فاروق جعفر عن قضيته الأخيرة: "مُت لمدة سنة"..ويروى قصته مع "الكلب" الوفى

أعرب فاروق جعفر نجم الزمالك ومنتخب مصر السابق، عن استيائه من الفترة التى عاش فيها خارج مصر، بسبب بعض المشاكل الأسرية، والتى وصلت إلى المحاكم، مما أجبره العيش لمدة سنة خارج وطنه، قائلًا: "أنا مُت لمدة سنة، من يوم 31 ديسمبر 2014 حتى 13 ديسمبر 2015، بسبب بعدى عن وطنى".

أكد جعفر خلال تصريحاته لبرنامج "الكورة فى دريم"، أن البعد عن مصر وأهل منطقته، تلك الفترة تسبب فى شعوره بحالة من الحزن الشديد.

وروى جعفر قصة "الكلب" الوفى الذى اقتناه فى منزله، قائلًا: "أنا بحب الكلاب جدًا، لأنها أوفى من الإنسان، لأن الكلب لو حبك بيحس أنك صحبه وأبوه وأخوه.. وكان عندى كلب ساكن معايا فى المنيرة، ولما عزلت رحت الزمالك الكلب امتنع عن الأكل والشرب، لحد ما رجعته تانى المنيرة، والكلب ده كان مرتبطا بأبويا جدًا، وفى يوم أبويا تعب، وأنا قاعد معاه بكلمه لقيته مات، لقيت الكلب نام بالعرض على باب الأوضة بتاعته، ونديت أختى الأصغر منى وقولتلها أبويا مات ومش عايزين دوشة فى وقت متأخر زى ده، وهى بتعيط وبتزق الكلب برجليها علشان تخش فيها الأوضة لقيت الكلب مات فى نفس اللحظة اللى مات فيها أبويا".

أضاف جعفر: "كنت وأنا مسافر السنة الأخيرة، كنت شايل هم الكلاب اللى عندى، ودائمًا بتابع بالتليفون علشان اطمن على أكلهم وصحتهم، وأول ما رجعت من السفر عندى الكلب الكبير اسمه "ولسون" جه وفضل قاعد تحت رجلى وفضلت ألاعبه وبعديها بساعة مات..ومش عايزينى أحب الكلاب؟".