فيسبوك
واتساب
قال محمد إبراهيم لاعب وقائد نادي البنك الأهلي الحالي والزمالك السابق، إن نظام دوري نايل الجديد صعب جدًا بسبب تقسيم الفرق إلى مجموعتين، بطل وهبوط، مؤكدًا أنه لو كان الدوري بالنظام القديم لكانت الأمور ستسير أفضل.
وتابع "إبراهيم" في تصريحات لبرنامج نجوم دوري نايل مع أحمد المصري عبر إذاعة أون سبورت إف إم: وارد نشوف بطل جديد للدوري المصري هذا الموسم، الأمور رغم الصعوبة بقت أسهل، كنت بتلعب 34 مباراة بقى بتلعب 26 فقط، فيه فرق ماشية كويس جدًا وفرق تقدر تعمل مفاجأة لو صدقت نفسها.
وأضاف: لاعبو الكرة المصرية لا يشبهون بعض، كل شيء في الدنيا مختلف، إلا في حالة الإتيان بنسختين من شيء واحد، طبيعي يكون فيه اختلاف بين اللاعبين، عندك لاعب ممكن يلعب ويتألق ويكسر الدنيا 3 أو 4 مواسم والناس مش شايفاه ولاعب تاني يلعب ماتشين حلوين يقولوا عليه أفضل لاعب في العالم مش في مصر بس.
وواصل: القصة هنا مش قصة نتائج ونقاط قد ما هي فكرة الضغوطات وطرق مواجهتها، أنا بلعب في نادي كبير عنده ضغوطات كبيرة، ولاعب آخر بيلعب في نادي عنده ضغوطات أقل، فكل لاعب حسب طموحه وأهدافه وأهداف فريقه، ممكن واحد ينجح في الضغوطات وواحد لأ، وهي دي أبرز الفوارق بين اللاعبين.
وأردف: من آخر موسم لي مع الزمالك وحتى الآن، أرقامي مميزة جدًا كصانع ألعاب في كل الأندية التي لعبت لها، لما بتنشأ في نادي كبير عنده ضغوطات كبيرة وبعدها تروح تلعب في مكان أقل، الأمور بتبقى عادية لكن العكس صعب جدًا، تلاقي لاعب مكسر الدنيا بره الأهلي والزمالك ولما ييجي مينجحش.
واختتم حديثه: ساعات يقولك ده لاعب عصبي، الفكرة هنا مش العصبية، لكن إنك اتربيت على إنك متخسرش، عايز تكسب علطول، شايف نفسك مش أقل من حد، أنت بتلعب وعايز تكسب وتنافس.
وأكد محمد إبراهيم أن القلعة البيضاء صاحبة فضل كبير عليه في مسيرته الكروية، مشددًا على أنه خاض تجربة اللعب للفريق الأول في ميت عقبة قبل ارتداء قميص منتخب مصر، مضيفًا: منتخبات مصر لها دور مهم جدًا في مشواري الرياضي لكن الدور الأهم والأكبر للزمالك.
وتابع "إبراهيم" : ارتباط اسمك بالأهلي أو الزمالك مفيد ومضر، مفيد عشان هيساعدك في أي تجربة جديدة لكن بعد كده مطلوب منك تكافح وتعافر عشان تكمل لإن الضغوطات بتكون كثيرة والآمال كبيرة ومطلوب منك تصنع الفارق دائمًا، وفي نفس الوقت مفيش لاعب سابق في الأهلي أو الزمالك خرج واستمر بعدها فترات طويلة غير قليل جدًا.
وأضاف: الحمد لله رب العالمين الزمالك صاحب فضل كبير على مسيرتي الكروية، وهو اللي صنع اسمي ومقدرش أنكر ذلك، لكن برضو أنا كافحت واجتهدت وتعبت في الزمالك، ولما رحلت تعبت واشتغلت وكافحت وعملت اللي عليا، ومقتنع دائمًا بمقولة إني لو عملت اللي عليا ربنا سبحانه وتعالى بيختار لي أفضل شيء.
وواصل: اللعب في الأهلي والزمالك مختلف عن أي نادي آخر مع احترامي للجميع، الخبرات بتفرق وبتخليك تقدر تتخطى المرحلة دي بسرعة، الأمور حاليًا قريبة والفوارق قليلة، ولو اجتهدت وتعبت واشتغلت بقوة وأنت مقتنع إنك متقلش عن أي مكان كبير وإنك زيك زي أي حد وإنك لازم تتعب وتجتهد وتعمل أفضل ما عندك وتنافس على كل شيء، لو قدرت تعمل ده يبقى وصلت للمرحلة اللي هتلاقي بعدها الدنيا تمام.
وأردف: الفوارق بين الأهلي والزمالك والأندية الأخرى هي الجماهير والتاريخ، عشان كده وأنت بتختار مكان لازم تبقى عارف كل تفاصيل، فيه ناس محترمة بتشتغل وتسعى عشان تعمل اللي عملته الأندية الكبيرة.
وأكمل محمد إبراهيم حديثه: لازم تتعب وتكافح أكثر، لازم تبقى مستعد تاخد من وقتك عشان تقدر تحقق ده وتوصل للحتة دي، وخليك مقتنع إنك طول ما أنت بتعمل اللي عليك، ربنا هيعملك أفضل مما تتمنى، وده اللي بطبقه مع أي نادي لعبت فيه مهما كان اسمه.
وأكد محمد إبراهيم إن منتخب مصر قادر على إحداث مفاجأة بالتأهل إلى الدور الثاني في بطولة كأس العالم، مشددًا: لدينا لاعبين كبار يلعبون في كبريات الدوريات العالمية، لا أراها مفاجأة بل أراها شيء طبيعي، إن يذهب منتخب مصر للعب والأداء والاستمتاع بكرة القدم وترك النتيجة لله.
وتابع "إبراهيم" : علي ماهر المدير الفني الأفضل حاليًا في الكرة المصرية بكل الأرقام التي تحققت، أما الرباعي الأفضل والأميز في الكرة المصرية حاليًا فهم عبد الله السعيد ومحمود حسن تريزيجيه وإمام عاشور وعمرو السولية.
وأضاف: ابعث برسالة إلى الدكتور محمود سعد والكابتن محمود أبو رجيلة، مفادها كل سنة وأنت طيب وبخير ورمضان كريم وربنا يديكم العافية والصحة، الثنائي له فضل كبير على مسيرتي الكروية، والأول هو من ضمني لنادي الزمالك.
وأنهى محمد إبراهيم حديثه: رسالتي إلى أسرتي "زوجتي وأولادي"، ربنا يخليكم ليا ونفضل مع بعض دومًا ونكون في أفضل صحة وحال ويبعد عننا أي شر.
