ميرفت أمين: لما بتشتغل كتير بيبقى صعب عليك تلاقى حاجة ما عملتهاش وده سر موافقتى على "كلهم بيحبوا مودى".. والشياكة مش بلبس البراندات المهم الحاجة اللى هتليق عليك.. ورجاء الجداوى كانت حاجة مهمة قوى عندى.. فيديو

حرصت النجمة الكبيرة ميرفت أمين على استرجاع ذكرياتها مع صديقتها ورفيقتها الراحلة الفنانة القديرة رجاء الجداوى، والتي حلت ذكراها السادسة خلال الأيام الماضية، حيث تواصل معها تليفزيون "اليوم السابع"، وفتحت قلبها للحديث عن الأقرب لقلبها، فضلا عن مشاركتها في الدراما التليفزيونية بموسم دراما رمضان الماضى من خلال مسلسل "كلهم بيحبوا مودى"، مع النجم ياسر جلال.

في البداية تحدثت ميرفت أمين عن رجاء الجداوى فى مداخلة هاتفية لتليفزيون اليوم السابع، قائلة: "من الصعب جدا الحديث عن رجاء أو روجة كما كنت أدللها وأناديها.. وأنا لا اعتبر حتى الآن أنها رحلت عن الحياة، لإنها دائما في قلبى وعقلى، وطالما الإنسان موجود بأعماله الإنسانية وتاريخه الحلو الجميل وكمان ذكرياته الحلوة فبالتالى لن يرحل عن أحبايه وسيظل يتذكرونه بهذه الأعمال".

وكشف أمين عن أول لقاء جمعها بالفنانة القديرة رجاء الجداوى، حيث قالت:"اتقابلنا أول مرة فى فيلم كان اسمه "أصعب جواز"، و يُعرض كثيرا في التليفزيون.. فيلم كوميدى لذيذ.. كنا أصدقاء قريبين جدا من بعض وليس مجرد زملاء .. كنا بنتحرك تقريبا مع بعض في كل حتة.. يلا بينا هنروح مش عارفة فين.. يلا نروح الأوبرا.. يلا هنروح نتعشى.. لينا ذكريات كتيرة أوى.. كنا على طول مع بعض.. أتقابلنا كمان مع بعض في أخر فيلم ليها وهو "أعز الولد".

وذكرت أمين الجانب الحلو في حياة رجاء الجداوى، حيث قالت: " رجاء الجداوى طبعا على طول جوة قلبى، ومعايا مش قادرة أقولك كانت أد إيه حلوة ومبتسمة على طول ومبسوطة على طول.. كانت حاجة حلوة أوى فى حياتى".

مواقف جمعت ميرفت أمين ورجاء الجداوى

وعن أبرز المواقف التي جمعتهما، قالت النجمة ميرفت أمين لتليفزيون اليوم السابع: "كنا بنتحرك مع بعض في كل حتة.. في فيلم "أصعب جواز"، ده وهو أول تعاون يجمعنا كنا مع بعض ووقفت وقتها جنبى ووجهتنى.. وكانت نعم الأخت ونعم الصديقة.. مش هقول زميلة لإن وضعها بالنسبة لى حاجة تانية خالص".

وأضافت النجمة الكبيرة ميرفت أمين لـ اليوم السابع وهى باكية، قائلة: "إحنا كنا تلاتة.. فهى كانت جيبالى هدية كدة.. وكاتبة عليها "إحنا تلاتة دايما ونزعل أوى لو كنا اتنين".. يعنى أكتر من الكلام عليها أفلامها موجودة كلها.. كلها أفلام جميلة ومسلسلات جميلة.. وكانت بتحب الكوميدى أوى.. لإنها بطبيعتها بشوشة ودمها خفيف".

ميرفت أمين: لهذا السبب وافقت على "كلهم بيحبوا مودى"

وتحدثت النجمة الكبيرة ميرفت أمين عن آخر تواجد فنى لها خلال موسم دراما رمضان الماضى، من خلال مسلسل "كلهم بيحبوا مودى"، مع النجم ياسر جلال، وعن سر موافقتها على هذا المسلسل وسط اعتذارات أخرى كثيرة عن عدة أعمال فنية، حيث قالت: "عندما تعمل كثيرا في الوسط الفني ستجد نفسك قدمت كل الأشكال الفنية، وهو ما حدث معى، فوجدت نفسى قدمت كل الأنواع والأدوار الرومانسى والدراما والتراجيدى والكوميدى بيبقى صعب عليك تلاقى حاجة ما عملتهاش ، فكان بالنسبة لى أمر حتمى أن أجد دورا جديدا يشجعنى أعود من خلاله، وهو ما حدث في مسلسل "كلهم بيحبوا مودى"، فالحمد لله إن الناس حبوا المسلسل والدور.. فلما جالى الورق ده.. أولا لقيت فيه دور جديد، والأستاذ ياسر جلال كلمنى وصمم إنى أنا اشتغل.. وقالى هتشوفى الدور ده هيعمل إيه مع الناس، والحمد لله وجدت ترحاب بالدور".

وكشفت النجمة الكبيرة ميرفت أمين عن أهمية ارتداء الملابس المتماشية مع طبيعة كل إنسان، موضحة أنها تطبق هذا الأمر على نفسها ولا تشغل نفسها بالبراندات الغالية أو المعروفة في لبسها.

وردت النجمة الكبيرة على الإشادات بملابسها في كثير من المناسبات التي تحضرها، ووصفها بالأنيقة، حيث قالت فى مداخلة هاتفية لتليفزيون اليوم السابع: "دايما بدور على الحاجة اللى هي مش ماركة، ولكن بدور على الحاجة اللى هتليق عليا.. مش مهم الماركة.. المهم الحاجة اللى هتليق على البنى آدم.. أجيب ماركة.. ممكن ماتليقش عليك، ويبقى شكلها مش لطيف في حين حاجة عادية وتبقى حلوة عليك".

وعن قضائها إجازة الصيف، قالت أمين أنها تميل إلى مدينة العين السخنة، حيث تتواجد هناك حاليا، وتفضل قضاء إجازة المصيف كل عام في منطقة هادئة على شواطئها حيث لا تميل إلى الزحام والصخب".