غادة على أحمد تكتب: حبى الكبير

حُبِّى الكِبير.. أكْبر مِنى بِكْتير
حُبِّى الكِبير..أنا جُزْء مِنُّه
مَقْدَرْش أكتِب عنُّه لإنُّه
أغْلى مِن كُل الحُروف
والحِبْر مايليقْش بيه
ولايِنكِتب بإيدين بَشر
أقْوَى مِن كُل الظُّروف
حُبِّى الكِبير صُنْع القَدَر
مَكْتوب لى مِن قَبْل الميلاد
مِنْحَة مِن رَبْ العِباد
نِعْمة تِسْوَى كُل الِّنعَم
حُبْ خَلْقنى مِن العَدَم
وأمَّا اتْوجَدت
وبْأمر ربِّى اتوَلدت
حَنِّتْ وفْرحِتْ
شِقْيِت واتْحَمِّلت
شالِت وكَمِّلِت
وفَرْحِتْها عَشان فَرْحِتي
ولا كان تِهون دِمْعِتي
وتْضُمِّنى قبْل ما اقول ضُمِّى
وقْلبَها عَلى قْلبى يِسَمِّى
ولا عُمْرى الاقى زَيَّها
دا الدَفا والحُب كُله ف حُضْنَها
نَسَّانى شَكْوِتى وهَمِّي
مقْدَرْش أقُول عنَّها.. غِير إنَّها
حُبِّى الحَقيقي.... أُمِّي