ليه تختار بين البيتزا والبرجر لما ممكن تاكلهم الاتنين؟.. اختراع للأكيلة

لو بتحب البيتزا والبرجر وزهقت من الأكل البيتى ومن المطاعم التقليدية اللى مبتقدمش غير أطباق ثابتة معظمها بيركز على الستيك والفراخ المشوية والباستا بصوصات بأسماء مختلفة وإضافات ثابتة وبتقيدك بوجبات معينة فى شهر رمضان ومنيو محدود عشان الزحمة، يبقى لازم تجرب الاختراع الجديد وهو البيتزا برجر الجديدة اللى هتنتشر فى مصر فى الفترة الجاية، وهتسيطر على جميع مطاعم الفاست فوود عشان فكرتها المبتكرة اللى أكيد المصريين هيقبلوا عليها الفترة الجاية عشان تجدد من اختياراتهم.

البيتزا برجر اتنين فى واحد، اختيار موفق بيخليك تاكل حاجتين بتحبهم فى نفس الوقت من غير ماتروح مطعمين مختلفين، خاصة إنه من الصعب تلاقى مطاعم بتقدم بيتزا وبرجر الاثنين مع بعض، لكن ممكن تمزج ما بين الاتنين وده اللى عمل الاختراع الجديد وهو البيتزا برجر، واللى عبارة عن واحدة بيتزا بحجم متوسط بشكلها العادى من برا زى أى بيتزا، بس المفاجأة إنك مجرد متقطعها هتلاقى برجر طازة بمكوناته المختلفة، وهو ده التحدى إنك تلاقى اختراع بيجمع بين حاجتين ويقدر يحافظ على طعم كل واحد فيهم من غير ما يأثر على التانى بسهولة، ويديلك إحساس إنك بتاكل حاجتين فى نفس الوقت.

ممكن تطلب البيتزا برجر بأحجام كتير وأشكال مختلفة زى ما تحب، فهى بتتقدم بالحجم اللى بتحبه، بس فى أماكن معينة بتقدملك حجم ثابت يكفيك ويشبعك، عشان تحس بكل مكونات البيتزا والبرجر مع بعض، ممكن كمان تطلب طبقة البيتزا اللى فوق واللى أنت بتحبها وبتفضلها، عشان فى قدامك اختيارات كتيرة وهى الخضراوات أو المشروم أو السوسيس أو السجق أو البيبرونى أو الموتزاريلا، واللى بتقدملك بطريقة شيك تفتح النفس، وهى عبارة عن بيتزا صغيرة الحجم متقطعة أجزاء، فى كل جزء كمية كبيرة من لحم البرجر والبيبرونى والجبنة السايحة، ده غير الأطراف الهشة اللى مليانة جبنة عشان تستمتع بتجربة مختلفة وجديدة مدوقتهاش فى حتة تانية.

أسعار البيتزا برجر متوسطة، خصوصا بالنسبة لمطاعم البيتزا، حيث يبدأ سعرها من 40 جنيها على حسب نوع طبقة البيتزا والإضافات المختلفة اللى ممكن تزودها عليها على حسب اختيارك، وده يعتبر سعر رخيص خصوصا إنك بتاكل حاجتين بيتزا وبرجر.

لو ناوى تروح فى رمضان حاول تكلم المطعم قبلها وتحجز مكانك، عشان الإقبال على الاختراعات الجديدة دى زاد جدا فى مصر مؤخرا وخصوصا فى رمضان، واختار مطعم له أجواء مختلفة تتناسب مع الاختراع الجديد اللى له منتشرش فى مصر كتير.