كل عام وأنت صلاح جاهين

فى مثل هذا الشهر يوم 25 منه يكمل 90 عاما بالتمام والكمال، كل عام وهو بخير، كل يوم وهو سعيد راضٍ، كل لحظة وهو شاب مهما شاب ومهما غاب لأنه الغائب الحاضر الفيلسوف الضاحك الباكى صاحب اللغة الثالثة، كما قال عنه يحيى حقى، كل عام وإنت يا جاهين بخير حى بيننا بكلماتك وفلسفتك الرائعة كل عام وأنت بخير يا صديق لم ألتقه يوماً إلا على الورق ويا معلماً ما زلت أنهل من حكمته رغم البعاد ويا فنان قادر على اختزال حياتنا وتفاصيل أيامنا الآن رغم الفراق.. كل عام وأنت صلاح جاهين بكلماتك:
قالوا السياسة مهلكة بشكل عام
وبحورها يا بنى خشنه مش ريش نعام
غوص فيها تلقى الغرقانين كلهم
شايلين غنايم.. والخفيف اللى عام.. وعجبى
نوح راح لحاله والطوفان استمر
مركبنا تايهه ولسه مش لاقيه بر
آه من الطوفان وآهين عليك يا بر
إزاى تقدر تبان والدنيا غرقانه شر.. وعجبى
إزاى شبابنا يقوم ويخود دوره
من غير صراخ يئذيه ويجرح زوره
يا هل ترى أحسن له يقعد ساكت
أو ينترك ولو خرج عن طوره.. وعجبى
هات يا زمان وهات كمان يا زمان
غير بسمة الشجعان ما منى يبان
هو اللى داق الفرحة يوم ثورته
يقدر يعود ولا ثانية للأحزان.. وعجبى
أنا كل يوم أسمع فلان عذبوه
أسرح فى بغداد والجزاير
ما أعجبش من اللى يطيق بجسمه العذاب
وأعجب من اللى يطيق يعذب أخوه.. وعجبى
علم اللوع أضخم كتاب فى الأرض
بس اللى يغلط فيه يجيبه الأرض
أما الصراحة فأمرها سهل
لكن لا تجلب مال ولا تصون عرض.. وعجبى
مرغم عليك يا صبح.. مغصوب يا ليل
لا دخلتها برجليا.. ولا كانلى ميل
شايلنى شيل دخلت أنا فى الحياة
وبكره ح أخرج منها شايلنى شيل.. وعجبى
قالوا ابن آدم روح وبدنه كفن
قالوا لأ بدن.. قالوا لأ ده روح فى بدن
رفرف فؤادى مع الرايات فى الهوى
أنا قلت لأ روح فى بدن فى وطن.. وعجبى.