فيسبوك
واتساب
قال الفنان أحمد بحر «كزبرة» إنه حرص على تقديم فيلم «محمود التاني» بطاقة وروح إيجابيتين، مؤكدًا أن الهدف الأساسي من العمل هو إسعاد الجمهور وتقديم فيلم ينال إعجابهم.
وأضاف كزبرة، في تصريحات خاصة لبرنامج «آرتيستيك» تقديم ليلى بدران على راديو هيتس، عن دوره في فيلم «محمود التاني»: «فيلم محمود التاني عملناه بطاقة حلوة وبروح حلوة، وكل هدفنا إننا نعمل فيلم يعجب الناس ويبسطهم، هو ده اللي إحنا عايزينه».
وتحدث كزبرة عن علاقته بالموسيقى، قائلًا: «أنا طول الوقت بغني، لأن دي حاجة أنا بحبها جدًا، وبحب المزيكا، بس الفترة دي بحاول أطور منها بحيث تبقى لايقة مع الحاجات اللي أنا بعملها دلوقتي».
وعن تعاونه مع أحمد غزي، أوضح: «أحمد غزي أخويا، وفيه كيميا بيننا، من أيام الحريفة، وإحنا بيننا مشاريع، بس بنبقى مستنيين العمل المناسب اللي يليق علينا ويضيف لنا».
وأضاف: «فيلم محمود التاني كان من الحاجات اللي إحنا شايفين إنها هتضيف لنا كفنانين، والشغل مع غزي ممتع جدًا، وإحنا طول الوقت مع بعض بعيد عن الشغل كمان، في الحياة العادية إحنا صحاب بجد وده بيبان على الشاشة».
وأشاد كزبرة بالفنان خالد النبوي، قائلًا: «الفنان خالد النبوي أستاذ كبير، وبنتعلم منه، وكل ما بناخد خطوة بيدعمنا وبيقوينا».
وكشف عن تقديمه أغنية ضمن أحداث الفيلم بعنوان «باي باي يا أندال»، قائلًا: «عاملين أغنية في الفيلم اسمها باي باي يا أندال، والحمد لله الناس حبتها».
وعن اسمه الذي يفضله الجمهور، قال كزبرة: «بحب اسم أحمد بحر، لكن مفيش مانع الناس تنده لي باسم كزبرة».
واختتم كزبرة حديثه برسالة إلى جمهور الفيلم، قائلًا: «أتمنى فيلم محمود التاني يعجبكم، إحنا عاملين الفيلم ده من قلبنا، وكل هدفنا إنه يعجبكم، وأتمنى تتبسطوا جدًا».
