-
الرئيس السيسي: "بتابع بنفسى دفع فلوس الصيانة فى بشاير الخير والأسمرات"
-
الرئيس السيسي: نحتاج 250 مليار دولار لتطوير التعليم لنصل لجودة الدول المتقدمة
-
الرئيس السيسي: "زراعة مليون فدان تتكلف 150 مليار جنيه"
-
الرئيس السيسي: أعلم بضعف المرتبات.. أقل من 10 آلاف جنيه لأى حد مش هايعيش
-
الرئيس السيسي: حاولت أستفيد من الرصيد الشعبى كمسار فكرى يفيد الدولة
-
الرئيس السيسى: "دولة زى مصر عاوزة تريليون دولار فى السنة تصرفه"
-
الرئيس السيسي: هندفع 40 تريليون جنيه حتى 2052 بسبب سحب أموال المعاشات من سنين
-
الرئيس السيسي يوجه بالبدء الفورى فى تنفيذ توصيات المؤتمر الاقتصادى
قال الرئيس عبد الفتاح السيسى، إن الموانئ التى تنفذ داخل مصر يتم طرحها للتشغيل للقطاع الخاص، "أنا بقول للقطاع الخاص المصرى أنت مستعد تدخل معانا، أنا خلصت وأنت مش هتتكلف حاجة، عايز تجيب تحالفات تشتغل معاك ومعانا".
أضاف الرئيس السيسى، فى كلمته بالجلسة الختامية للمؤتمر الاقتصادي: "أنا بتكلم على اللى خايف على أصول مصر، ولما اتعمل الصندوق بتاعنا اتقال أنت بتبيع الحاجة وأصولنا! أنا جبت الموضوع بتاع الموانئ كموضوع نشوفه مع بعض، أنا علشان أعمل ده كنت هدخل فى نقاش لمدة 4 أو 5 سنين علشان حد يجى ياخد، ولما ياخد يجيب تمويل علشان يعمل، وبعد ما يمول يبدأ يشغل، يعنى هأجل الشغل 10 سنين".
وأكمل: "وقت العمل أنا ضاغط على الدنيا كلها علشان تخلص إمبارح مش السنة الجاية، إذا المسار المسئول عن الدولة لو لم ينتبه له، مش هيتحرك، الموانئ اللى بنتكلم عليها بطرحها تشغيل بس.. دى حاجتي.. عايز تخش تشتغل اتفضل، والكلام ده ينطبق على المطارات والبنية الأساسية للدولة كلها، والسكة الحديد".
وتحدث الرئيس عبد الفتاح السيسى، عن التعاون لحل مشاكل الدولة المصرية، قائلا: "كتير من اللى قاعدين هنا.. وناس اقتصاديين.. فى بداية 2014 التقيت بهم.. وقولت لهم تحبوا تيجوا تمسكوا الوزارة.. قالوا لا.. احنا لينا تاريخ.. مستخسر تاريخك فى بلدك.. انا مش بلوم حد والله ما بلوم حد.. احنا نعرف يعنى إيه الحال ده ننجح ولا لا.. خلينا بعيد".
وأضاف الرئيس السيسى، خلال كلمته فى الجلسة الختامية للمؤتمر الاقتصادي: " حد تانى قالى هتدينى كام.. انا باخد 2 مليون فى الشهر.. قولت له مش هقدر.. قالى سبنى بعيد وانا أى نصيحة هقولك عليها".
وتابع الرئيس السيسي: "اللى بتكلم فيه فى صلب المؤتمر الاقتصادي.. وصلب الحوار الوطني.. عاوزين نشوف بعض ونتكلم حتى لو فيه اختلاف.. طب انا حلت موضوع الموانئ والبينة الأساسية بحاجة تانية.. حد يقولى اطرح القطاع الخاص والأجانب يعملوا ده.. أنا معاك .. بس مفيش وقت اتأخر أكثر من كده.. ومفيش 10 و15 سنة إنى اطرح واستني.. إللى اعرف اعمله أننى أعمل انا.. طب بقت موجودة.. إللى عاوز يتفضل.. لكل الناس بما فيها شركات الجيش.. وشركات الدولة مطروحة ايوه.. ده فرصة للكل".
وتطرق الرئيس عبد الفتاح السيسى لأزمة الكهرباء خلال السنوات الماضية، قائلا: "الناس فى أوروبا بتغلى الكهرباء وفقا لتسعيرها، أنا عندى 17 مليون مشترك بديهم الكهرباء أقل من نص تمنها حتى الآن".
وأضاف الرئيس السيسى خلال الجلسة الختامية للمؤتمر الاقتصادى مصر 2022: "لو أقدر أساعدك هساعد الكل .. بحاول أخلى اللى إحنا بنعمله مفيد للمستثمرين.. أنا معاكم ومتوافق وداعم ومش كلام دبلوماسي.. مستعد لحوار شفاف وعميق مع أى حد فى أى تخصص".
وتحدث الرئيس عبد الفتاح السيسى عن الأوضاع الاقتصادية للدولة المصرية، قائلا: "والله والله والله فرصة.. كل شركات القوات المسلحة معاكم.. كل شركات الدولة اللى موجودة معاكم.. بس مش تقولى نخفض العمالة الزيادة اللى موجودة وادينى الشركات.. أنت لما بتعمل شركة خاصة بتختار الناس بدقة وتحوكم.. لكن احنا معانا ميراث.. دى مجتمعات وأسر.. اوعى تخلى غضبك من سوء الأداء يتحول لعداوة مع اللى بيقوموا بسوء الأداء.. اوعى تكره الفقير.. اوعى تكره الفقير.. إكره الفقر.. ومش تكره الفقير".
وأضاف الرئيس السيسى: "لما عملنا المساكن للمناطق الخطرة.. قولنا للناس مش هناخد فلوس.. قولنا هناخد صيانة علشان نحافظ.. حد يصدق أنى اتابع.. الناس بتدفع ولا لا.. بتابع بشاير دفعت ولا .. الاسمرات دفعت ولا .. أهالينا دفعت 300 جنيه".
كما تحدث الرئيس عبدالفتاح السيسى، عن قضايا التعليم، قائلا: "فى التعليم تعالى نتكلم وفيه كلام بنسمعه جوة القاعات مع المتخصصين وكلام تانى عن الواقع فى مصر.. طيب عاوزين تغيروه؟ ولا لأ؟.. واحد يقولى التعليم إيه علاقته بالاقتصاد؟ جودة التعليم اللى هتقدم هتقدر.. يا ترى المنتج هيبقا عامل ازاى؟".
أضاف الرئيس السيسى: "25 مليون دول كام للواحد فى السنة، فى الدول المحترمة والقادرة بتدفع 10 آلاف دولار للطالب فى السنة يعنى عاوزين 250 مليار دولار علشان أعمل التعليم ده فى التعليم الأساسى والجامعى حاجة تانية.. أنا حولتهم لجنيه قلت نديهم 250 مليار جنيه طيب هل الموازنة تقدر تعمل كده؟".
تابع الرئيس السيسي: "60 ألف فصل بيتكلف 60 مليار جنيه من غير تشغيل، فيه مدرسين وأطقم لخدمة المدرسة وكهرباء وميه بنتكلم فى 60 ألف مدرسة..طيب لو عاوزين مليون جنيه لرفع كفاءة كل مدرسة يبقا عاوز 60 مليار.. طيب لو مش موجودة حد يقولك المدرسة دى يا عم انت بتتكلم فى ايه؟"..انتوا مش عارفين يعنى ايه دولة وبتهدوا بلادكم.. الناس الغلابة لما حد يجى يتجوز من ولادهم يوضبوا بيتهم علشان الناس تشوفوا كويس.. يا ترى احنا بنعمل كده؟" طيب الفقير غلبان طيب.. الغنى ما انت مبسوط ومستور.. بنحط تراب من غير ما نقصد ليه؟ دى ملامة ليكم ؟ لا.. أنا بكلم كل المصريين".
وتحدث الرئيس عبد الفتاح السيسى عن أساسيات الزراعة المصرية، قائلا: "البنية الأساسية لتجهيز الأراضى للزراعة من أيام محمد على ومن عام 1805 وإحنا طالعين.. مكنش عنده مشكلة لأن المياه بتيجى من فوق ونازلة لتحت.. والحل بس يعمل قناطر وجسور.. حسن الزراعة وبقى عندنا حوالى من 4-5 ملايين فدان.. والدولة استوعبت المبلغ الخاص لتنفيذ هذا الأمر".
وأضاف الرئيس السيسى، خلال كلمته فى الجلسة الختامية للمؤتمر الاقتصادى: "لما بنقول مليون فدان يتكلفوا 150 مليار جنيه.. ده كله علشان بس أزرعهم.. 150 مليار جنيه من أجل تجهيز مليون فدان.. لأن الأرض اللى كانت بتتروى رى مريح.. خلصت؟.. وحتى محطات المعالجة نقدر نستفيد فيها بكل نقطة مياه.. هل حد مستعد للاستثمار؟.. مستعدين للاستثمار سواء داخل مصر أو بره مصر يصرف كده".
وتابع الرئيس السيسي: "أى مستثمر بيحسب الأول ومن حقه وده طبيعى.. ليه طبيعى.. لأنه فى النهاية مش جايب فلوس يفرقها.. عاوز يكسب.. الدولة مضطرة تدخل فى الموضوع لأنه أمن قومى.. اللى بينى وما بين 3 ملايين فدان طاقة عمل بس.. لازم أعمل كده وأدخلهم فى الإنتاج المحلى للدولة المصرية.. وممكن طرحهم للناس.. مشروع بالطريقة دى صعب يتعمل.. حد يقول حط المبلغ ده فى الموضوع.. وأنا بسمع كتير.. يعنى بحب أسمع وأقرأ وأسجل".
وقال الرئيس عبد الفتاح السيسى، إنه يجب كُره الفقر وعلى الجميع أن ينهض لتغييره، مضيفا: "لا يجب أن أكره سلوكيات الفقر، ولكن الفقر نفسه وأستهدف الفقر ونغيره مع بعض، وأنا هقولكم على حاجة بالنسبة للمدرس، مفيش شباب يساعد مع مديريات التعليم فى المحافظات للتدخل بشكل لطيف مع المجموعة الموجودة يشجعهم.. ما المرتبات تعبانة، أيوة تعبانة".
وتابع الرئيس: "والله العظيم أنا بكلمكم من قلبى، أقل من 10 آلاف جنيه لأى حد بيشتغل، مش هيعيش، ما أنت هتقولى إديهم، هقولك يا ريت، هتقولى ما أنت بتتكلم عن ميناء بـ40 مليارا، أنا لازم أكون متوازن فى إدارة الأمر، غيرنا كان مساره أكل، وشرب، ودفع فلوس وسابها لما بقت على الحديدة، وقلتلكم الإصلاح الموجود أكبر من قرار أى رئيس فى الوقت ده، وبالتالى الناس خرجت هدمت الدولة، لأنها مش مستحملة تانى، فلا بد أن أشتغل على كل قطاعات الدولة".
أضاف الرئيس السيسى، فى كلمته بالجلسة الختامية للمؤتمر الاقتصادي: "أنا مهتم بكله، ولما تيجى تتكلم مع وزير التعليم العالى وتقوله أضفت كام جامعة، يجى يقولك إيه، دول بيعملوا الجامعات الأهلية للأغنياء، لأ.. أنا بعمل مسار أطور به التعليم بتكلفة مالية أقل علشان أقدر أحسن فى بيئة التعليم، والمسار المتوازى هو، عندى قبح وعندى حسن، أخلص القبح؟ ولا أعمل الحسن؟.. أنا رأيى أعمل الحسن وأزود فيه وأقلل فى القبح، ده اللى أنا وأى إجراء بعمله فى أى حاجة فى البلد، هدفه أن أتخلص من القبح فى كل شئ".
وأردف: "بالنسبة لكل مستشفيات مصر، تعالى ياللى مهتم بالعمل فى المجال ده اعمل معايا اتفاق، هديك المستشفى واقفة على رجلها زى الفل، ولو بصرف على المستشفى 50 مليون جنيه فى السنة هدفعهم، بس تعالى ديرها بنظام انت بنظام استثمارى مقابل نصيبى، ده متاح لكل المستشفيات فى مصر، وأنت ديرها بكفاءة القطاع الخاص وحسنه، وأنا صاحب مصلحة، ولو وصلنا لتحسين الخدمة الطبية، الخدمة هتتحسن، وعرضنا الكلام ده من زمان".
وفيما يتعلق بالزراعة، قال الرئيس السيسي: "لما جينا نعمل الزراعة بدأنا بمليون ونص مليون فدان، واتقالنا من المستثمرين هنعمل إحنا البنية الأساسية وهنزرع الأرض، طيب حجم اللى اتزرع كام من المطلوب، 10%، 20%، طيب هل اتعمل بنفس الجودة والكفاءة اللى بنتمناها لقطاع الزراعة فى مصر؟، أنا برضو بقدم كشف حساب زيكم، النتيجة إيه المسار.. اللى اتزرع مايجيش 20% من الأرض دي!".
وقال الرئيس عبد الفتاح السيسى، إنه حاول الاستفادة من الرصيد الشعبى والحشد، بمسار تستفيد منه الدولة المصرية، متابعا: "يعنى إيه.. اعتبرت أن مسار إحدى الدول فى الحرب العالمية الثانية، دون ذكرها، الناجم عن دمار حصل فيها وهى دولة كبيرة أوي.. الشعب استخدم الحاكم اللى مسك وقتها كمسار فكرى، وتحمل تبعات البناء.. لكن الحاكم لو كان ساب المجتمع 20 سنة، لم يكن يصل لتلك اللحظة".
وأضاف الرئيس السيسى، خلال كلمته فى الجلسة الختامية للمؤتمر الاقتصادي: "حصل استغل بناء تراكمى فى البناء.. واستفاد منه ومعاه رصيد لبناء الدولة واستعادتها .. مش قال بيضة فى الأسبوع.. طب هو حد بيضة فى الأسبوع؟!.. رغيف واحد فى اليوم؟!.. حد قال رغيف فى اليوم.. وعاوزين تخلوها بلد زى الفل.. معانا.
وعلق الرئيس عبدالفتاح السيسى، على دعوة اقتصادى ومسؤول سابق بزيادة المعاشات قائلا: "لما اتحلت المسألة مسمعتش حد يتكلم.. لقيت حد بيتكلم ويقول متزودوهم بقا.. واللى بيتكلم عن الزيادة راجل اقتصادى وكان مسؤول فى البلد، انت بتتكلم بفهم وعلم ومسؤولية وأمانة ولا إيه؟.. بتكلم على الهواء.. إيه اللى إنت بتقوله ده؟.
أضاف الرئيس السيسى خلال بالجلسة الختامية بالمؤتمر الاقتصادى مصر 2022: "لو أنا مش عارف شغلى معرفش أقف الوقفة دى، لو مش عارف أنا بعمل إيه؟ مش هعرف أقف الوقفة دى خالص، وكل واحد يقول اللى هو عاوزه وأقعد أسمع منه قال بتعلم يعنى ..لا لا لا لا والله كل موضوع فى أى قطاع من قطاعات الدولة أخدت جهد من أول ما بدأنا ولحد دلوقتى ولغاية لما أمشى من هنا وجهد مش تنظير".
تابع الرئيس: فكرة حل المسألة، حد تانى يقولى طيب ما انت بتنفق أهو ..ما انت معاك فلوس اهو؟ طيب ماشى، هو كل اللى معايا كام؟ ..دولة زى مصر بعدد سكانها عاوزة تريليون دولار فى السنة تصرفه يعنى 19 أو 18 تريليون جنيه.. الموازنة كلها كام؟ 2 تريليون وشوية نصهم ايه؟ مش كده.. لو مش منتبهين أن ده حال مصر هنتكلم لغة مختلفة وتشكل رأى عام على أن الدولة والقائمين عليها هيضيعوها وأخشى أن اللى بيضيعوها هما اللى بينظروا عليها.. علشان كده كنا محتاجين نعمل ده فى كل شيء الاقتصاد والتعليم ونتكلم كتير واللى عندنا وحد يطرح حلول ونشوف الحلول نقدر نعمل منه قد إيه نفس الكلام فى الإعلام.
وتحدث الرئيس عبد الفتاح السيسى عن المعاشات، قائلا: "حد يطلع يقول زودوا المعاشات شوية.. الدكتور محيى خدوا 400 مليار.. هدفعهم 40 تريليون جنيه حتى عام 2052".
وأضاف الرئيس السيسى، خلال كلمته فى الجلسة الختامية للمؤتمر الاقتصادي: "لما جت القضية اللى رفعها الله يرحمه البدرى فرغلي.. وقال خدتوا فلوس الغلابة والمعاشات.. نحل المسألة دى إزاى؟ مش كده يا دكتور معيط.. 400 مليار، حد قال لو قعدوا زى ما هما فى البنوك طول المدة دى كانوا جابوا كام؟ تفتكروا الرقم كان يكفى؟".
ووجه الرئيس عبد الفتاح السيسى بالبدء الفورى لوضع السياسات والتشريعات اللازمة لتنفيذ توصيات المؤتمر الاقتصادى ونصائح الخبراء الاقتصاديين لتكون خارطة طريق لمسار الاقتصاد المصرى خلال السنوات المقبلة، مع توجيه الحكومة بإجراء تقييم شامل بشكل دورى للإجراءات المتخذة للتأكيد على فعاليتها.
ونصح الرئيس السيسى، فى كلمته بالجلسة الختامية للمؤتمر الاقتصادى – مصر 2022، بتشكيل مجلس أمناء لمتابعة مسار السياسات والتشريعات الخاصة بتوصيات المؤتمر الاقتصادى، قائلا: "اعملوا مجلس أمناء من كل الموجودين من المفكر الاقتصادى والمثقف الاقتصادى وحتى الجامعات الاقتصادية ورجال الأعمال، من كل المعنيين والمهتمين بالموضوع، لكن مجموعة العمل دى تبقى نقطة اتصال بينا كدولة وبين اللى بنعمله، أنتوا قلتوا القضايا وإحنا اتحركنا فيها، طب إحنا أخفقنا فى ده، قولولنا نعمل إيه".
وتابع الرئيس السيسي: "الواقع الموجود فى العالم تأثيره سلبى جدا على كل الدنيا، والشعوب بتعانى، وإحنا فى مصر حالتنا مش هتتحمل ضغط أكتر من كده، بل بالعكس هتحتاج مننا نزود مظلتنا للحماية الاجتماعية فى المرحلة الموجودين فيها حتى نخفف على المواطنين تداعيات الأزمة دى، بذلك أوجه الحكومة بتعزيز مظلة الحكومة لتخفيف تداعيات الأزمة الاقتصادية العالمية على المواطنين، وتوفير أقصى درجات الدعم والمساندة للفئات الأكثر تأثرا".
وأكمل الرئيس: "أوجه الحكومة بالعمل على عدم تحميل المواطن لأعباء إضافية خلال الفترة المقبلة نظرا للظروف الاقتصادية العالمية، ومن ضمن المسار اللى قلنا هنمشى فيه قلنا هنعمل فرص عمل فى كل حتة فى الدنيا، تجتذب طبقات بسيطة ومحدودة، وشغالين فى الكلام ده من 7 سنين، ومش أقل من 5 لـ6 مليون إنسان شغالين على الأراضى المصرية".
تم أضافة تعليقك سوف يظهر بعد المراجعة