبطت فى الكشكول
فى لحظة ما انت بتقاوح... انا باشتم فى واحد صول
ف لحظة ما انت فى الميادين.. انا باضحك مع البهلول
فى لحظة ما انت فى الجامعه معاك جيّد.. انا مقبول
وكنت باشجّع الأهلي... وقلبك حقنتين محلول
أنا آسف على آخرى
أنا كان لازم ألزق لك... لكن جيت لك هنا وخري
وكان لازم أقول لك شعر.. واسمع شعر.. واتهجى الوطن بالشعر
فى لحظة ما الجميع واقف يفاصل فى الحياه والسعر
هنا شغلونا.. بكره بكام..
وبعده يساوى فى عيون كدابينهم كام
وكيلو الفرحه بعد الخصم ممكن يبقى لينا بكام
ورطل الحلم فى إيديهم هيبقى بكام
دعانا بكام
وهيجاوبوا الدعا دا بكام
نفسنا بكام... وليه يا صاحبى نتنفّس ما دام شدوا لهوانا حزام
حرام فى حلال... حلال أصبح فى شكل حرام
وقاسمانا البلاد نصّين.. ولاتنين يشبهوا الأحلام
بنفس الشكل.. نفس الأكل.. نفس الواقفه بالأعلام
وماشيه الدنيا ع الآخر إلى قدّام بلا راجعه
وشوش طلّتها تشبه طلّة البجعه
وناس أشباه... سلاسل ماشيه ع الأسفلت مش فاهماه
مصرّه على اللى مش عارفاه
ودايره بتبتهل من غير.. ما تعرف معنى كُنه الله
..............
حياه ماشيه.. بهديد الحيل
وآشية نصها معدن
وآشية نصّها تطبيل
وفيها الماشى زيّك نيل
وفيها الماشى بالشخاليل
وفيها الماشى مش عارف نهار من ليل
وفيها الماشى زى الخيل
وفيها الماشى زى السلحفا بيزحف
بشر محتاجه ميت متحف
وانا احلفلك على المصحف..
ما واحد عارف الضربه هتيجى منين
ولا هتصيبه فين وامتى
صراخك فى الوشوش فاضل برغم إن الحاجات صامته
وضحكك للجميع موصول
وكفّك كان يشيل الشعر.. كأنك ماشى بالمحصول
كأنّك ماشى بالعالم ما بين كفّينك الطاهرين
ما حدّش عارف الضربه هتيجى منين.. برغم الخوف
ورغم الدهوسه لحظة ما نرمح فى انعدام الشوف
ما زال الشعر فى عيونك... بيعمل فى النسيم معروف
مازال حلم الغنا مألوف
مازال فى قصيدة الشاعر حروف تبني
حروف تسند خطاوى ابنى وحيطان البيت
مازال وسط الغنا حواديت
ما نيش عارف أعيّط ليه؟
وليه تتحوّلوا لتوابيت؟
……………….
أنا مستنى روحك تبتسم تانى
ومستنيك فى قلبى نشيد
ومستنى اتصال منّك هنا فى العيد..
.......
-آلوه
-أيوه
-إزيّك وإزى الناس والشارع.. إزى بلادنا.. إزى مراكب أهالينا.. قهاوينا، الناس الفقر بتوع عاش الحاكم، والناس الساكتين ع الظلم لحدّ ما فحّل واستفحل، الناس الجد، والناس المزّيكا.. عاملين إيه دلوقت.. يا رب تكونوا بخير..
-والله تمام.. الناس.. كل الناس فرحانه عشان كنت امبارح ع التليفزيون..
- سلملى عليهم واحد واحد.. قول لحبايبى إن أنا جاى بكره..
- حاضر يوصل.. تؤمرني؟
-ماتقوليش تؤمرني.. قول مش عايز حاجه.. أنت حبيبى وانا أمرش حبايبي
-ههههه.. حاضر
-أنا ما باهزرش.. عايز أقول لك زعلان من هاشم... (طوابير رايحين الجنّه) إزاى ماطلعش لدلوقتي؟
- روّق بس.. هاشم بيبّحك وأنا هأسأل والله.. بس أمّا أنزل طلعت حرب واروح له ميريت.. هاشم مش متأخّر.. عايز حاجه؟
-لأ.. سيبه.. أنا زعلان منّه، ما تسألهوش... عايزك تتعرّف على حاتم، لازم، وانا بكره هأقول له سعيد حد كويس.. كلّم سلوى وطمّنها إن الدنيا بخير، واتطمّن، شادن زى الفلّ.. سلّم على محمود ووليد وجميع أحبابنا..
-شادن.. ربنا يحرسها يا رب وتفرح بيهم، وتشوف نسرين فى الكوشه، وخالد... ههه.. خالد كنت بأقول له فلول... قال لى فلول وفلافل..
-اتعرف ع الناس يا سعيد... صدّر شعرك ما تصدّرش مشاكل شغلك.. والتريقه ع الناس فى المليان والفاضي
-حاضر
-لأ مش حاضر.. سيبك م التهريج.. أنت مأجل مشاريعك وحياتك ليه؟ اسعى شويه، أنت بتكتب شعر كويّس.. احلويت يا سعيد..
- دى شهاده يا دكتور..
- إيه رأيك فى البرنامج؟
- حلو.. جميل، كنت بتتعاجب والله.. والناس فرحانه بجد
-هههه.. بطّل ياض شغل بتوع مصر، أنت نسيت نفسك؟
-والله قصايدك كانت زى رماح النار..
-بكّاش.. سلّم على اصحابنا الأوباش..
-تؤمرني؟
-برضه؟ ألف سلامه.. بس ابقى استأذن صاحبك علان العلانى يبطل يبعت لى الكاندى كراش ع الفيس... زهّقني.. قول له إنى ما بأفهمهماش.. هى الناس فاضيه لكاندى كراش..
الناس محتاجه تعيش الدنيا وتتعاش... ألف سلامة
..........
ألف سلامه يا صاحبي
برضه الناس فرحانه بدواوينك..
فرحانه بكل قصايد قلبك..
بالشكر الحار لأمّ ولادك ع الشاشه
بعنيك المليانه محبه وأحلام وهزار
بقصايدك..
وقصايدك كانت زى رماح النار
تؤمرني؟
ألف سلامه يا آخر واحد كان يتكلّم رغم الضيق والخنقه عن الضيق
ألف سلامه يا آخر واحد كان يتكلّم ع التضييق رغم التضييق
ألف سلامه وبكره هاسلم لك على حاتم، وهأطمّن سلوى، وهأسلم على كل المخاليق
واحد واحد
الطيب قبل الجاحد.. والجاحد قبل الطيّب
كلّ اللى هيبقى قريّب منّى هأقول له إنّك سلّمت عليه ومشيت
بعد ما هزّرت مع الناس القاعدين فى المستشفى وقلت وغنّيت
..................................
خلاص قرّرت يا بن الورد تغسل وشّك الطاهر وتتهجى السما وتفوت
وتستلم كده للموت
.....................
حاضر والله.. هأسلم على كلّ الناس.. بس انت ارتاح.. واطّمن.. واكتب
اوعى تبطّل شعر..
الشعر دموعنا المتحاشه...
صرختنا ووقفتنا ف وش الباشا..
اكتب شعر
وابعت دواوينك من فوق نطبعها
الناس محتاجه الكلمه الحلوه يا صاحبي.. الناس طفحت م الكدب
طفحت من أكل العيش المر
طفحت م الحريّه المزعومه
طفحت من النومه اللى تهدّ الحيل
اكتب شعر كتير وابعتلى قصايدك من بناوير الجنّه
مستنيها
بس ما تنساش تبعت روحك فيها عشان الناس بتحبّك وبتستناك
ما تتأخرش علينا... هنبدأ بيك الأمسيّات والندوات
الناس طفحت من شعر البهوات الخواجات
مش كنت تملّى تقول ع الفيس: الشعر لازم يركب الصفحات
الشعر لازم يركب الصفحات
مستنيين روحك دليل يغزل
وعشان كده
(مالناش بديل
إلا اختيار المستحيل) فانزل
تم أضافة تعليقك سوف يظهر بعد المراجعة