قصة نجاح سطرتها المنطقة الاستثمارية بمدينة بنها بمحافظة القليوبية، في إطار سعي الدولة إلى توفير مناخ آمن للاستثمار والمستثمرين، وإنتاج منتج عالي الجودة والقيمة، سواء للسوق المحلي أو التصدير عالميًا، ورفع اسم مصر عاليًا في السوق العالمي، وكان بطل هذه القصة تامر إبراهيم غانم، رئيس مجلس إدارة الشركة الماسية للصناعات الغذائية بالمنطقة، حيث المناخ الملائم والبعيد عن البيروقراطية، وتوفير كافة الخدمات في مكان واحد ينعم ببنية تحتية عالية، وخدمات متكاملة في مكان واحد.
بداية حلم التصنيع
في البداية، كشف تامر إبراهيم غانم، رئيس مجلس إدارة الشركة الماسية للصناعات الغذائية بالمنطقة الاستثمارية بمدينة بنها، أن الفكرة بدأت بحلم قديم من خلال تصنيع أي منتج يحمل اسم مصر، شرط أن يكون متخصصًا في تصنيعه، وفي المراحل المقبلة يتم التفكير في حلم التصدير، قائلًا: "كان فيه فرصة إن أنا أكون معدي في المنطقة فأشوف المنطق، وبدأت الفكرة في التطور لدي، إن أنا أدخل المنطقة أستفسر يعني إيه المطلوب علشان أخد مصنع في في المنطقة هنا خصوصًا لقرب مسافة من سكني، وبالفعل فهمت من إدارة المنطقة إنها معمولة بغرض المشاريع الصغيرة والمتوسطة المرتبطة بالمنتجات الزراعية، وأنا طبعًا حلمي طول عمري إن أنا يبقى عندي حاجة هندسية بس الفكرة عجبتني جدًا، وخاصة أن المنتجات الزراعية فيها برضه تكنولوجي في التصنيع، وممكن تبقى بداية كويسة إن أنا أعمل حاجة فيها تصنيع وإن إحنا نتعلم فيها التصنيع".
وتابع: بالفعل جلست مع إدارة المنطقة، وخاصة أني كنت جاي تقريبًا متأخر شوية، كان تقريبًا باقي يومين أو 3 على غلق باب طلبات التقديم، وسألت على التفاصيل وفهمت إن إحنا محتاجين دراسة للمشروع اللي هنبدأ به، واشتغلت من أول لحظة على نفسي إن أنا أفكر في المشروع اللي أنا ممكن أعمله هنا في المصنع، ويخدم المنتج الزراعي ويخدم التصدير، وكنت دايمًا بشوف في الإعلام مدى دعم الدولة وكلامها عن التصدير وإن إحنا عايزين نوصل لـ 100 مليار دولار تصدير تقريبًا، فأنا شايف الدعم ده من كل حاجة بسمعها أو بشوفها، فتوكلت على الله.
تطور فكرة المشروع
وأشار إلى أنه قرأ عن الفكرة، وبدأ من خلال زيارة المصانع في نفس اليوم داخل المنطقة، واقتنع أن الفكرة في البداية إنها تبقى فكرة للتجفيف والتعبئة والتغليف، وبعدين غيرت الفكرة إنها تبقى للمنتجات المجمدة، وأن أنا أجل التجفيف، وبالفعل عملت الدراسة وقدمتها، وفي أسبوع تقريبًا تواصلت معه هيئة الاستثمار لتخبره بتخصيص وحدة، قائلًا: "كانت مفاجأة أنا ما كنتش متوقعها في الأساس يعني، لأني كنت متوقع وقت وإجراءات كتير، وأول ما جالي التليفون وتخصيص الوحدة لي، ابتديت أقعد مع إدارة المنطقة وأعرف التفاصيل اللي نقصاني علشان أبتدي إنشاءات وهعمل إيه وأسألهم على الجهات المنظمة اللي بتحكم العملية".
وأوضح : "طبعًا أنا ما كنتش عارف أي حاجة عن المنتجات الغذائية، وتم توجيهي للهيئة القومية لسلامة الغذاء، والتنمية الصناعية والصادرات والواردات، وباقي الجهات الحكومية المنظمة للعملية من ضرائب وتأمينات وخلافه، وبالفعل ابتديت وأنشأت الشركة، وابتدينا نخلص ورقنا السجل التجاري والضريبية وباقي المستندات الحكومية، وبالتوازي مع الكلام ده ابتدينا الإنشاءات".
خدمات متكاملة وسريعة
وتابع: من أكتر الحاجات اللي شدتني إن في إدارة، حد مهتم بالشكل والمظهر الحضاري للمكان، المنطقة هنا لما تدخلها من أول ما تدخل من على البوابة لغاية ما توصل للمصنع، يعني مميزة جدًا، يمكن أنا في تجاربي السابقة أنا ما شفتهاش غير بره الإمارات تحديدًا، ولقيت المكان منظم وجميل وفي حد مهتم بكل أدق التفاصيل هنا، وهما ساعدونا في كل التصاريح وكل الحاجات اللي مطلوبة مننا والموافقات برضه في وقت قياسي، والطبيعي إحنا كان لينا سابقة عندنا شركة قبل كده، كنا بناخد وقت طويل جدًا في إننا ننهي إجراء أو نخلص ورق، لأن هنا التعاون عندما نقع في مشكلة يتم المساعدة بشكل فوري والتوجيه للجهة المختصة، والتدخل الفوري لحل المشكلة".
واستطرد أن هذا الدعم فرّغنا أكتر للشغل، إن أنا أفكر إزاي أشتغل وإزاي أستثمر أكتر وإزاي هتعلم النوع ده من الشغل، وأشوف أنا هيبقى ليا فرصة في السوق المحلي والتصدير ولا لا، وأركز على تطوير المكان وتطوير الفريق".
توسع الاستثمارات والإنتاج
وأكد أنه في البداية كان حجم الاستثمار 23 مليون، من خلال الإنشاءات، والفكرة المبسطة كانت تغليف وتعبئة الحاصلات الزراعية وعمل براند عليه اسمي واسم بلدنا وأصدره للخارج، وده شيء يعني كنت في الأول مستصعبه بس لقيت في مساعدات من كل اللي حواليا، خصوصًا إدارة المنطقة الاستثمارية في التوجيه وإزاي يعني أسرع في العملية دي، وبالفعل بدأت من خلال العمالة المدربة، وأصبح لدينا مجموعة كبيرة مدربة تفهم طبيعة عمل الفرز والتعبئة، وهذا دفعني للتطوير أكتر، إني لازم أنتقل للتصنيع، وبدأنا في وحدات أخرى في المنطقة هنا، يعني إحنا كنا بادئين بوحدة، النهاردة بقينا 4 وحدات، وأنشأنا شركة فيستفال للصناعات الغذائية، وأصبح لدينا طلبات كتير لتصدير الفواكه، وبالتالي بدأنا في التفكير بالتوسع، وفي المرحلة المقبلة ستكون تكلفة المرحلة الأولى حوالي 20 مليون جنيه، وفي خلال عامين هيبقى في مرحلة تانية سنضاعف الرقم تقريبًا.
التوسع في الأسواق العالمية
واختتم: بالفعل عملنا إدارة تصدير، وابتدينا نستهدف الدول اللي إحنا بنسمع إن هي من أكتر الدول بتستورد من مصر، من أجل اختراق السوق العالمي، وبالفعل بدأنا مع دول ليبيا، وتونس، والدول العربية منها السعودية والإمارات العربية المتحدة وقطر والكويت، وكندا، وأمريكا، وألمانيا، كما بدأنا في التعاقد مع الشركات الأخرى بالعديد من الدول.

إجراءات-خاصة-خلال-التصنيع

العمل-داخل-المصنع

خلايا-نحل-داخل-المصنع

داخل-المصنع-مع-فريق-العمل

رئيس-مجلس-الإدارة-وفريق-العمل

شركاء-النجاح-بالشركة

منتجات-الشركة-جاهزة-للتصدير-للخارج