هند عبد الحليم: بعيش حاليًا مرحلة تحقيق أحلامي الفنية المؤجلة

قالت الفنانة هند عبد الحليم، في تصريحات خاصة لبرنامج "آرتيستيك" تقديم ليلى بدران على راديو هيتس، إنها تعيش حاليا مرحلة تحقيق عدد من أحلامها الفنية المؤجلة، مؤكدة أن حبها للفن بدأ معها منذ طفولتها، سواء في التمثيل أو الغناء والمسرح.

وأضافت هند عبد الحليم: «في حاجات كتير الناس متعرفهاش عني، زي حبي للغناء والمسرح من وأنا صغيرة، وسعيدة إني بحقق أحلامي المؤجلة وبقيت حاليا ممثلة ومغنية، وبحب الاتنين جدا، وكمان بحب الرقص وكل ما له علاقة بالفن».

وتابعت: كان عندي 5 سنين لما روحت قلت لماما إني بعرف أعزف، وأول ما بابا رجع من السفر جاب لي أورج هدية عيد ميلادي، وكنت بحب أغني من وأنا صغيرة، واكتشفت إن عندي ملكة إني بعرف أحفظ وأغني الأغاني على طول، وكانت والدتي بتستغرب لما تشغل الأغنية وأحفظها بسرعة وأغني معاها.

وعن بدايتها الفنية، قالت: بدايتي كانت في المسرح، وكانت أول مسرحية ليا "هنا أنتيجون"، وأخدت عنها جائزة أحسن ممثلة في المهرجان القومي للمسرح المصري، ودي جائزة مش سهلة وممتنة جدا إنها حصلت وكانت محطة مهمة ومن أهم الإنجازات في حياتي.

وأوضحت هند:بحب المسرح أوي، وبحس فيه إني بتنفس، وطايرة ومبسوطة وعندي طاقة، وده أحلى إحساس في الدنيا، وعشقي للفن خلاني أدرس في المعهد العالي للفنون المسرحية، قسم تمثيل وإخراج.

وأكدت أن المسرح علمها الكثير، قائلة:اتعلمت من المسرح المسؤولية والالتزام، والتمثيل قدام الجمهور تحدي كبير أوي، خصوصا لو بنمثل باللغة العربية والغناء لايف، وكل حاجة لازم تبقى بالمسطرة، وفي أيام كنت ببقى في الكواليس عندي برد، لكن أول ما بطلع المسرح بكون شخص تاني، ولا كأني تعبانة، وطاقة كده ما كنتش بعرف بتيجي منين".

وعن أعمالها الدرامية الأولى، قالت: أول مسلسل ليا كان "الكابوس" مع النجمة غادة عبد الرازق، وكان دوري مشهدين، وكنت خايفة أوي، لكنها كانت داعمة ليا، لحد ما اتعلمت واكتسبت خبرات، وبعدها اشتغلت مع النجمة يسرا في مسلسل "فوق مستوى الشبهات"، وكان ليا الشرف إني أشتغل مع النجوم اللي فيه بقيادة المخرج هاني خليفة، اللي علمني كتير في المشروع ده".