قالوا عن تمارا بنتى "زملكاوية" مع إنها متعرفشي عن الكورة غير الأهلي ومحمد صلاح
كورونا أفسدت مباراة اعتزالي مع برشلونة.. ولسة بحلم باليوم ده
رفضت عرضا إماراتيا بـ4 أضعاف عرض بلجيكا عشان كان نفسي أحترف فى أوروبا
صفحات مأجورة على السوشيال ميديا "حطانى في دماغها"
السوشيال ميديا بتنشر أكاذيب كتير لدرجة أن مراتي قرأت أني عملت حادثة مع إني كنت نايم في البيت
مانويل جوزيه "نمبر وان" فى تاريخ أجانب الأهلى.. وبعدين كولر
رئاسة الأهلى "حلم" مؤجل ومصطفى محمد "هيروح فى حتة تانية" بأوروبا
رابطة الأندية عملت كتير فى منظومة الكرة المصرية وهذا هو الدليل
أعدها للنشر: ياسمين يحيى – لبنى عبد الله
أدار الندوة: دندراوي الهوارى
شارك في الندوة: عمر الأيوبي – أحمد توفيق – فتحى الشافعى– محمد عراقى ـ أدهم البدراوى
كيف يمكن أن يهب شخص ما حياته لمكان، كيف تنسى غرورك وهيبتك من أجل كيان، كيف تختار طريقاً وشخصية لتضع نفسك في مكانة لم يصل لها أحد فى القارة كلها، كيف تصبح قولا وفعلا "ابن النادى" ترفع شعار أنا لا أمثل نفسي، مواقفى وتصرفاتي وقراراتي تمثل النادي الأهلي.. نحن أمام "حدوتة كروية" صنعت المجد داخل أسوار التتش.. هى حكاية فشل فيها مئات اللاعبين انتهت رحلتهم الكروية دون بصمة تُذكر.. لكن نجمنا تسلّح بالموهبة والإخلاص والعزيمة ليبنى لنفسه إمبراطورية النجاح عبر محطات صعبة، رفض خلالها عروضاً بالملايين ليصبح "ملكاً" فى قلوب الأهلاوية.
هو صاحب نصيب الأسد من "روح الفانلة الحمراء"، فهو نجم اللحظات الأخيرة، بطل بعيون حمراء، الفتى الذهبى، المتحدث الرسمي لمنطقة الجزاء، قناص الكرة المصرية.. نجمنا هو عماد متعب نائب رئيس رابطة الأندية المحترفة ونجم الأهلى ومنتخب مصر السابق، الذى يمثل حالة نادرة فى الوسط الكروي، فربما تجد لاعبا يترك فريقه من أجل الأموال أو من أجل الانتقال للاحتراف الخارجي، حتى إذا كان فريقه بحاجة لخدماته ولكن نجمنا ضرب مثالا ودرسًا رائعًا لأي لاعب عندما فضل مصلحة ناديه على الاحتراف الخارجي.
نجمنا مارس لسنوات طويلة الهواية التي يعشقها أكثر من غيرها في تسجيل الأهداف المؤثرة في اللحظات القاتلة، سواء مع الأهلي أو منتخب مصر، حتى بدا كأنه يتلذذ فى تعذيب المنافسين كروياً فى "الوقت الضائع".. ولكن داخل ندوة اليوم السابع سدد طلقاته المدوية طوال الـ90 دقيقة ولم ينتظر للوقت الضائع.
لماذا تعانى الكرة المصرية من ندرة المواهب الهجومية؟
طرق اللعب اختلفت عن زمان وهذا تسبب في ندرة المواهب الهجومية، لأن طريقة تفكير المدربين اختلفت، الأندية مثلا بتدور على المهاجم زى الأهلى، وفى ناس نجحت وفى ناس لم توفق، بس دايما الجمهور عايز ابن النادى وده مؤخراً مش موجود.
كيف رأيت تعاقد الأهلى مع موديست؟
لا أنظر لبطاقة اللاعب، السن مجرد رقم، الأهم عندى الملعب، وأتمنى موديست ينجح عشان يحطم نظرية السن نهائياً، نغمة السن دى مرفوضة، وحالياً عبد الله السعيد أهم لاعب في بيراميدز وهو أكبر لاعب، وفيه نماذج تانية كتير بتتألق داخل وخارج مصر وسنها كبير زي كريستيانو رونالدو لاعب النصر السعودي.
راضٍ عن قرار اعتزالك؟
كنت مُجبراً على قرار الاعتزال لأنى مقدرتش ألعب خارج الأهلى، وفضلت الخروج من الباب الكبير، ولكن وقتها مشوفتش حد فى الملعب يخلينى قاعد مكسوف على الدكة.
هل انتهى خلافك مع حسام البدري؟
البدري ظلمنى لكن الموضوع انتهى خلاص، اتوعدت بوعود لم تُنفذ، وهو محكمش عليا صح فى الملعب، ولكن الحب اللى جالى بعد الاعتزال أنصفنى، كان ممكن العب وأفقد بريقى مثلا ولكن الأزمة ضاعفت حب الناس لى.
ما هى أهم مكاسب الكرة المصرية من وجود رابطة الأندية المحترفة؟
قبل وجود الرابطة كان في دوري بدون جمهور، ودوري غير منتظم المواعيد، والتصوير كان سيئاً ومتعرفش المسابقة هتبدأ امتى وتخلص امتى، لكن بعد وجود الرابطة وبمساعدة أجهزة الدولة رجّعنا الجمهور للملعب وحددنا مواعيد ثابتة لبداية ونهاية الدوري، وحصل تطوير فى التصوير، ومقدرش أقيّم أداء الرابطة لأنى مسئول فيها، الناس هي اللى تقيّم الأداء بس يكفى أن الفرق أول مرة تاخد راحة بين المواسم وتعمل فترة إعداد، أكيد عندنا أخطاء بس بنحاول علاجها.
ما دور رابطة الأندية فى تطوير الحكام؟
دور الرابطة ليس تطوير الحكام وأدائهم، فهذه مسئولية اتحاد الكرة، دورنا هو البحث عن تحقيق العدالة، ليكون هناك أفضل منتج، والجميع لاحظ استقدام خبير أجنبى، يعقد جلسات مع الحكام ويطورهم، وإن كان هناك أخطاء لكنها قليلة، وموجودة في كل الدوريات حول العالم، وداخل لجنة الحكام هناك قرارات بالايقاف أو عقوبات على الحكام ولكن لا يتم إعلانها.
كما أن دورنا هو توصيل طلبات الأندية ورغباتها إلى لجنة الحكام ، ومحاورة ومناقشة اللجنة فيها، بالإضافة إلى توفير الأدوات من كاميرات ومخرجين، فوفرنا منتج التصوير لإخراج الصورة في أفضل شكل.
بتشوف ازاى اتهامك بعدم الدفاع عن الأهلى؟
في ناس بتهاجم لأسباب معلومة وعندهم أغراض شخصية ودول مش هرد عليهم لأنهم معروفين وأسبابهم معروفة، ولكن متعب هو ممثل الأهلى في الرابطة، لكن في نفس الوقت بيمثل 18 ناديا في الدوري، بحاول أجيب حقوق الأهلى وحقوق الـ 18 ناديا، والأهم أننا حاطين لوائح ومش بناخد قرارات من دماغنا ولا تحكمها الأهواء والانتماءات وبتطبق على الكبير والصغير، وعماد متعب مستحيل يشوف الأهلى بيتظلم ويسكت عشان الناس تبقى عارفة.
هل تواجه هجوماً فى الشارع مثل انتقادات السوشيال ميديا؟
لا خالص والله، الناس بستقبلنى أحسن استقبال فى أى مكان، وفى السوشيال ميديا لازم نكون عارفين إن في صفحات مأجورة كنت الأول مش فاهم دا ولكن بعدين عرفت لما شوفت الاسكربتات المتوزعة بنفس الطريقة والنمط.
وما هى أغرب شائعة واجهتك الفترة الأخيرة؟
لقيت مراتى بتصحينى من النوم بتقولى هو أنت عملت حادثة قولتلها أنا نايم قدامك قالتلى كذا حد كاتب على السوشيال ميديا إنك عملت حادثة لدرجة إنى صدقت.. فضحكت بجد.
لماذا تراجعت عن استكمال احترافك فى الدوري البلجيكى؟
تلقيت عرضاً من بلجيكا مقابل 525 ألف يورو، ووقتها تلقيت عرضاً من الإمارات مقابل 2.5 مليون دولار، وهو أربعة أضعاف العرض البلجيكى، ورفضت الاحتراف في الخليج عشان عايز احترف فى أوروبا، ولما روحت بلجيكا كان عمري 26 سنة واكتشفت إن أكبر لاعب بعدى فى الفرقة عنده 20 سنة، وعرفت إن الناس بتخطط إنى أقود الفريق ده موسمين وبعدين يتم بيعى كفكرة استثمار ووقتها قعدت مع رئيس النادى هناك وقولتله انا مش هقدر اطموحاتك دى.
وماذا عن تجربتك مع اتحاد جدة السعودى؟
قدمت موسما رائعا من أروع المواسم فى مسيرتى وحققت بطولات كثيرة والناس هناك لحد الآن بتتكلم على كويس جدا.
بتشوف إزاى الدوري السعودى حالياً؟
الدوري السعودى قوى جدا من 2009 مش من دلوقتى، دايما فيه منافسة بين فرق كتيرة في ملاعب كويس.. فيه تصوير مُميز وفى السعودية فيه بطولات كتير وكمان في وجود النجوم الحاليين زادت قيمة الدوري السعودى بالطبع وأصبح له جماهيرية عالمية، وبالتالي زادت قيمته التسويقية.
ما هى البطولة التي كنت تحلم بتحقيقها؟
الصعود لكأس العالم مع منتخب مصر والفوز بدوري أبطال آسيا مع اتحاد جدة عشان أكون فوزت بدوري الأبطال الأفريقى مع الأهلى ودوري الأبطال الآسيوى.
لو كنت مكان محمد صلاح كنت تكمل مع ليفربول ولا تروح اتحاد جدة ؟
مبحبش احط نفسى مكان حد، صلاح عنده ظروفه وكمان عنده أهداف عايز يحققها، الراجل مكّسر الدنيا في أوروبا وعايز يفوز بلقب أفضل لاعب فى العالم والجمهور والإدارة مقدرينه كويس فى ليفربول، فهو أكيد له حساباته، أكيد يفكر إزاى يسيب كل دا ويمشى عشان خاطر الفلوس، عامة هى وجهات نظر في النهاية وكل واحد حر في قراراه بمعطياته وقتها.
*شوفت إزاى شائعة إن بنتك تمارا زملكاوية؟
بنتى عندها عشر سنين متعرفش فى حياتها حاجة غير الأهلى، اللى بتروحه معايا وبمرنها بنفسى كورة فيه، وليفربول عشان محمد صلاح.. مستغرب جدا إن الشائعات وصلت لبنتى كمان، أنا بناتى ومراتى ملهمش في الكورة فعلا، عيلتى بتعشق الأهلى، وعيلة مراتى عايشين بره ومش متابعين الكورة خالص.
رتب الأفضل من وجهة نظرك جوزيه وموسيمانى وكولر؟
جوزيه نمبر وان، ثم كولر، ثم موسيمانى اللى بحبه على المستوى الشخصى جدا.
ماهى قيمة عقدك فى الأهلى مقارنة بالأرقام فى الفترة الحالية؟
**عقدى في الأهلى لم يكن برقم كبير، ففي عام 2008 قيمة عقدى كانت 300 ألف جنيه، زى الناشئين وقتها، وعام 2005 كان 150 ألف جنيه فقط، رغم أن هناك لاعبين كانوا يحصلون على ملايين في الفريق، ولكن بعد الانتقال الى الدورى السعودى تم تعديل عقده من 300 إلى 800 ألف.
ما رأيك في مصطفى محمد وتقييمك لتجرته الاحترافية؟
**مصطفى محمد لاعب كبير يسجل أهدافاً مميزة ويسدد الضربات الثابتة ولديه إمكانيات عالية وقوة بدنية ونتمنى وجود مهاجم مثله في الدورى المصرى، ويذكرنى بعمرو زكى أفضل المهاجمين في تاريخ مصر، ومصطفى محمد مركز مع فريقه الحالي نانت الفرنسي بشكل كويس اوى و يطور من نفسه دائما ، و لا يركز مع النقد وما يقال حوله ، وعشان كدا هيروح في حتة تانية.
ما مصير مباراة اعتزالك؟
اعتزلت عام 2018 ، ووقتها رتبت أمورى لأقامة مباراة بين الأهلي وبرشلونة الإسباني وسافرت إسبانيا واتفقت مع مسئولى النادي الإسباني على جميع التفاصيل لكن جاءت جائحة كورونا لتُفسد كل شيء، ورغم أنني اعتزلت منذ سنوات إلا أننى مازلت أرغب فى إقامة مباراة اعتزالي.
ما سر إصرارك على مباراة الاعتزال؟
عاوز بناتى يشوفوا اللقطة دى، لأنهم مشافونيش وأنا بلعب وبسجل أهداف وبفوز ببطولات عشان كدة نفسي أعمل ماتش اعتزال ويشوفوني بلعب حتى لو لمدة 90 دقيقة أو أقل.
*هل تفكر فى انتخابات الأهلى؟
في الوقت الحالي لا أفكر، ولكن شرف لى أن أكون رئيس الأهلى وأتمنى ذلك، ولكن ليس في الوقت الحالي، وأتمنى أكون رئيس الأهلى يوماً ما، وفيما يخص منصب مدير الكرة فهو في حساباتى وبفكر فيه وكانت الأقرب لى فى الإدارة، لكن الوقت الحالي عايز أكتسب خبرات واخد دراسات وكورسات فى الخارج.
*ما رأيك في تجربة حسام غالى؟
حسام غالى عقلية متعلمة وذكى وبيحب الشغل، وعقليته في الكورة رائعة وفنياته لا خلاف عليها وكلها مؤهلات تجعله ينجح في أي مكان يتواجد فيه.
*ما تقييمك للجنة التعاقدات الأهلى؟
الأهلى من أكثر الأندية احترافية في التعاقدات، واختيارات اللاعبين ترجع الى المدرب، قد يكون المدرب موفق أو لا فى اختياره لكن التعاقدات تتم باحترافية، وهو الأفضل بين كل الأندية المصرية في تلك الجزئية.
*هل حصل صلاح محسن ومحمد شريف وشادى حسين على فرصتهم في الأهلى؟
الثلاثة لعبوا وأدوا أداء جيدا مع الأهلى، وبالنسبة لصلاح محسن ومحمد شريف قاموا بدور المهاجم، لكنهم ليسوا مهاجمين، وشادى حسين كان مهاجم صريح، لكن صلاح محسن جه عليه وقت لم يكن يشارك فيه وقصّر في حق نفسه لكن الفرصة رجعلته تانى ولازم يمسك فيها، أما شادى حسين فأنا "ألوم" عليه لأنه كان بيرجع كتير للخلف ونسى دوره إنه يكون في منطقة جزاء المنافسين عشان يسجل بسهولة.
*ما الهدف الذى لا تنساه فى مسيرتك؟
**ليس هدف واحد بل 4 أهداف ، الأول هدفى في سيوى سبورت بنهائي الكونفدرالية، والثانى مع منتخب مصر في شباك الجزائر، والثالث مع الأهلى في مرمى الاتحاد الليبى، والرابع امام الزمالك في نصف نهائي دورى الأبطال 2005.
.jpg "ندوة عماد متعب باليوم السابع (1)")
ندوة عماد متعب باليوم السابع (1)
.jpg "ندوة عماد متعب باليوم السابع (2)")
ندوة عماد متعب باليوم السابع (2)
.jpg "ندوة عماد متعب باليوم السابع (3)")
ندوة عماد متعب باليوم السابع (3)
.jpg "ندوة عماد متعب باليوم السابع (4)")
ندوة عماد متعب باليوم السابع (4)
.jpg "ندوة عماد متعب باليوم السابع (5)")
ندوة عماد متعب باليوم السابع (5)
.jpg "ندوة عماد متعب باليوم السابع (6)")
ندوة عماد متعب باليوم السابع (6)
.jpg "ندوة عماد متعب باليوم السابع (7)")
ندوة عماد متعب باليوم السابع (7)
تم أضافة تعليقك سوف يظهر بعد المراجعة