عمرو أديب: "الدواء اللى أعلن عنه ترامب لعلاج كورونا مصر بتنتجه بكميات كبيرة"

أكد الإعلامي عمرو أديب، أن الرئيس الأمريكي دونالد ترامب، خلال خطابه أكد أنه أشترى أكثر من 29 مليون جرعة تركيبة دواء جديدة لعلاج فيروس كورونا، وقال: "الرئيس الأمريكي إمبارح قال على تركيبة دواء جديدة بيقول أنها تعالج فيروس كورونا، حابب أقولكوا على حاجة مهمة، لو الكلام ده صحيح، فالدواء ده بيتم إنتاجه في مصر وبكميات كبيرة، وفي شركة أجنبية بتصنعه هنا وفي شركة قطاع عام تابعة للحكومة بتصنعه".

وأضاف الإعلامي عمرو أديب خلال برنامج "الحكاية"، الذي يذاع على قناة mbc مصر: "مصر فيها خير كتير والله، مصر فيها كل شىء، إمبارح في وسائل إعلام أجنبية مسكت الرئيس ترامب غسلته علشان خاطر اتكلم عن جرعات الدواء ده، لكن أتمنى من كل قلبي أن كلامه يطلع صح وأن الدواء ده يجيب نتيجة، هتفرق أوي يا جماعة، مش بس هنعالج الناس هنا من الفيروس، ده إحنا هنبعته للدول التانية كمان".

وقال عمرو أديب: "أبوس إيديكوا خدوا بالكوا من صحتكوا، اغسلوا إيديكوا عشان خاطر أنت مش بتحمي نفسك بس، أنت بتحمي حبايبك وجيرانك وأهلك".

وكان قد علق الإعلامي عمرو أديب، على تأخر بيان وزارة الصحة حول عدد إصابات فيروس كورونا فى مصر والمستجدات المتعلقة بالفيروس، وقال: "البيان اتأخر نص ساعة، الدنيا اتقلب على السوشيال ميديا والشائعات منتهتش، والناس بتحب تصطاد في المياه العكرة، والأهم من المؤامرة هو الجهل والغباء، تلاقي اللي يقولك أصل أحمد كتب على صفحته، مين أحمد ده، ده وزير الصحة يعني ولا مين".

وأضاف عمرو أديب: "الراجل بتاع منظمة الصحة العالمية علق على عدد الإصابات في مصر، وقال أن النسبة معقولة، تحس أن في بعض الناس مستنية أن الأرقام تزيد، ليه يا حبيبي، ليه يا أخى، استبشر خير، قول إن شاء الله هتعدي ومش هيحصل حاجة، أنا نفسي أفهم إيه الحالة الانتحارية اللي عند الناس دي، يا سيدي 300 حالة أو 1000، إيه هيحصل إيه، الأزمة اللي إحنا فيها دي فرصة نطبق النظام، في اختراع اسمه الطابور".

واستكمل عمرو أديب حديثه قائلا: "على فكرة أنت لو وقفت من هنا لبكرة في البنك مش هتدخل غير برقمك، الناس واقفة تحس أنها عاوزة تنتحر، حضرتك نمرة كام، قالك الناس اتلمت على البنك الأهلي وطلعت شائعة أنه بيوزع 500 جنيه، والرئيس أقرها انهارده وهيكون ليها آليات صرف مختلفة".