مخرجة حضرة المتهم أبى عن أحمد جلال عبدالقوى: فقدت ابنى وشريط طويل مر أمام عينى

تواصل تليفزيون اليوم السابع مع المخرجة الكبيرة رباب حسين، مخرجة مسلسل "حضرة المتهم أبى"، للنجم الكبير الراحل نور الشريف، للحديث عن الفنان الشاب الراحل أحمد جلال عبد القوى، والذى رحل عن عالمنا فجر اليوم الأحد بعد صراع قصير مع مرض السرطان.

وقالت المخرجة الكبيرة رباب حسين في مداخلة هاتفية لتليفزيون اليوم السابع: "البقاء لله أنا لحد دلوقتى مش مستوعبة طبعا خبر الوفاة مفيش حد كبير على الموت لكن ده قدر.. أحمد بالنسبة لى ده ابنى أنا قد كدة تعبانة جدا.. أنا بمجرد وفاته فيه شريط طويل بيمر قدام عينيا".

المخرجة رباب حسين: أحمد جلال عبد القوى شخص مهذب جدا وموهوب وكان بينفذ تعليماتى على أكمل وجه

وعن اختيارها للفنان أحمد جلال عبد القوى لمسلسل "الليل وآخره" قبل مسلسل "حضرة المتهم أبى"، قالت المخرجة رباب حسين: "أهم حاجة عندى في الاختيار إنه يكون طالب في معهد الفنون المسرحية اللى أنا متخرجة منه، وهو أهم معهد في التمثيل، أنا ماكنتش جايبة واحد هاوى لكن جايبة واحد متعلم بيدرس فن التمثيل، وعملتله تيست اختبار وكان مناسب ومتوآم جدا فى مسلسل "الليل وآخره"، في دور الضابط شكلا وطولا وأداءً.. لإن الأداء عشان يعمل شخصية الابن الصغير الجاد في تعامله وفى الوقت نفسه الابن المتعلق بأبوه جدا وبينفعل في أي حاجة تمس والده.. وعمل الدور حلو جدا.. والماستر سين بتاعه كان ممتاز، اللى هو بيدخل يرفع المسدس فى وش أخوه الأكبر اللى هو طارق لطفى في حضور أبوه".

وأضافت المخرجة رباب حسين قائلة: "فكنت بدخل أقعد معاه وأديله ملاحظاتى وهو شخص مهذب جدا ومن عائلة محترمة جدا.. من ناحية الأم والأب.. وكان متربى بمعنى كلمة متربى، فكان الحقيقة منفذ للتعليمات ومحب جدا للى هو بيعمله مش جاى عشان والده هو المؤلف.. لا لا خالص.. كان محترم بييجى.. أول واحد ويسمع الملحوظات ويراجع عدة مرات ويقعد مع الفنانين الكبار زى الدكتور يحيى الفخرانى ومرت التجربة دى وكنت سعيدة بالدور اللى عمله".

وعن مسلسل "حضرة المتهم أبى"، قالت المخرج رباب حسين: "المسلسل ده أنا بعتز بيه جدا إنه بيعالج مشاكل كبيرة مازلنا بنعانى منها".