آسفين يا وردانى.. التحكيم مات

إيه يعنى اللى هايحصل لو تم شطب حكم؟!
واحد يقولك مش هايحصل حاجة.. بالعكس شطب حكم ممكن يصلح حال الحكام!
إنما أكتر من واحد غير الواحد اللى قال مش هايحصل حاجة هايقولوا: شطب إيه اللى أنت جاى تقول عليه.. أنت عارف معنى الشطب إيه؟!

الشطب فوراً هيفتح ويفضح ملف التحكيم؟!

طبعًا.. طبعًا.. لأن الحكام المسنودين، والمحاسيب، اللى هايكون منهم المشطوبين، هايولعوها، أيوه هايولعوها، لأنهم هايكشفوا المستور، ويخلوا اللى ما يشترى، يشترى من غير ما يتفرج!

إنما قبل شطب حكم لازم عملية تطوير.. بكل وضوح على الأقل تطوير مش هانقول تطهير!
التطهير.. زميل التطوير، مش لازم يكون علشان حاجة شمال والعياذ بالله، أو «قبض».. أو بيع أو شراء.. لكن؟!

أهم حاجة لكن دى.. لازم دماغ التحكيم تتغير، يعنى سماعات، وفلوس، لابد أن يكون أجر الحكم 5000 جنيه على الأقل تضاف لمصروفات المباراة، وقتها ليه ينتظر فنجان شاى؟!

كمان لازم لفه، وبلاغ التحكيم «العائلى».. لدرجة أن اللى ماعندوش أولاد «صبيان» يعنى.. هايروح عامل «باك وورد».. ويخللى «البنت» تحكيم نسائى؟!

الوردانى «المعزول».. قال إن عنده «سى دى» كتير لحكام دخلوا القائمة الدولية.. وليهم أخطاء تهد جبال كروية.. مصدقناش.. وقلنا ماينفعش التقطيع.. إنما دلوقتى لازم نعرف إيه اللى بيحصل؟!
ضربات جزاء.. ضربات ركنية؟! ماشى، إنما تصل كمان إلى ضربات على «القفا» وغيره.. ويتم السكات، يبقى فيه والله حاجات؟!

إيه رأيكم يا أسيادنا المحترمين لو موافقين طبعًا نقول للحكم المعزول الوردانى: «آسفين يا وردانى».. ليك حق التحكيم مات.. ونقول للجنة الحكام، ولجنة مجلس إدارة اتحاد الكرة.. واللجنة النقابية لسواقين «التوك توك».. اخرجوا مرة وقولوا الحق.. هو التحكيم خربان.. ولا.. لأ!!