المخرجة رباب حسين تكشف تفاصيل ترشيح أحمد جلال عبد القوى لـ حضرة المتهم أبى"

كشفت المخرجة الكبيرة رباب حسين في حديثها لتليفزيون اليوم السابع عن العديد من الأمور المتعلقة بمسلسل "حضرة المتهم أبى"، للنجم الكبير الراحل نور الشريف، من تأليف الكاتب الكبير محمد جلال عبد القوى، والذى عرض في موسم دراما رمضان 2006 وحقق نجاحا جماهيريا كبيرا.

وقالت المخرجة الكبيرة رباب حسين فى تصريحاتها لتليفزيون اليوم السابع قائلة: "الحقيقة بعد ما قريت الحلقات الأولى من المسلسل، وقعدت مع الأستاذ النجم الكبير الراحل نور الشريف ومع المنتج.. وقعدت مع المبدع الكبير اللى الله يكون في عونه محمد جلال عبد القوى.. وكنت شايفة إن ممكن نحمل أحمد أكتر مما يحتمل، ونضره ونضر العمل.. فكنت بتكلم مع مؤلف كبير بس كنت خايفة من إن عاطفة الأبوة تطغى".

المخرجة رباب حسين: المؤلف محمد جلال عبد القوى فنان ومبدع كبير

وأضافت حسين قائلة: "في الحقيقة الأستاذ محمد جلال عبد القوى رجل محترم جدا وفنان جدا.. قالى هو صحيح المسلسل باسمه وتتر البداية والنهاية أستاذ نجم اللى كتبه، لكن هتلاقى حجم الدور مش مبالغ فيه، لأن البطولة لـ نور الشريف ولمجموعة الشباب اللى موجودين وللفنانة معالى زايد".

وتابعت المخرجة الكبيرة حديثها قائلة: "وبعدين بدأنا البروفات.. بحب دايما أعمل بروفات قبل التصوير، وبقيت أوجه أحمد.. وأقوله يا أحمد ما تقراش الدور مع أي حد غيرى.. بلاش تسمع توجيهات أي حد واسمع منى.. ونتناقش يمكن تقولى على حاجة أحسن، أنا أقولك حاجة أفضل.. لأن المخرج بيبقى شايف العمل ككل.. فبدأنا نشتغل وساعات كنت بنفعل عليه ولما بفتكر دلوقتى بتضايق.. لكن هو محترم ومهذب لأقصى درجة ما كنتش بسمع منه غير حاضر ونعم.. وبدأنا مرحلة التصوير، وقولت لأستاذ محمد أنا خايفة من مامته أحسن تشوف البهدلة اللى أنا بهدلتهاله في المسلسل.. من ضربه بالحزام ورميه فى البيسين "حمام السباحة"، وكنا نقعد نهزر.. وقعدت اشتغل مع أحمد كتير كنت عايزة أوصل بيه لأعلى درجة.. وكنت عايز أوصل رسالة إن الشخصية دى عنيدة وفيها تمرد وفيها عنف وفيها احترام برضه للأب، كل هذه الأمور كنت عايزة أوصلها للناس من خلال الشخصية دى".