"صحح مفاهيمك" اللى يمد إيده على امرأة بيكسر فيها روح وبيكسر فى نفسه إنسانيته

قالت مبادرة "صحح مفاهيمك"، تعقيبا على جرائم التعدى على الزوجات، إن القوة مش إنك ترفع إيدك عليها، القوة إنك ترفع مقامها، وتحسن إليها.. فيه ناس فاكرة أن القسوة رجولة، وإن الصوت العالى هيبة، وإن السيطرة قوة.. لكن الحقيقة أن اللى يمد إيده على امرأة، بيكسر فيها روح، وبيكسر فى نفسه إنسانيته.

العنف ضد المرأة مش "غلطة بسيطة" ولا "خلاف عادي"،
ده وجع نفسى ممكن يعيش جواها سنين، وضياع بيت كان ممكن يعيش فى سكينة ورحمة.

ربنا سبحانه وتعالى قال: {وَعَاشِرُوهُنَّ بِٱلۡمَعۡرُوفِۚ} [سُورَةُ النِّسَاءِ: ١٩]
وسيدنا النبى ﷺ قال: «خَيْرُكُمْ خَيْرُكُمْ لِأَهْلِهِ، وَأَنَا خَيْرُكُمْ لِأَهْلِي» [سنن الترمذي]

يعنى الرجولة مش فى الغِلظة…
الرجولة فى حسن العشرة، وفى حفظ الكرامة، وفى صون الأمانة.
والقوة الحقيقية هى اللى تحمى، مش اللى تؤذي.

خلينا نربّى ولادنا على الاحترام، ونعلم بناتنا أن ليهم كرامة ما تتكسرش، ونفهم كل بيت أن المودة والرحمة مش رفاهية... دى أمر ربنا.

اللهم أصلح بيوتنا، واهدِنا لأحسن الأخلاق لا يهدى لأحسنها إلا أنت، واصرف عنا سيئها لا يصرف عنا سيئها إلا أنت.