فيسبوك
واتساب
تناقش الكاتبة الصحفية همت سلامة، رئيس التحرير التنفيذي لـ"اليوم السابع"، في حلقة جديدة من برنامج "الكلام علي إيه؟"، الجدل المثار حول لعبة روبلوكس "Roblox"، وسط تحذيرات من مخاطر وتهديدات تشكلها على هذه الألعاب على سلوكيات الأطفال الذين يدمنوها، بما ينعكس بالأثر السلبي على محيطهم، خاصة وأن هذه الألعاب تستدرج الأطفال لغرف محادثات خاصة وتعرضهم في كثير من الأحيان لمخاطر التحرش والاستغلال الجنسي والاستماع إلى ألفاظ وتعبيرات غير لائقة وايحاءات جنسية غير مناسبة.
وفى حلقة برنامج "الكلام علي إيه؟"، على تلفزيون اليوم السابع، تتناول الكاتبة الصحفية همت سلامة رئيس التحرير التنفيذى لـ"اليوم السابع"، التطور الذى حدث في التعليقات على مخاطر لعبة روبلوكس "Roblox"، بعدما أصدر مركز الأزهر العالمى للفتوى الإلكترونية، بيانًا أكد فيه حُرمة هذه الألعاب دينيًا لما تضمنته من مخاطر جسيمة تهدد سلامة أبنائنا، وتعرضهم لمحتوى غير لائق واستغلال مؤذٍ.
وتقول همت سلامة، في مقدمة برنامجها: "في الحلقة اللي فاتت اتكلمنا عن مخاطر لعبة روبلوكس، ومن وقتها الجدل زاد، لدرجة إن الأزهر الشريف تدخل رسميا، وتحديدا مركز الأزهر العالمى للفتوى الإلكترونية، اللى أصدر بيان بيحذر فيه من اللعبة، وقال إنها مش مجرد تسلية، لأن فيها محتوى غير لائق وشات مفتوح للكل وسهل جدًا يتعرض فيها الأطفال للتحرش أو الاستغلال، الأزهر قال كمان إن المنصة فيها ألعاب ممكن تخلي الطفل يقلد سلوكيات خطيرة، وكمان فيها صرف فلوس علي عملات افتراضية".
وأضافت: "الأزهر هنا بيقوم بدوره في توعية الأهل علشان يتابعوا أطفالهم ويراقبوهم ويوعوهم ويوجهوهم للبدائل الآمنة، والأزهر قال بوضوح: "حافظوا على ولادكم.. ألعاب كتير بتأثر على عقليتهم ودينهم وسلوكهم"، وتابعت: "سامعة حد من بعيد بيقول: هو الأزهر هيتدخل في كل حاجة؟.. الحقيقة إن ده دور الأزهر الشريف بجانب دوره الدينى والروحاني، وهنا احنا بنتكلم على دوره التوعوى والإرشادي، وتوجيه الكبار والأطفال وتحذيرهم من أي مخاطر ممكن تأثر عليهم مش دينيا بس، لكن نفسيا واجتماعيا وسلوكيا وحتى ماديا".
واستكملت حديثها: "زي ما قولنا في الحلقة اللي فاتت.. خطر اللعبة إنها مش مجرد لعبة، لكنها عالم افتراضي مفتوح وواسع، الناس فيه بيستخبوا ورا شخصيات افتراضية يقدروا من خلالها يمرروا أي أفكار شريرة لأطفالنا، وزي ما بنقول دائمًا المنع مش الحل.. الحل في الاهتمام والمتابعة والمراقبة".
ويشار إلى أن الحلقة السابقة من برنامج "الكلام على ايه" التى جاءت بعنوان "روبلوكس.. مصنع مشاكل لأطفالنا، قالت خلالها الكاتبة الصحفية همت سلامة: " الكلام النهارده علي ايه ؟.. الكلام على "روبلوكس" اللعبة اللي تحولت إلى "إدمان" لملايين الأطفال، لعبة شكلها لطيف وشخصيات كرتونية وعالم مفتوح، لكن ورا كل دا في مصائب كبيرة لازم ناخد بالنا منها كأولياء أمور".
وأضاف: "ابسطلك الموضوع.. روبلوكس عبارة عن منصة ألعاب أونلاين مش لعبة واحدة، أي شخص يقدر يصمم لعبة ويحط فيها اللي هو عايزه من عنف وإيحاءات أو حتى أفكار غريبة، وكل التقارير المكتوبة عنها خارج مصر بتقول إنها بتشجع علي العنف والسلوك العدواني، وكمان فيها مشاهد ضد العادات والتقاليد المجتمعية، والمخيف كمان جوه اللعبة إن الشات مفتوح، يعنى الطفل وهو بيلعب ممكن يتكلم مع أي حد غريب واللي ممكن يستغله ويحاول ياخد منه معلومات شخصية أو يخليه يتصرف تصرفات مش أحسن حاجة، مش كده وبس.. اللعبة فيها تنمر لأنها مكان افتراضي، وبالتالي ولادنا ممكن يتعرضوا للسخرية والتنمر والكلام الجارح، ودا غير طبعا الإدمان بالساعات قدام الشاشة من غير ما يحسوا".
وتابعت: "الصين وتركيا وعُمان وقطر، هي الدول اللي أدركت خطورة اللعبة علي الأطفال ومنعتها خالص، ودا طبعا من خوفهم علي سلامة الأطفال، روبلوكس ممكن تكون ساحة مفتوحة فيها متعة للأطفال، بس ممكن تكون "مصنع مشاكل" صغير في كل بيت.. فيا ترى ايه الحل؟.. ناس شايفه إن لازم نمنعها، وناس تانية بتقول إن المنع مش حل، لكن الحل في المتابعة والمراقبة وتحديد وقت اللعب عشان نحافظ على أطفالنا وسلامهم النفسي".
