يا محلى جمال البلح
لما هل على النخل وطرح
وأنا عارفك يا نخل
طبعك ما فيه البخل
يا نخل عامل عمايل
شايل من الشهد جدايل
تغازل كل العيون
لما الجريد يتمايل
والكلمة الطيبة
زيك يا نخلة طيبة
أصلك ثابت
لو حتى الشمس غابت
من ايام حمورابي
وتحتمس الاول
وفى كل الاديان
الكلام بزيادة ومطول
بلحك يا نخل غالي
وأنت يا نخل عالي
احمر زغلول وزاهي
فى حلاوته مافي
ولا بلح الامهات
هات منه هات
من غير كلام من سكات
و الحيانى لما يبقى رطب
فى جماله عجب
يتأكل قوام
أحسن سريع العطب
والرطب له قصة جميلة
هحكييها مش طويلة
على جذع نخلة
رأسه يابس
والسيدة مريم
فى عز الشتا والبرد قارس
جالها الامر
من صاحب الامر
تهز جذع النخلة
راحت النخلة طرحة
طرحت رطب
جمال ولا الذهب
اشكال وأصناف كتير
فاكهة الغنى وطعام الفقير
بنت عيشة والسماني
فى العجوة عجباني
والبرحى من العراق
يا بخت اللى منه ذاق
فى السفر والترحال
يشد ويقوى الحال
بيه يهادى الكريم
مع القهوة عند التقديم
ياللى من تراث العرب
فى الحلم حلاوة ايمان
لو حكوا كتير عنك
ما يكفى حكى إنسان
ياما نفسى فيك يا بلح
بس النخل عالى
سواك الهوا وطرح
زاد حلاوتك يا غالي
خيرك يا نــخــل وفير
هدية من عند القدير
ولما الخــير يمطر
سبــحان من صـور
زينة أنت يا نخل الجنة
تحت ظلك أدعى أتمنى
تم أضافة تعليقك سوف يظهر بعد المراجعة