فيسبوك
واتساب
• محمد إسماعيل أفضل صفقات الزمالك وبيزيرا بيتنطط بالكرة كل شوية
• إمام عاشور لازم يمشى
• صفقات الأهلى مش كويسة ومش دولية
• ابتعادى عن التدريب بسبب السماسرة
• ناصر ماهر لاعب حريف بس غير مؤثر
• رحيل إمام عاشور وزيزو عن الزمالك جريمة
سيظل هشام يكن أحد نجوم الدفاع الذين تعاقبوا على ارتداء قميص الزمالك ومنتخب مصر، وأحد نجوم الجيل الذهبى الذى شرف مصر خلال المشاركة فى كأس العالم 1990 بعد غياب طويل، وساهم فى تحقيق بطولات كثيرة مع الزمالك، ومن اللاعبين الذين صنعوا اسما من خلال تألقهم فى الخط الخلفى لفريقه ومنتخب مصر.
هشام يكن فتح قلبه لـ"اليوم السابع"، وعلق على كل الأحداث التي تعيشها الكرة المصرية ورأيه في أزمات الزمالك وتجربة جون إدوارد، كما كشف عن سبب الأزمة الدفاعية التي تمر بها الأندية والمدافع الأفضل من وجهة نظره، كما أدلى برأيه في أزمة إمام عاشور الأخيرة مع الأهلى، وكيف رأى رحيله وزيزو عن الزمالك، في حوار لا يخلو من المصداقية فإلى نص الحوار:
• في البداية.. فينك يا كابتن من التدريب ولماذا ابتعدت عن هذا المجال؟
أنا نجحت بشكل كبير في هذا المجال ولكن الناس مغمية عينيها، وحققت البطولة العربية مع الزمالك بالفريق الذى استبعده دراجوسلاف من معسكر الفريق وخدت المستبعدين وحققت اللقب وكان معايا شيكابالا وحسام عبد المنعم وبابا أركو، وللعلم أنا سبب بقاء شيكابالا في الزمالك بعد تألقه في البطولة لأن دراجوسلاف استبعده ومكانش عاوزه في الفريق.
حاليا الأمور ماشية عن طريق السماسرة والوكلاء فقط، وكل واحد معاه لاعبين لازم تاخدهم معاك في النادى اللى هتدربه ولو معملتش هذا الكلام مش هتشتغل، وأنا أرفض هذا الكلام لأنى مش هطلب لاعب مش مقتنع به لذلك أنا بعيد عن التدريب.
• طيب رأيك في المدربين في الوقت الحالي بالدوري؟
فيه مدربين كويسين، ولكن مفيش مدرب حاليا بيطلع لاعبين جديدة يقدمها لمنتخب مصر، كله بيعتمد على الجاهز والمتاح على عكس زمان، يعنى أنا اكتشفت معتز إينو ورجعت محمد إبراهيم الزمالك وخليت أمير عزمي يكون مدافع قوي ويحترف في الخارج، وغيّرت مركز عمر جابر من الوسط إلى ظهير أيمن وجبت أحمد توفيق الوسط، وخليت مدافعي الزمالك بعد مباراة الستة واحد يكونوا نجوم مصر، وراحوا المنتخب، والأهلي اتفق على ضم معظمهم، لكن حاليا مفيش حد ممكن يعمل كده، لأن العمل في الأندية واتحاد الكرة بالمحسوبية والشللية.
• ليه عندنا أزمة في الدفاع في الكرة المصرية؟
الأزمة الدفاعية بسبب اختيارات المدربين وتركزهم حاليا فقط على الجزء الهجومى إزاى أجيب مهاجم وجناح بيعرفوا يجيبوا أهداف، محدش بيفكر في اختيار المدافع الذى يمتلك قدرات تمنع استقبال الأهداف، ولازم يكون الجهاز الفني فيه مدافع دولى يعرف ينقل خبراته للاعبين، ويعمل تدريبات متخصصة للمدافعين لأن مش أي مدرب يعرف يختار مدافع كويس لازم يكون لعب في هذا المركز.
• من وجهة نظر كابتن هشام يكن مين أفضل مدافع حاليا في مصر؟
أفضل مدافع حاليا في مصر هو محمود حمدى الونش، وهو الذى يمتلك مواصفات المدافع الجيد ثم من بعده محمد إسماعيل، بعد ابتعاد محمد عبد المنعم لأكثر من سنة بسبب الإصابة، باقى المدافعين كويسين زى ياسر إبراهيم، لكن سنه كبر لن يعطيك لسنوات قادمة، وحسام عبد المجيد برضو كويس.
• رأيك في دفاع النادى الأهلى وصفقاته الجديد في هذا المركز؟
دفاع الأهلى هو أقل الخطوط الموجودة في الفريق، على عكس خط الوسط والهجوم، والصفقات الجديدة مش كويسة، ولا يوجد بها اسم كبير يقدم الإضافة المطلوبة بسرعة وسيحتاجون لوقت لعملية الانسجام وممكن ينجحوا أو لا، يعنى أحمد عيد عمل إيه علشان يروح الأهلى، وعمرو الجزار وهادى رياض مش لاعيبة دولية، لازم الأهلى والزمالك تكون صفقاتهم لاعيبة دولية مش جايين نجرب.
• رأيك في اللاعبين الأجانب حاليا في مصر وهل يستحقون المبالغ المدفوعة؟
معظم الأجانب الموجودة حاليا في مصر لا يصلحون للتواجد في الدورى المصرى ومعظمهم أقل من اللاعبين المصريين، لازم الأجنبي يعمل فارق مع الفريق، لكن سوء الاختيار من المدربين والإدارات تسببت في تكبد الأندية مبالغ كبيرة وكلها عمليات بيزنس ومصالح من وراء هذه الصفقة مش كورة خالص، محتاجين لاعيبة تكون بمواصفات كوارشى وإيمانويل في الزمالك.
• نروح للزمالك.. رأيك إيه في تجربة جون إدوارد حتى الآن؟
جون إدوارد لا يصلح للزمالك، لأنه وكيل لاعبين، يمضى لاعب يجيب صفقة مش يدير الزمالك، دا ضحك على الزمالك، وأى حد من أبناء الزمالك أفضل منه على الأقل هيخاف على النادى، الزمالك ليس حقل تجارب ومجلس الزمالك مش بتاع كرة دا بيفهموا فى الألعاب الأخرى ورجال أعمال، وبعدين جون إدوارد فضح إدارة الزمالك وعراهم في كل مكان.
• بما أنك قلت إن جون إدوارد بتاع صفقات إيه رأيك في صفقات الزمالك؟
صفقات الزمالك لم تقدم أي إضافة للنادى إلا المدافع محمد إسماعيل لأنه مدافع كويس والظروف خدمته علشان ينجح في الأبيض لأن كل اللى في مركزه مش كويس، بالإضافة إلى إصابة الونش وابتعاده لفترات عن الفريق، لكن باقى الصفقات مش كويسة ولا تفيد الفريق بأى شيء، والبرازيلى بيزيرا لا يجيد الدفاع وكل اللى بيعمله بياخد الكرة يتنطط بيها شوية، ولا يقدم المستوى الجماعى للفريق، وكلها فرديات لا تصلح، والصفقة السوبر هي من تغير نتائج الفريق إلى الأفضل وتعيده للبطولات.
• رأيك في رحيل ناصر ماهر عن الزمالك وشايف موقف حسام عبد المجيد إزاى؟
ناصر ماهر لاعب حريف وكويس، لكن لم يترك بصمات في الزمالك وأفضل حاجة أنه يروح بيراميدز واستفادنا ماديا منه، لأنه في 3 سنوات لم يقدم شيئا أفاد الزمالك، فرحيله عادى مش هيأثر على الزمالك.
أما حسام عبد المجيد، فأنا لا أحب اى لاعب يساوم الزمالك ليك حق خده وعقدك زوده لكن الأرقام تكون في المعقول، ومتنساش أن الزمالك هو اللى عملك وجبلك شقة وركبك عربية، أبناء الزمالك لازم يردوا الجميل للنادى اللى رباك لازم تيجي على نفسك شوية أنت طالب رقم والزمالك عارض رقم أوصل مع النادى لرقم مرضى وتيجي على نفسك شوية، واللى مش عاوز الزمالك مع السلامة النادى مش بيقف على حد.
• طيب شفت رحيل إمام عاشور وزيزو عن الزمالك إزاى؟
رحيل إمام عاشور وزيزو جريمة في حق الزمالك بغض النظر عن التفاصيل في كلا الموقفين، إمام عاشور لاعب كبير جدا، ورحيله أثر على الزمالك وكان يفيد الزمالك أكثر من أي لاعب، لكن زيزو مكانش عنده وفاء للزمالك، واستغل الظروف لصالحه علشان يرحل، لكن الزمالك تأثر كثيرا برحيل الثنائى.
• طيب شفت أزمة إمام عاشور مع الأهلى إزاى وموقف النادى؟
بص إمام عاشور حاليا عنده الفلوس أهم، فاللى هيدفع أكثر أنا هروح معاه، فالفلوس أهم من الكيان ومش فارق معاه الأهلى أو الزمالك ودا تفكيره ومحدش يقدر يلومه دا حقه، والأهلى خد القرار الصح بفرض عقوبة قوية تناسب ما حدث إزاى لاعب يتخلف عن سفرية مهمة للفريق، واعتذار إمام عاشور مالوش لازمة لأنه أهان الأهلى، والمسئولين إزاى نادى بحجم الأهلى مش عارف اللاعب فين ولا عارف يتواصل معاه، والقرار المناسب حاليا هو بيع اللاعب في أقرب فرصة.
• محمد صلاح كان معاك في أول مرة ينضم للمنتخب احكِ لنا عن أول لقاء؟
أنا أول من ضم محمد صلاح لمنتخب مصر وأسألوا عمرو أنور وسعفان الصغير، الموضوع جه لما سعيد الشيشينى اتصل عليا وقالى هبعتلك لاعبين كويسين جدا تشوفهم "زيكا ومحمد صلاح"، في الوقت ده كان مصطفى يونس مدرب منتخب مصر وأنا معاه لكن مصطفى يونس كان عامل عملية في عينه ومش بييجي فأنا شفت أن صلاح وزيكا كويسين وضمتهم المنتخب، أينعم ماكانش جامد زى دلوقتى بس كان كويس وعنده كورة، وعمرو بركات كان هو اللى بيلعب في الوقت ده وكان مستواه عالى جدا وجسمه كويس، وخدته معايا معسكر إسبانيا.
في المعسكر هناك حصل موقف أن 5 لاعبين اتأخروا بالليل بره الفندق، وكان من ضمنهم محمد صلاح، فكابتن مصطفى يونس طلب إنهم يرجعوا مصر، فأقنعت مصطفى يونس أن يفضلوا لأنهم لو اترحلوا الإعلان والمسئولين هيقولوا إن المعسكر سايب هنخش في حوارات كتير، وبالفعل قعد ولعب معانا وسجل أهداف وبدأ انطلاقته، والكلام ده محدش يقدر ينكره.
• أخيرا لو هشام يكن رئيس نادى الزمالك إيه القرارات اللى ممكن ياخدها حاليا؟
الزمالك حاليا بيمر بأزمات مالية كبيرة جدا بسبب الإدارات السابقة والحالية، لكن أول قرار هاخده رحيل جون إدوارد والأجانب الموجودين في الزمالك دون تأثير واضح، وهاستعين بأبناء الزمالك في الأجهزة الفنية، وهنعتمد على الناشئين من أجل بناء جيل قوى يحمل الزمالك لسنوات مقبلة، وفى الجانب المادى لازم اعمل استثمارات من خلال أبناء الزمالك والمحبين لكى يقف الزمالك على رجله.
